اتىراۋ. 10 ناۋرىز. اتىراۋ وبلىسىنىڭ ىشكى ىستەر ورگاندارى وتباسىندا تۇرمىستىق جانجالدار تۋدىرىپ, قۇقىق بۇزۋشىلارعا قارسى «تۇرمىس» جەدەل الدىن الۋ شاراسىن وتكىزدى. بۇل تۋرالى egemen.kz ءتىلشىسى حابارلادى.
اتىراۋدا 2 ناۋرىزدا باستاۋ العان اتالمىش شارا بارىسىندا ۋچاسكەلىك پوليتسيا ينسپەكتورلارى الدىمەن ءوز وتباسىنىڭ تىنىشىن كەتىرىپ, ءتۇرلى قۇقىق بۇزۋشىلىقتار جاساۋعا بەيىمدەر ادامداردى انىقتاۋعا باسا كوڭىل ءبولدى. وبلىستىق ىشكى ىستەر دەپارتامەنتىنىڭ ءباسپاسوز حاتشىسى گۇلنازيرا مۇحتاروۆانىڭ ايتۋىنشا, ۋچاسكەلىك پوليتسيا ينسپەكتورلارى وتباسىلارىندا ءتۇرلى قۇقىق بۇزۋشىلىق جاساعان 30-عا جۋىق ادامدى انىقتاپ, اكىمشىلىك جاۋاپكەرشىلىككە تارتتى. سونىمەن بىرگە, وسى كەزگە دەيىن پوليتسەيلەردىڭ ارنايى ەسەبىنە الىنعانداردىڭ 1 000-نان استامى تۇراقتى مەكەن-جايلارى بويىنشا تەكسەرىلىپ, ولارمەن پروفيلاكتيكالىق جۇمىستار جۇرگىزىلدى.
شارا باراسىندا 63 جاستاعى ازاماتشا ءۇشىنشى مۇشەلگە ەندى تولعان ۇلىنىڭ ىشىمدىككە تويىپ الىپ, ايقاي-شۋ شىعاراتىنىنا شاعىمدانعان. تاعى ءبىر دەرەككە توقتالار بولساق, 36 جاستاعى كەلىنشەك كۇيەۋىنىڭ ۇستىنەن پوليتسياعا شاعىم تۇسىرگەن. وسى شاعىمدى تەكسەرگەن پوليتسەيلەر 45 جاسار كۇيەۋىنىڭ ىشىمدىك ءىشىپ, وتباسىنىڭ بەرەكەسىن قاشىراتىنى انىقتالدى. بۇل ازاماتتىڭ ارەكەتى اكىمشىلىك قۇقىق بۇزۋشىلىق تۋرالى كودەكستىڭ 73-بابىمەن اكىمشىلىك حاتتامانىڭ تولتىرىلۋىنا بىردەن-ءبىر سەبەپ بولدى.
جالپى, اتالعان جەدەل الدىن الۋ شاراسىنىڭ ناتيجەسىندە ىشكى ىستەر ورگاندارىنىڭ ەسەبىنە وتباسىلىق كيكىلجىڭدى تۋدىرعان 50-دەن استام ادام الىندى.
جولداسبەك شوپەعۇل.
دەرەك: اتىراۋ وبلىستىق ىشكى ىستەر دەپارتامەنتى.
سۋرەت: otyrar.kz.