ەليزاۆەتا ءىى وزىنە كەلەتىن سىيلىقتارعا رازى ەمەس

استانا. 2 ءساۋىر. ۇلىبريتانيا پاتشايىمى, 88 جاستاعى ەليزاۆەتا ءىى كورول وتباسىنا كەلەتىن سىيلىقتارعا رازى ەمەس. بۇل تۋرالى gazeta.ru حابارلادى. پاتشايىمعا كەلگەن سوڭعى سىيلىقتاردىڭ ىشىندە تاراق پەن بۇلاق سۋى قۇيىلعان قۇتىلار بار. دەسە دە, ەليزاۆەتا ءىى وزىنە دەيىنگى پاتشا مەن پاتشايىمدارعا بەرىلگەن سىيلىقتار الدەقايدا قۇندى بولعانىن ايتادى. تاياۋدا تاق يەگەرى ۆيندزورداعى كىتاپحاناعا باردى. ول جەردە كورول وتباسىنا ءتيىستى قۇجاتتاردى نومىرلەۋ جوباسىنىڭ اشىلۋىنا قاتىستى. گەورگ ءى, گەورگ ءىى, گەورگ ءىىى, گەورگ ءىV جانە ۆيلگەلم IV كەزىندەگى كىتاپتار مەن حاتتاردى وقىپ, پاراقتاپ كورگەن ەليزاۆەتا ءىى بۇل قۇجاتتاردىڭ قۇندىلىعىنا نازار اۋداردى. كورول وتباسىنا 1812 جىلى پارسى شاحى سىيلاعان ولەڭدەر جيناعىن قولىنا العان ول: «ەندى سىزدەرگە مىناداي سىيلىقتار ەشقاشان كەلمەيدى», – دەدى. بۇل كىتاپتار مەن حاتتار وسىعان دەيىن پاتشا سارايىنىڭ جەرتولەسىندە ساقتالىپ كەلگەنىن ايتا كەتەيىك. سونداي-اق, بۇل كۇنى پارسى شاحى سىيلاعان كىتاپتى پاتشايىم العاش رەت قولىنا ۇستادى. نومىرلەۋ جوباسى كەزىندە 350 مىڭ بەتتى تىركەۋگە الۋ جوسپارلانعان. كەيىن تاريحي قۇجاتتار زەرتتەۋشىلەردىڭ نازارىنا ۇسىنىلماق. جوبانىڭ باستى ماقساتى – گەورگ اۋلەتى كەزىندەگى ۇلىبريتانيا تۋرالى تەرىس پىكىر مەن كوزقاراستى وڭ باعىتتا وزگەرتۋ. بۇگىنگى كۇنگە دەيىن كورول وتباسىنا تيەسىلى بارلىق مالىمەتتىڭ تەك 15 پايىزى عانا جاريالانعان ەكەن. ەلامان قوڭىر. دەرەك: gazeta.ru. سۋرەت: twitter.com.