پەتروپاۆل. 21 مامىر. مامىر-كوكونىس پەن جەمىس-جيدەك وتىرعىزۋدىڭ ەڭ قولايلى مەرزىمى سانالعانىمەن, پەتروپاۆلدىق تۇرعىنداردىڭ ساياجايلارعا جەتۋى ءبىر مۇڭ بولىپ وتىر. بۇل تۋرالى egemen ءتىلشىسى حابارلايدى.
ساياجايلارداعى قاربالاس تىرلىك باستالماي جاتىپ جولدىڭ ساپاسىزدىعىنا شاعىمدانعان زەينەتكەرلەر الدىمەن دابىل قاقتى. اسىرەسە, جاۋىن-شاشىندى كۇندەرى ساياجايلار ورنالاسقان جەر تەلىمدەرى ەزىلىپ, كولىك تۇگىل ادامداردىڭ وزدەرى باتپاقتاپ قالاتىن جايتتار ءجيى كەزدەسەدى. شەنەۋنىكتەر بولسا, ساياجاي تۇرماق قالا ىشىندەگى تاس جولداردى جوندەۋگە قارجى تاپشى دەپ قول قۋسىرادى. «سولنەچنايا» ىقشاماۋدانى باعىتىنداعى 800-گە جۋىق ساياجاي يەلەرىنىڭ كورگەن كۇنى وسى.
«ادامنىڭ ءوڭى تۇگىل تۇسىنە ەنبەيتىن مىنانداي ويلى-شۇڭقىرلى, كەدىر-بۇدىرلى جولدارمەن ءجۇرۋ ەش مۇمكىن ەمەس. ساياجايعا جەتە الماي دىڭكەلەپ ءجۇرمىز. جولدىڭ ناشارلىعىنان اپتاسىنا ەكى رەت قاتىنايتىن اۆتوبۋس تا ءجۇرىسىن دوعارعان. ويدىم- ويدىم جولدىڭ كەسىرىنەن اپاتقا ۇشىراي جازداعان. سونىڭ سالدارىنان اجەلەر مەن كولىگى جوقتار قالانىڭ سوڭعى ايالداماسىنان ءتۇسىپ, ساياجايلارعا دەيىن 3-4 شاقىرىم جاياۋ-جالپىلاپ جۇرگەنى», دەيدى تۇرعىندار.
ساياجايشىلار مۇڭدارىن شاعىپ,قالالىق اكىمدىكتىڭ ەسىگىن توزدىرعانىمەن, ونداعىلار اۋىزدارىن قۋ شوپپەن ءسۇرتىپ وتىر. بيىل جەرگىلىكتى قازىنادان ساياجايلارعا كوك تيىن قاراستىرىلماعانىن العا تارتادى. تەك 18 كوشەنىڭ شۇڭقىرلارىن جاماۋعا شامالى قاراجات بولىنسە كەرەك.
قالالىق ساياجايشىلار قوعامىنىڭ توراعاسى ۆيكتور مالينكو ساياجايلارعا جارىق, سۋ تارتىپ, كۇزەتتى كۇشەيتۋگە 21 ميلليون سۇرالعانىمەن, اقشانىڭ ءبولىنۋى ەكىتالاي دەيدى. ويتكەنى, قالا بيۋدجەتى ايتارلىقتاي قىسقارعان.
شەندىلەر اقشا ارتىلسا, ساياجايلارعا اپاراتىن جولداردى جوندەيمىز دەپ ەمەكسىتكەنىمەن, قۇرعاق ۋادەگە ابدەن تويعان ساياجايشىلاردىڭ سەنگىسى جوق.
ءومىر ەسقالي.
دەرەك, سۋرەت: egemen.kz.