وسكەمەن. 21 مامىر. شىعىس وڭىرىندە «باسپاسوزگە جازىلۋشىلار كۇنى» اكتسياسىنىڭ سالتاناتتى اشىلۋى ءوتتى. بۇل كۇنى ساعات 10.00-دەن باستاپ گازەت-جۋرنالعا جازىلعان ءار ادام سىيلىق پەن جەڭىلدىككە يە بولدى. ەندى ولار وزدەرىنىڭ كوڭىلى قالاعان گازەتى مەن جۋرنالدارىن تۇراقتى تۇردە الىپ, وقىپ تۇراتىن بولادى. بۇل تۋرالى egemen.kz ءتىلشىسى حابارلادى.
شىعىس قازاقستان اۋماعىندا تارالاتىن رەسپۋبليكالىق, وبلىستىق جانە قالالىق گازەتتەر ءوڭىر تۇرعىندارى اراسىندا كەڭىنەن سۇرانىسقا يە. مۇنى الەكساندر پۋشكين اتىنداعى وبلىستىق كىتاپحانادا وتكەن شاراعا قاتىسۋشىلار قاتارىنىڭ مولدىعىنان اڭعارۋعا بولادى. «قازپوشتا» قىزمەتكەرلەرى مەرزىمدى باسپاسوزگە جازىلۋشى ەسكى دە جاڭا دوستاردى ءتۇرلى سىيلىقتارمەن, جەڭىلدىكتەرمەن ماراپاتتادى. ولاردىڭ ىشىندە ەلىمىزدىڭ باس باسىلىم – «ەگەمەن قازاقستان» رەسپۋبليكالىق گازەتىنە جازىلۋشىلار دا بار.
اكتسيا بارىسىندا وبلىستىق ىشكى ساياسات باسقارماسى باستىعىنىڭ ورىنباسارى ەرنۇر بۋراحان: «مەرزىمدى ءباسپاسوزدىڭ الەمدە, ەل ىشىندە, وڭىردە بولىپ جاتقان وقيعالار تۋرالى شىنايى, جان-جاقتى اقپاراتپەن قامتۋداعى ءرولى زور. قازىرگى ۋاقىتتا ەلەكتروندى اقپارات كوزدەرىنىڭ كوپتىگىنە قاراماستان, وقىلىمدى گازەت پەن جۋرنالدىڭ ماڭىزى ارقاشان جوعارى. سوندىقتان ءوڭىرىمىزدىڭ تۇرعىندارى اراسىندا دا گازەت-جۋرنالعا دەگەن سۇرانىس ازايمايتىنىنا سەنەمىز», – دەدى.
ايتا كەتەيىك, شىعىس قازاقستاندا 102 مەرزىمدى ءباسپاسوز وبلىس حالقىن اقپاراتپەن قامتاماسىز ەتۋدە. ولاردىڭ ارقايسىسىنىڭ ونلاين نۇسقالارى بار. مەرزىمدى باسپاسوزگە ەكىنشى جارتىجىلدىققا جازىلۋعا ارنالعان جەڭىلدىكتەر 20 مامىردان 23 مامىرعا دەيىن بارلىق پوشتا بولىمشەلەرىندە جالعاسادى.
دۋمان اناش.
دەرەك: egemen.kz.
سۋرەت: شىعىس قازاقستان وبلىسىنىڭ اقپارات ورتالىعى.