استانا. 21 مامىر. جىل باسىنان بەرى ەلىمىزدە 73 ءجاسوسپىرىم ءوز-وزدەرىنە قول سالعان. بۇل جونىندە باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتىنە سىلتەمە جاساپ, zakon.kz حابارلادى.
سوتقا دەيىنگى تەرگەپ-تەكسەرۋ بىرىڭعاي ءتىزىلىمىنىڭ اقپاراتتىق جۇيەسى تاراتقان دەرەكتەرگە سۇيەنسەك, 2015 جىل باستالعالى بەرى قازاقستاندا 1 126 تۇرعىن ءوز-وزدەرىن ولتىرگەن. ولاردىڭ اراسىندا 73-ءى كامەلەتتىك جاسقا تولماعان جەتكىنشەك.
كوميتەت ۇسىنعان ەسەپتە 2013 جىلى جاسوسپىرىمدەر اراسىندا 292 ءوز-وزىنە قول جۇمساۋ دەرەگى تىركەلگەنى ايتىلعان. بىلتىر بۇل سان 192-گە كەمىگەن. بۇل وتكەن جىلى بالالار اراسىندا ءوز-وزدەرىنە قول سالۋ وقيعالارىنىڭ ازايعانىن كورسەتەدى. ال بيىلعى 1 قاڭتار مەن 18 مامىرعا دەيىنگى (4 اي 18 كۇن ىشىندە) ۋاقىت ارالىعىندا 73 جەتكىنشەكتىڭ ءولىمى تىركەلىپ وتىر.
اتالعان اقپاراتتىق جۇيە كەلتىرگەن دەرەكتەر بويىنشا, ەلىمىزدە 18 مامىرعا دەيىن 1 126 سۋيتسيد جاسالسا, وتكەن جىلعى وسى مەرزىمدە 991 ءوز-ءوزىن ءولتىرۋ وقيعاسى تىركەلگەن. ياعني, 2014 جىلمەن سالىستىرعاندا بيىل بۇل دەرتتىڭ ءورشي تۇسكەنى انىق بايقالادى.
بىلتىر ەلىمىزدە 2 957 ادام وزدەرىنە قول سالعان بولسا, 2013 جىلى – 3 251, ال 2012 جىلى – 3 055 سۋيتسيد دەرەگى تىركەلگەن. ستاتيستيكا بويىنشا 35 پەن 44 جاس ارالىعىنداعى ەر ازاماتتار سۋيتسيدكە ءجيى بارادى.
ەلامان قوڭىر.
دەرەك, سۋرەت: zakon.kz.