استانا. 10 ناۋرىز. استانادا قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ, رەسەي پرەزيدەنتى ۆلاديمير پۋتين جانە بەلارۋس پرەزيدەنتى الەكساندر لۋكاشەنكو ۇشجاقتى كەزدەسۋ وتكىزەدى. بۇل تۋرالى اقوردا سايتى حابارلادى.
«13 ناۋرىزدا ەلوردادا قازاقستان رەسپۋبليكاسى, بەلارۋس رەسپۋبليكاسى جانە رەسەي فەدەراتسياسى پرەزيدەنتتەرىنىڭ ۇشجاقتى كەزدەسۋىن وتكىزۋ جوسپارلانعان. مەملەكەتتەر باسشىلارى ءۇش ەلدىڭ ءوزارا ساۋداسى مەن ەكونوميكالىق ىقپالداستىعىن ۇلعايتۋ ماسەلەلەرىن قاراستىرادى. سونىمەن قاتار پرەزيدەنتتەر الەمدىك ەكونوميكاداعى ۇردىستەردىڭ دامۋىن جانە ۋكرايناداعى احۋالدى تالقىلايدى», - دەلىنگەن ءباسپاسوز حابارلاماسىندا.
ەسكە سالا كەتەيىك, 2015 جىلدىڭ اقپان ايىندا قازاقستاننىڭ بەلارۋس ەلىندەگى ەلشىسى ەرعالي بولەگەنوۆ پەن وسى ەلدىڭ سىرتقى ىستەر ءمينيسترى ۆلاديمير ماكەي قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ, بەلارۋس پرەزيدەنتى الەكساندر لۋكاشەنكونىڭ جانە رەسەي پرەزيدەنتى ۆلاديمير ءپۋتيننىڭ ۇشجاقتى كەزدەسۋىن تاياۋ ۋاقىتتا استانادا وتكىزۋ مۇمكىندىگىن تالقىلاعان بولاتىن. «سۇحبات بارىسىندا ەكى جاقتى ىنتىماقتاستىق جانە حالىقارالىق الاڭداردا, سونىڭ ىشىندە تمد, ەاەو شەڭبەرىندە ىقپالداستىق ماسەلەلەرى تالقىلاندى. سونىمەن قاتار, جاقىندا جوسپارلانعان قازاقستان, بەلارۋس, رەسەي پرەزيدەنتتەرىنىڭ استانادا ۇشجاقتى كەزدەسۋىنىڭ كۇن ءتارتىبى تۋرالى پىكىر الماسىلدى», - دەلىنگەن ەدى قازاقستان سىرتقى ىستەر مينيسترلىگىنىڭ ءباسپاسوز حابارلاماسىندا.
ساكەن مايلىباي.