قازاقستان رەسپۋبليكاسى پارلامەنتى ءماجىلىسىنىڭ توراعاسى قابيبوللا جاقىپوۆ باستاعان ءماجىلىس دەپۋتاتتارىنىڭ دەلەگاتسياسى ءبىر كۇندىك ساپارمەن نيدەرلاند كورولدىگىندە بولدى. ساپاردىڭ باستى ماقساتى – قازاقستاننىڭ كانديداتۋراسىن بۇۇ قاۋىپسىزدىك كەڭەسىنىڭ 2017-2018 جىلدارعا تۇراقتى ەمەس مۇشەلىگىنە ۇسىنۋ.
قازاقستان پرەزيدەنتىنىڭ ارنايى ەلشىسى رەتىندە ءماجىلىس سپيكەرى نيدەرلاند كورولدىگىنىڭ پرەمەر-ءمينيسترى مارك ريۋتتەگە مەملەكەت باسشىسى نۇرسۇلتان نازارباەۆتىڭ بۇۇ قاۋىپسىزدىك كەڭەسىنە ەلىمىزدىڭ كانديداتۋراسىن 2017-2018 جىلدارعا تۇراقتى ەمەس مۇشەلىككە ۇسىنعاندا قولداۋ ءبىلدىرۋىن وتىنگەن حاتىن تابىستادى.
سونداي-اق, ق.جاقىپوۆ بۇۇ قاۋىپسىزدىك كەڭەسىنىڭ قۇرامىنا ەلىمىزدى العان جاعدايدا قازاقستان قازىرگى تاڭدا وزەكتى بولىپ وتىرعان ماسەلەلەردىڭ شەشىمىن تابۋعا كۇش سالاتىنىن اتاپ ءوتتى. سونىمەن بىرگە, ازىق-ت ۇلىك, سۋ جانە ەنەرگەتيكالىق قاۋىپسىزدىك پەن يادرولىق تاراتپاۋ ماسەلەلەرىندە باسىمدىق بەرىلەتىنىن ەسكەرتتى.
سونىمەن قاتار, ءماجىلىس ءتوراعاسى ىنتىماقتاستىق, جاھاندىق قاۋىپسىزدىك پەن تۇراقتىلىق تاقىرىبىنا باعىتتالعان بىرقاتار ەكىجاقتى كەزدەسۋلەر وتكىزدى. نيدەرلاند سەناتىنىڭ توراعاسى انكي بروكەرس-كنولمەن اڭگىمە بارىسىندا ق.جاقىپوۆ ەكى ەل اراسىنداعى وسى سالالاردىڭ وزەكتى ماسەلەسىنە شىنايى نيەت تانىتتى.
انكي بروكەرس-كنول قازاقستان مەن نيدەرلاند اراسىنداعى جوعارى دەڭگەيلى قاتىناستارعا ريزاشىلىق ءبىلدىرىپ, ەكىجاقتى جانە كوپجاقتى پىشىمدەگى ۇنقاتىسۋعا ءازىر ەكەندىگىن جەتكىزدى. «ىنتىماقتاستىق پەن نيەتتەستىك – ءبىزدىڭ ەلدەردىڭ سوڭعى جيىرما جىلداعى ۇستانىمى بولىپ تابىلادى», – دەدى انكي بروكەرس-كنول. نيدەرلاند پارلامەنتى سەناتى سپيكەرىنىڭ پىكىرىنشە, ءوزارا بايلانىستىڭ تاياۋ بولاشاقتاعى باعىتى دەموكراتيا, ەكونوميكا جانە ايماقتىق ساياسات بولىپ تابىلادى. جاھاندىق قاۋىپسىزدىك ماسەلەلەرىنە دە ايرىقشا كوڭىل ءبولىندى.
سونىمەن بىرگە, ءماجىلىس ءتوراعاسى ءبىزدىڭ مەملەكەت باسشىسىنىڭ ساياسي باعىتى الەۋمەتتىك ىلگەرىلەۋ, جاھاندىق بەيبىتشىلىك پەن قاۋىپسىزدىكتى قولداۋ, باسقا ەلدەرمەن دوستىق قاتىناستى وركەندەتۋ بولىپ وتىرعانىن اتاپ كورسەتتى. ق.جاقىپوۆ نيدەرلاند كورولدىگى قازاقستاننىڭ 2017-2018 جىلدارعا بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە وتۋگە كانديداتۋراسىن قولدايدى دەگەن سەنىم ءبىلدىردى.
ەكونوميكالىق ىنتىماقتاستىقتى نىعايتۋ تاقىرىبى نيدەرلاندتىڭ ەكونوميكالىق قاتىناستار ءمينيسترى حەنك كامپپەن جۇزدەسۋ بارىسىندا دا ءورىس الدى. تاراپتار ەكى ەل اراسىنداعى سەرىكتەستىك قاتىناستار دەڭگەيىن جوعارى باعالادى. بۇگىندە نيدەرلاند قازاقستان ينۆەستورلارى اراسىندا العاشقى ورىنعا شىعىپ, 2014 جىلعى ەكىجاقتى تاۋار اينالىمى 9 ملرد. اقش دوللارى كولەمىنە جەتتى.
قابيبوللا جاقىپوۆتىڭ ايتۋىنشا, ساۋدا-ەكونوميكالىق ءجانە ينۆەستيتسيا-تەحنولوگيالىق ءوزارا بايلانىستى ىنتالاندىرۋعا قازاقستان-گوللانديا ىسكەرلىك كەڭەسى مۇمكىندىك جاسايتىن بولادى.
حەنك كامپ قازاقستاننىڭ دامۋ قارقىنىن جوعارى باعالاي كەلىپ, مەملەكەت باسشىسى نۇرسۇلتان نازارباەۆتىڭ ەلدىڭ وركەندەۋىنە ناقتى باعىت بەرىپ وتىرعانىن اتاپ ءوتتى. مينيستردىڭ مالىمدەۋىنشە, نيدەرلاندتىڭ ەكونوميكالىق قاتىناستارى قازاقستاننىڭ بارلىق ايماقتارىنىڭ ەكونوميكالىق تۇراقتى دامۋى ءۇشىن قاجەت.
ءوز كەزەگىندە قابيبوللا جاقىپوۆ ەۋرازيالىق وداقتىڭ ءمۇمكىندىگىن ەكى ەل اراسىنداعى مۇددەلەردى جاقىنداستىرۋعا پايدالانۋعا بولاتىنىن مالىمدەدى. ءماجىلىس توراعاسى قازاقستان زاڭناماسىنداعى شەتەل ينۆەستورلارىنا جاسالاتىن جەڭىلدىكتەرگە دە توقتالىپ ءوتتى. وندا سالىقتى وڭتايلاندىرۋ ينۆەستيتسيالىق احۋالدى جەتىلدىرۋ باعىتىنداعى زاڭدار جايىندا ايتىلدى.
تاراپتار ىنتىماقتاستىقتىڭ بولاشاق باعىتى دەپ مۇناي, ەنەرگەتيكا جانە كولىك پەن كوممۋنيكاتسيا سالالارىن اتادى. ق.جاقىپوۆ بۇگىندە قازاقستاندىق پارلامەنتشىلەر قازاقستان پرەزيدەنتىنىڭ باستاماسىمەن قولعا الىنعان بەس ينستيتۋتتىق رەفورمانىڭ ءتيىمدى ورىندالۋى ءۇشىن زاڭنامالىق بازا ازىرلەپ جاتقانىن, ونىڭ ءبىزدىڭ ەلگە حالىقارالىق تاجىريبە ءۇشىن ماڭىزى بار ەكەنىن, سونىڭ ىشىندە نيدەرلاند كورولدىگى دە بار ەكەنىن حابارلادى.
حەنك كامپ ءماجىلىس سپيكەرىن ءوزىنىڭ جىگەرىن قازاقستان-نيدەرلاند ەكونوميكالىق قاتىناسىن نىعايتۋعا جۇمسايتىنىنا سەندىردى.
ساۋلەبەك ءبىرجان.