استانا. 10 ناۋرىز. قازاقستاننىڭ ماي قۇيۋ ستانسالارىنداعى بەنزيننىڭ باعاسى تاعى دا ارزاندايدى. بۇل تۋرالى «مير 24» ارناسىنىڭ ءتىلشىسى حابارلادى.
«قازاقستاننىڭ جۇرگىزۋشىلەرى بۇدان كەلەتىن پايدانى ەسەپتەپ جاتىر. ماي قۇيۋ ستانسالارىندا بەنزيننىڭ باعاسى ارزاندايدى. قازىر ەڭ تانىمال ماركا – 92-ءشى بەنزينگە اۆتواۋەسقويلار 50 تسەنتتەن بەرەتىن بولادى», - دەدى ارنا ءتىلشىسى الەنا حان.
وسىعان بايلانىستى ەكونوميستەر بەنزيننىڭ 15 تسەنتكە ارزانداۋى مۇناي باعامىنىڭ ءتۇسىپ كەتۋىنەن تۋىنداپ وتىرعانىن ايتادى. بۇل رەسەي ءرۋبلىنىڭ ءتۇسىپ كەتۋىنە دە بايلانىستى بولىپ وتىر. وندا ەڭ تانىمال 92 ماركالى بەنزيننىڭ قۇنى بار-جوعى جارتى دوللار تۇرادى.
«ءرۋبلدىڭ قۇنسىزدانا باستاۋى بەنزيندى تۇتىنۋشىلارعا قۋانىشتى جاڭالىقتار اكەلىپ جاتىر. بەنزين كوپ جىلداردان بەرى ءبىرىنشى رەت ارزانداپ وتىر. ال وتكەن جىلعى جەلتوقساننان بەرى بۇل باعانىڭ ءۇشىنشى مارتە ارزانداۋى بولماق», - دەدى ەكونوميست سەرگەي سميرنوۆ.
ستاتيستيكا كورسەتىپ وتىرعانداي, تەك وڭتۇستىك استانانىڭ وزىندە قازىر تىركەۋگە الىنعان 600 مىڭنان استام كولىك بار ەكەن. سوڭعى جيىرما جىلدا بۇل تسيفر ءۇش ەسەگە جۋىق كوبەيدى. سوندىقتان قالا تۇرعىندارى ءۇشىن بەنزين قاشاننان ءوتىمدى تاۋار بولىپ كەلدى. تەك بيىلعى جىلدىڭ باسىنان بەرى قاراي عانا مۇندا رەسەيدەن ءۇش ءجۇز مىڭ توننانىڭ ۇستىندە بەنزين اكەلىنىپتى. وسىدان كەيىن شەنەۋنىكتەر جينالعان قوردى جەتكىلىكتى ساناپ, كورشى ەلدەن جاعان ماي اكەلۋگە ۋاقىتشا تىيىم سالعان. قازىرگى تاڭدا قازاقستاننىڭ بەنزين قويمالارى اۋزى-مۇرنىنان شىعىپ تۇر. وسى كەزدە جاز شىققانعا دەيىن ەلدەگى بەنزيننىڭ باعاسى بۇدان دا ارزانداي تۇسەتىنىن سەنىممەن ايتا بەرۋگە بولادى.
بۇگىندە رەسپۋبليكادا مۇناي وڭدەۋ زاۋىتتارى قايتا جاڭعىرتىلىپ جاتىر. بۇل پروتسەسس كەلەسى جىلى اياقتالادى. بىرقاتار ساراپشىلاردىڭ ايتۋلارىنشا, سول كەزدە قازاقستان ءوزىن ءوزى بەنزينمەن تولىق قامتاماسىز ەتە الاتىن بولادى.
مۇرات ايتقوجا.