ورتالىق كوممۋنيكاتسيالار قىزمەتىندە ارالاس جەكپە-جەك كۇرەسى (اجك) فەدەراتسياسىنىڭ جەتەكشىلەرى جانە اجك بويىنشا ۇلتتىق قۇراما كومانداسىنىڭ مۇشەلەرىنىڭ قاتىسۋىمەن ارالاس جەكپە-جەك ءتۋرنيرىنىڭ ءباسپاسوز كونفەرەنتسياسى ءوتتى. قازاق حاندىعىنىڭ 550 جىلدىعىنا ارنالعان شارا اياسىندا وتكىزىلەتىن ايتۋلى دودا 3 شىلدەدە, قالا كۇنى قارساڭىندا ۇيىمداستىرىلماق. تمد دەڭگەيىندەگى اجك-ءنىڭ كىل مىقتى سپورتشىلارىن جينايتىن تۋرنير تاقىرىبى – «كوشپەندىلەر شايقاسى – 5».
ارالاس كۇرەس جەكپە-جەگىنىڭ قۇرامىنا دجيۋ-دجيتسۋ, گرەك-ريم كۇرەسى, ەركىن كۇرەس, دزيۋدو, سامبو سىندى كلاسسيكالىق كۇرەس تۇرلەرىمەن قوسا, بوكس, تايبوكس جانە كيكبوكسينگ سىندى ەلەۋلى ەرەجەسى بار سپورت تۇرلەرى جاتادى. تاريحي تامىرىن مىڭجىلدىقتاردان الاتىن وسى سپورتتىڭ ءبىزدىڭ ەلدە جۇيەلى دامىپ جاتقانىنا ءبىراز بولدى. دەگەنمەن, فەدەراتسيانىڭ تاباندى ەڭبەگىنىڭ ارقاسىندا 2013 جىلى عانا ارالاس كۇرەس جەكپە-جەگى رەسمي سپورت ءتۇرى رەتىندە قازاقستان رەسپۋبليكاسىنداعى سپورت تۇرلەرىنىڭ مەملەكەتتىك تىزىمىنە ەندى. اجك بويىنشا ەلىمىزدىڭ ۇلتتىق قۇراما كومانداسى حالىقارالىق دەڭگەيدە مويىندالعان, الەمدىك رەيتينگتە رەسەيگە عانا جول بەرەدى. سپورت جارىسىنىڭ قازاق حاندىعىنىڭ 550 جىلدىعىنا قاتىسى جايلى ايتقان قازاقستانداعى اجك فەدەراتسياسىنىڭ قۇرمەتتى پرەزيدەنتى ەرلان قارين: «ايتۋلى شاراعا وراي وتكىزىلىپ جاتقان مادەني شارالارمەن قوسا, وسى سپورتتىق جارىستى وتكىزۋدەگى باستى ماقساتىمىز – سپورتشىلارىمىزدىڭ ەڭسەسىن كوتەرىپ, ولارعا قولداۋ ءبىلدىرۋ. ازيا قۇرلىعىندا ارالاس جەكپە-جەك كۇرەسىن ۇيىمداستىرۋدان قازاقستان جەتەكشى ورىندا كەلەدى. وسىنى پايدالانا وتىرىپ, ءبىز 2017 جىلى ەكسپو-2017 كورمەسى اياسىندا اجك بويىنشا الەم چەمپيوناتىن استانادا وتكىزەتىن بولدىق, بۇل ءبىز ءۇشىن ۇلكەن سەنىم, ابىروي», دەدى. ال, قازاقستانداعى اجك فەدەراتسياسىنىڭ پرەزيدەنتى اناتولي كيم ارالاس جەكپە-جەك كۇرەسىنىڭ ەلىمىزدەگى تاريحىنا قىسقاشا توقتالىپ, باستى تارتىس سەرگەي حاريتونوۆ پەن كەنني گارنەر اراسىندا وتەتىنىن حابارلادى. ايتا كەتۋ كەرەك, بۇل سپورتشىلاردىڭ كەزدەسۋى ماتچ-رەۆانش ەسەبىندە بولادى. ۇيىمداستىرۋشىلاردىڭ ايتۋىنشا, الداعى ۋاقىتتا وسى سپورت ءتۇرى جايلى پرومو-روليكتەر مەن فيلمدەر ءتۇسىرۋ جوسپارلانۋدا. اجك بويىنشا ۇلتتىق قۇرامانىڭ باس ترەنەرى بايان جانعاليەۆ باستاعان ءبىزدىڭ شىمىر جىگىتتەر اۋەسقوي جانە كاسىبي تۋرنيرلەردە تولايىم تابىستارعا جەتىپ ءجۇر. باس باپكەردىڭ ايتۋىنشا, ۇلتتىق قۇراما الداعى ۋاقىتتا تاجىكستاندا وتەتىن ازيا چەمپيوناتىنا قاتىسۋعا قىزۋ دايىندالۋدا.
قۇندىز ەرالى. استانا.