جاڭعىرتۋ جونىندەگى ۇلتتىق كوميسسيا قىزمەتىنىڭ الدىن الا قورىتىندىلارىنا ارنالعان كەڭەس ءوتتى, دەپ حابارلادى پرەزيدەنتتىڭ ءباسپاسوز قىزمەتى.
كەڭەستە 5 ينستيتۋتتىق رەفورمانى جۇزەگە اسىرۋدىڭ نەگىزگى باعىتتارى قارالدى. ەلباسى نۇرسۇلتان نازارباەۆ ءتيىستى زاڭ جوبالارىن پارلامەنتتىڭ كۇزگى سەسسياسى باستالعانعا دەيىن قاراۋعا ەنگىزۋ ءۇشىن جان-جاقتى پىسىقتاۋدىڭ ماڭىزدىلىعىن اتاپ ءوتتى. مەملەكەتتىك اپپارات رەفورماسىنىڭ باستى ناتيجەسى ونىڭ جۇمىس تيىمدىلىگىن ارتتىرۋ, كادر ساياساتىندا مەريتوكراتيا تەتىكتەرىن ەنگىزۋ بولۋعا ءتيىس.
مەملەكەت باسشىسى سىبايلاس جەمقورلىقتىڭ الدىن الۋعا ىقپال ەتەتىن ىلكىمدى فاكتور رەتىندە مەملەكەتتىك قىزمەتشىلەردىڭ مورالدىق بەت-بەينەسى مەن ەتيكاسىنا ايرىقشا كوڭىل ءبولگەن ءجون ەكەنىن ايتتى. سونىمەن قاتار, سوت جۇيەسىنىڭ ينستانتسيالارىن وڭتايلاندىرۋ, سۋديالار كورپۋسىنا ۇمىتكەرلەرگە قويىلاتىن تالاپتى قاتايتۋ, القا بيلەر سوتىن قولدانۋ سالاسىنىڭ اياسىن كەڭەيتۋ جونىندەگى شارالار تالقىلاندى. مەملەكەت باسشىسى الەمدىك تاجىريبەنى دايەكتى تۇردە زەردەلەۋدى جانە استانادا حالىقارالىق اربيتراج ورتالىعىن قۇرۋ ءۇشىن قاجەتتى شارالار كەشەنىن ازىرلەۋدى تاپسىردى.
ۇلتتىق كوميسسيا, سونداي-اق, رەسپۋبليكادا ينۆەستيتسيالىق تارتىمدىلىقتى ارتتىرۋ مەن زاڭ ءۇستەمدىگىن قامتاماسىز ەتۋ ارقىلى قولايلى بيزنەس احۋالىن قالىپتاستىرۋ ماسەلەلەرىن دە تالقىلادى.
قازاقستان پرەزيدەنتى مەملەكەتتىڭ تابىستى دامۋىنا سارالانعان جانە ءتيىمدى ەكونوميكالىق ساياسات نەگىز بولاتىنىنا نازار اۋداردى. ەلدە ەكونوميكالىق ءوسىمدى قامتاماسىز ەتۋ ءۇشىن بىرقاتار اۋقىمدى شارالار جۇزەگە اسىرىلىپ جاتقانى اتاپ ءوتىلدى. اتاپ ايتقاندا, نەگىزگى مەملەكەتتىك باعدارلامالار – يندۋستريالىق-يننوۆاتسيالىق دامۋ جانە «نۇرلى جول» ەل ازاماتتارىنىڭ ءال-اۋقاتىن ارتتىرۋعا جانە تۇرمىس جاعدايلارىن جاقسارتۋعا باعىتتالعان.
نۇرسۇلتان نازارباەۆ سالىق, تاريف, ينۆەستيتسيا سالالارىندا جاسالىپ جاتقان قادامدارعا جان-جاقتى قولداۋ كورسەتۋ قاجەتتىگىن, بۇل ولاردىڭ دامۋ باعىتىن تۇبەگەيلى وزگەرتۋى ءتيىستىگىن ايتتى. مەملەكەت باسشىسى ەكونوميكانىڭ ورنىقتى ءوسۋىنىڭ نەگىزگى كوزى بولىپ تابىلاتىن شاعىن جانە ورتا بيزنەسكە قاجەتتى جاعداي جاساۋ ماسەلەسىنە ايرىقشا كوڭىل اۋداردى.
قازاقستان پرەزيدەنتى بولاشاعى ءبىرتۇتاس ۇلت قالىپتاستىرۋ اياسىندا حالقىمىزدىڭ ءداستۇرلى قۇندىلىقتارىن ىلگەرىلەتۋگە ايرىقشا ورىن بەرىلەتىنىن ايتتى. سونىمەن قاتار, ەلدى حالىقارالىق قوعامداستىققا تانىتۋ جۇمىستارىن ودان ءارى جالعاستىرۋ دا ماڭىزدى. مەملەكەت باسشىسى قازاقستاننىڭ زور تۋريستىك الەۋەتىن جۇزەگە اسىرۋدىڭ, ءتيىستى ينفراقۇرىلىمدار جاساۋدىڭ, ساپالى جوبالار ازىرلەۋدىڭ ماڭىزدىلىعىن اتاپ ءوتتى.
ترانسپارەنتتى جانە ەسەپ بەرۋشى مەملەكەت قۇرۋ نەگىزگى رەفورمالاردىڭ ءبىرى بولىپ سانالادى. قازاقستان پرەزيدەنتى مەملەكەتتىك بيلىكتىڭ اشىقتىعىن قامتاماسىز ەتۋ, ونىڭ حالىقپەن ءوزارا ءىس-قيمىل قاعيداتتارىن ازاماتتاردىڭ مۇقتاجدىقتارىن قاناعاتتاندىرۋ ماسەلەسىنە مەيلىنشە كاسىبي تۇرعىدان قاراۋدى قامتاماسىز ەتۋ ءۇشىن قايتا قالىپتاۋ قاجەتتىلىگىن ايتتى.
قازاقستان پرەزيدەنتى 5 رەفورما جانە ۇلت جوسپارى «100 ناقتى قادامدى» جۇزەگە اسىرۋ جونىندەگى بارلىق جۇمىس ونى بۇقارالىق اقپارات قۇرالدارىندا تۇراقتى تۇردە ءتۇسىندىرۋ جانە جاريالاپ-كورسەتۋ ىسىمەن قاتار ءجۇرۋى تيىستىگىن اتاپ كورسەتتى. نۇرسۇلتان نازارباەۆ اتاپ وتكەندەي, رەفورمالار ءاربىر ازاماتتى قامتيتىندىقتان, جۇرت ەلدىڭ قانداي باعىتتا دامىپ جاتقانىن ءبىلۋى جانە وعان بەلسەنە قاتىسۋى ءتيىس.
سونىمەن قاتار, مەملەكەت باسشىسى ساراپشىلىق قوعامداستىق, ازاماتتىق ينستيتۋتتار قازىردىڭ وزىندە تالقىلاۋلار مەن پىكىرتالاستار ارقىلى ۇلت جوسپارىن ءجۇزەگە اسىرۋ ماسەلەسىنە سىندارلى ۇسىنىمدار مەن ۇسىنىستار ەنگىزۋى ءتيىس. پرەزيدەنتتىڭ پىكىرىنشە, مۇنداي جۇمىستى ورتالىقتا عانا ەمەس, وڭىرلەردە دە جۇرگىزگەن ءجون.
كەڭەس بارىسىندا جۇمىس توپتارىنىڭ مۇشەلەرى ۇلتتىق كوميسسيانىڭ قازىرگى قىزمەتى تۋرالى بايانداما جاسادى.
مەملەكەت باسشىسى كەڭەس قورىتىندىسى بويىنشا بىرقاتار ناقتى تاپسىرما بەردى.