جاقىندا «كەرۋەن» ساۋدا, ويىن-ساۋىق ورتالىعىندا «بولاشاق» قاۋىمداستىعى, «نۇر وتان» پارتياسى, «بايتەرەك» حولدينگى جانە «مەلومان» كومپانياسىنىڭ ۇيىمداستىرۋىمەن حالىقارالىق ايەلدەر كۇنى قۇرمەتىنە ديسنەيلىك «كۇلشە قىز» (زولۋشكا) ەرتەگىسىنىڭ قازاق تىلىندەگى كورسەتىلىمى تۇساۋىن كەستى. بۇل وسىمەن قازاق تىلىنە اۋدارىلعان 10-شى گولليۆۋدتىق بلوكباستەر بولىپ سانالادى.
بەس جىلدا اتقارىلعان وسىناۋ ءىس-شارا كورەرمەن ءۇشىن, قازاق ءتىلىن دامىتۋ جولىنداعى ماقسات-مۇددە ءۇشىن كورەرمەندەرگە ۇلكەن ولجا بولىپ تابىلادى. ايتا كەتۋ كەرەك, «مادەنيەت تۋرالى» زاڭعا سايكەس 2012 جىلدىڭ 1 قاڭتارىنان باستاپ پروكات ءۇشىن قازاقستانعا اكەلىنگەن بارلىق فيلمدەر مەملەكەتتىك تىلدە دۋبلياجدالۋى ءتيىس. سونىڭ ءىشىندە گولليۆۋد فيلمدەرىن دۋبلياجداۋدى «بولاشاق» قاۋىمداستىعى «نۇر وتان» پارتياسىنىڭ قولداۋىمەن «جاستار – وتانعا!» اتتى جاستار جوباسى شەڭبەرىندە جۇزەگە اسىرۋدا.
تۋعان تىلىمىزدە جارىق كورگەن العاشقى بلوكباستەرلەردىڭ ءبىرى – «كولىكتەر-2» (تاچكي-2) ءمۋلتفيلمىن 2011 جىلى بالدىرعان كورەرمەندەر تاماشالاۋ مۇمكىندىگىنە يە بولسا, اتالمىش جوبا ەلباسى تاراپىنان جوعارى باعاعا يە بولدى. ءوزىنىڭ بولاشاقتىقتارعا ارناعان تىلەك سوزىندە نۇرسۇلتان نازارباەۆ: «قازاق ءتىلى – تامىرىن تەرەڭگە تارتقان ەرەكشە باي, كوركەم ءتىل. ول بۇگىندە جان-جاقتى دامىپ, حالىقارالىق تىلگە اينالۋ ۇستىندە. بۇل باستاما الداعى ۋاقىتتا دا جالعاسىن تاۋىپ, جاس ۇرپاق يگىلىگىنە جاراي بەرەدى دەپ سەنەمىن», – دەگەن بولاتىن. ال قازىرگى تاڭدا تانىمال بلوكباستەرلەردى قازاق تىلىنە اۋدارىپ, ۇسىنۋ ەلىمىزدى الەمگە تانىتۋداعى تاعى ءبىر ماڭىزدى جوباعا اينالىپ, تىلدەردى دامىتۋ باعدارلاماسى مەن «ماڭگىلىك ەل» جالپىۇلتتىق يدەياسىنىڭ جۇزەگە اسۋىنا ەداۋىر ىقپالىن تيگىزۋدە.
الەمدىك كينويندۋستريا كوشباسشىلارى – Marvel,Walt Disney, Sony Pictures, Metro-Goldwyn-Mayer فيلمدەرى جوعارى تەحنولوگيالىق دۋبلياجدىڭ ناتيجەسىندە ءسوزسىز ۇلتتىق قۇندىلىقتارعا اينالدى. قازاق ءتىلى بارشا الەمگە DVD, Blu-Ray ستاندارتتارىندا قولجەتىمدى گولليۆۋد فيلمدەرىنىڭ نەگىزگى ءتىلىنىڭ قاتارىنا قوسىلدى.
جوبا شەڭبەرىندە دۋبلياج اكتەرلەرى بەرىك ايتجانوۆ (دجونني دەپپ), گۇلناز اۋەسباەۆا (اندجەلينا دجولي), ازامات قاناپيا (ۋيلل سميتت) ايگىلى گولليۆۋد جۇلدىزدارىن دىبىستاۋدىڭ ايرىقشا قۇقىعىنا يە بولدى, دۋبلەرلەردىڭ داۋىسىن اكتەرلەر جەكە وزدەرى بەكىتتى. تۇسىرىلىمىنە BAFTA سىيلىعىنىڭ يەگەرى, ءايگىلى رەجيسسەر كەننەت براندت («تور» جانە «گاملەت») ارنايى شاقىرىلعان بۇل كينوەرتەگىنى الەمگە تانىمال Pinewood Studios پاۆيلوندارىندا ازىرلەۋ شامامەن 250 ميلليون دوللارعا تۇسكەن كورىنەدى. بۇل قازاقستاندىق كورەرمەندەرگە ءتولتۋما نۇسقانىڭ بار عاجابىن جەتكىزە العان دارىندى رەجيسسەر ايجان ءجامشيتوۆانىڭ دۋبلياج جاساۋداعى 7-ءشى گولليۆۋدتىق جۇمىسى ەدى. فيلمدەگى باستى ءرولدى «وسكار» سىيلىعىنىڭ ەكى مارتە يەگەرى كەيت بلانشەتت («اۆياتور», «بەندجامين باتتوننىڭ جۇمباق ءومىرى») سومدادى. كۇلشە قىزدى قازاق تىلىندە شەحنازا قىزىحانوۆا دىبىستادى, ول – ت. جۇرگەنوۆ اتىنداعى ونەر اكادەمياسىنىڭ 3-ءشى كۋرس ستۋدەنتى. شەحنازا جوباعا العاش رەت قاتىسۋدا. كورسەتىلىمدى مەكتەپ وقۋشىلارى, بالالار ۇيلەرىنىڭ ءتاربيەلەنۋشىلەرى, قوعام قايراتكەرلەرى, سونداي-اق باق-تىڭ, «بولاشاق» قاۋىمداستىعى مەن «نۇر وتان» پارتياسىنىڭ وكىلدەرى تاماشالادى.
فيلمدە بويىن ىشتارلىق جايلاعان جانە ارام پايدانى كوكسەگەن ز ۇلىم وگەي شەشە قىزىن ۇنەمى تۇقىرتا بەرەدى. بىراق كۇلشە قىز ءۇمىتىن ۇزبەيدى, وعان اۋىر ساتتەردە اناسىنىڭ: «بەرىك بول جانە جاقسىلىققا سەن!» دەگەن اماناتى كۇش بەرەدى. پەريزات-كىندىك شەشە بىردە كۇلشە قىزعا ءومىرىن جاقسارتۋعا كومەكتەسەدى, الايدا بارلىعى دا باستى كەيىپكەردىڭ وزىنە بايلانىستى. وگەي شەشە كۇلشە قىزدى كەلىسىمگە شاقىرعاندا, ول بۇل ۇسىنىستان تۇبەگەيلى باس تارتادى. ءوزىنىڭ تۋعان پاتشالىعىن ز ۇلىمدىقتان ساقتاپ قالۋ ءۇشىن ونىڭ جۇرەگىن عالامات كۇش كەرنەيدى. كىشكەنتاي جۇرەكپەن پاتشا بولۋ مۇمكىن ەمەس. ناعىز پاتشا بولۋ ءۇشىن مەيىرىمدىلىك جانە ادامدارعا قامقورلىق جاساي ءبىلۋ كەرەك. فيلم جەلىسى وسى ويدى ساناعا سىڭدىرەدى.
اينۇر يمانعالي.
استانا.