استانا. 9 ناۋرىز. بۇگىن ورتالىق سايلاۋ كوميسسياسىندا قازاقستان رەسپۋبليكاسىنىڭ پرەزيدەنتتىگىنە كانديدات ءۋاليحان قايساروۆ مەملەكەتتىك ءتىلدى مەڭگەرۋ دەڭگەيىن انىقتاۋ جونىندەگى لينگۆيستيكالىق كوميسسيا سىنىنان ءسۇرىندى. بۇل تۋرالى «قازاقپارات» حابارلادى.
«ءۋاليحان قايساروۆ سىناق بارىسىندا «تاۋەلسىز مەملەكەتتەردىڭ دوستاستىعى: تاريحى مەن بۇگىنى» اتتى تاقىرىپتا شىعارما جازدى. مەنىڭ تاڭقالىپ وتىرعانىم, ءۋاليحان ءابىش ۇلى تاقىرىپتى تۇسىنبەدى. ول ءوز شىعارماسىندا رەسەيگە بوداندىق, قازاقستاننىڭ قىتايمەن تاتۋ قارىم-قاتىناسىمىز تۋرالى جازعان. ۇمىتكەر شىعارمادا 23 قاتە جىبەردى. اتاپ ايتساق, تىنىس بەلگىسىنەن - 11, ەمىلەدەن - 5, ستيليستيكالىق 7 قاتە كەزدەستى. ەلىمىزدىڭ پرەزيدەنتى ەڭ ساۋاتتى ادام بولۋى ءتيىس», - دەدى لينگۆيستيكالىق كوميسسيا توراعاسى مىرزاتاي جولداسبەكوۆ.
«ءسىز ەكىنشى كەزەڭدە ءى.ەسەنبەرليننىڭ «الماس قىلىشىن» وقىدىڭىز. بىراق مەن ءبىر سۇراق قويىپ ەدىم, ءسىز ءوزىڭىز وقىعان ماتىندە نە ايتىلعانىن تۇسىنبەدىڭىز. ءماتىن ىشىندە جازۋشى قولدانعان بىرقاتار قازاقتىڭ بايىرعى ادەمى سوزدەرى بار. جىلىشىراي, تارتۋ-تارالعى, قىرعي-قاباق, سويىلىن سوعۋ دەگەن سياقتى سوزدەردى سۇراپ ەدىم, ماعىناسىن ءتۇسىندىرىپ ايتا المادىڭىز», - دەپ جالعادى ءسوزىن كوميسسيا توراعاسى.
ونىڭ اتاپ وتۋىنشە, كانديدات ءۇشىنشى كەزەڭدە ءوزى اينالىسىپ جۇرگەن كەنەسارى حان توڭىرەگىندە ءسوز قوزعاۋى ءتيىس بولعان. بىراق ول تاشەنوۆ جايىندا, جەلتوقسان وقيعاسى تۋرالى جانە قىزمەت ەتىپ جۇرگەن كەزىندەگى قيىندىقتار جايىندا اڭگىمە ايتقان.
«بىراق ءبىزدىڭ كوميسسيا مۇشەلەرىنىڭ تاڭ قالعانى, ءوزىڭىز قولىڭىزبەن ورتالىق سايلاۋ كوميسسياسىنا جازعان وتىنىشىڭىزدە باسقا مەملەكەتتىڭ ازاماتتىعىندا تۇرمىن دەپ جازىپسىز. بۇگىن وسك بۇل تۋرالى مالىمدەمە جاسادى. ءوزىڭىزدىڭ قولىڭىزبەن جازىلعان ومىرباياندىق دەرەكتە وتە دورەكى قاتەلىكتەر جىبەرگەنسىز. قازاقستان رەسپۋبليكاسىنىڭ اۋماعىندا «تۋعاننان تۇرامىن» دەپ جاۋاپ بەرەسىز. سوڭىندا تولتىرعان كۇنىڭىزدى جازىپسىز. ناۋرىز ءسوزىن «ناۋىرىز» دەپ قاتە جازاسىز. كوميسسيانىڭ قورىتىندىسى قايساروۆ ءۋاليحان ءابىش ۇلى زاڭ تالاپ ەتىپ وتىرعانداي قازاق ءتىلىن جان-جاقتى ەركىن مەڭگەرمەگەن», - دەدى م.جولداسبەكوۆ.
ناتيجەسىندە لينگۆيستيكالىق كوميسسيا ۋ.قايساروۆتى مەملەكەتتىك ءتىلدى ەركىن مەڭگەرمەگەن دەپ تاپتى.
مۇرات ايتقوجا.
دەرەك: قازاقپارات.