استانا. 10 ناۋرىز. ارگەنتينانىڭ لا-ريوحا اۋدانىندا اۋەدە تىكۇشاقتار سوقتىعىسىپ, سونىڭ سالدارىنان ەكى ۇشقىش پەن سەگىز فرانتسيا ازاماتى مەرت بولدى. بۇل تۋرالى eurosport.ru حابارلادى.
بۇگىن ەليسەي سارايى ارگەنتيناداعى قايعىلى وقيعادان 8 ازاماتىنىڭ اجال قۇشقانىن راستادى. ولاردىڭ اراسىندا بەلگىلى سپورتشىلار دا بار. ناقتى ايتار بولساق, اپاتتان جۇزۋدەن فرانتسيا وليمپيادالىق قۇراماسىنىڭ مۇشەسى كاميل ميۋففا, بوكسشى الەكسيس ۆاستەن جانە بەلگىلى تەڭىزدە ءجۇزۋشى فلورانس ارتو قازا تاپتى.
كاميل ميۋففا 2012 جىلعى لوندون وليمپياداسىندا التىن (400 م., ەركىن ستيل), كۇمىس (200 م., ەركىن ستيل) جانە قولا مەدال (4ح200 م., ەركىن ستيل) يەمدەنگەن وتە شەبەر سپورتشى. ودان بولەك, 2010 جىلى دۋبايدا وتكەن الەم چەمپيوناتىندا (200., ەركىن ستيل) جەڭىمپاز اتانعان بولاتىن.
الەكسيس ۆاستەننىڭ دە سپورتتاعى اتاق-داڭقى ءبىر باسىنا جەتەدى. سونىڭ اراسىنان بەيجىڭ وليمپياداسىندا العان قولا جۇلدەسى (64 كگ, 2008 ج.) مەن ەۋروپا چەمپيوناتىنىڭ كۇمىس جۇلدەگەرى (69 كگ, ماسكەۋ, 2010 ج.) دەگەن اتاعىن ايتساق جەتكىلىكتى.
ال فلورانس ارتونى سپورتسۇيەر قاۋىمعا تانىستىرىپ جاتۋدىڭ ءوزى ارتىق. ول وسىدان 25 جىل بۇرىن جەرورتا تەڭىزىن جەلكەندى قايىقپەن جالعىز ءوزى 22 ساعاتتا ءجۇزىپ ءوتىپ, الەمدىك رەكورد ورناتقان بولاتىن.
قايعىلى وقيعا كەز كەلگەن قيىن-قىستاۋ جاعدايدان امان شىعۋدىڭ جولدارىن ۇيرەتەتىن رەاليتي-شوۋدىڭ ءتۇسىرىلىمى كەزىندە بولعان. وزگەلەردى امان الىپ قالۋدى كوزدەگەن باعدارلاما تۇبىندە ءوز قاتىسۋشىلارىنىڭ ءومىرىن جالمادى.
تىكۇشاقتار جەردەن نەبارى 100 مەتر بيىكتىكتە تۇيىسكەن. ارقايسىسىندا ءبىر ۇشقىش پەن ءتورت فرانتسۋز بولعان. اپاتتىڭ ناقتى سەبەبى ءالى انىقتالعان جوق.
ەلامان قوڭىر.
دەرەك, سۋرەت: eurosport.ru.