پەتروپاۆل. 2 ءcاۋىر. تارتىپتىك كەڭەستىڭ وتىرىسىندا زاڭ تالاپتارىن بۇزعان بىرنەشە شەنەۋنىك جاۋاپكەرشىلىككە تارتىلىپ, وزىنە دە, قاراماعىنداعىلارعا دا زاڭسىز سىياقى جازعان بىرەۋىن قىزمەتىنەن بوساتۋعا شەشىم الدى. بۇل تۋرالى مەملەكەتتىك قىزمەت ىستەرى جانە سىبايلاس جەمقورلىققا قارسى ىس-قيمىل دەپارتامەنتىنىڭ ءباسپاسوز قىزمەتى حابارلادى.
وبلىس پروكۋرورىنىڭ كومەكشىسى سامات تەمىرباەۆ ءۋاليحانوۆ اۋدانىنىڭ ءومىرتاسوۆ دەگەن تۇرعىنىنىڭ 2014 جىلدىڭ قاڭتار-مامىر ايلارى ارالىعىندا زەينەتاقى تولەۋ ورتالىعىنان 80 مىڭ تەڭگەنى زاڭسىز الىپ كەلگەنىن مالىمدەدى. تەرگەۋ بارىسى كورسەتكەندەي, ول 10 كۇن بويى سەبەپسىز كەلمەگەندىكتەن, «جۇمىسسىزدار» ەسەبىنەن شىعارىلعان. الايدا, ول جونىندە زەينەتاقى تولەۋ ورتالىعىنا حابارلانباعان. ناتيجەسىندە اۋداندىق جۇمىسپەن قامتۋ جانە الەۋمەتتىك باعدارلامالار ءبولىمى باسشىسىنىڭ ورىنباسارى گۇلجان قادىروۆا كىنالى دەپ تانىلعان. وعان قىزمەتىنە تولىق سايكەس كەلمەيتىنى ەسكەرتىلدى.
«جامبىل اۋداندىق اۋىل شارۋاشىلىعى ءبولىمىنىڭ باسشىسى تالعات ناۋرىزباەۆ بۇرىن قىزمەتتىك جالعان قۇجاتتار جاساعان قىلمىستىق ىسكە قاتىسى بار مالدارىگەرلىك ستانتسيا ديرەكتورىنىڭ ورىنباسارى گۇلنار حاسەنوۆاعا باسشىنىڭ مىندەتىن جۇكتەگەن. ول بولسا, قىزمەت بابىن اسىرا پايدالانىپ, سىبايلاس جەمقورلىق زاڭنامالارىن اياققا باسقان. اتاپ ايتقاندا, كونستيتۋتسياسى مەرەكەسى دەگەن جەلەۋمەن 2014 جىلى 10 قىركۇيەكتە زاڭسىز بۇيرىق شىعارىپ, وزىنە 100 مىڭ تەڭگە, باس بۋحگالتەر افاناسەۆاعا 135 مىڭ تەڭگە, ال قازاقستان حالقى بىرلىگى كۇنى قارساڭىندا بۋحگالتەرگە 40 مىڭ تەڭگە سىياقى جازعان. ودان ءارى ەشقانداي بۇيرىقسىز راسىمدەمەستەن باس بۋحگالتەردىڭ مىندەتىن اتقاردى دەگەن سەبەپتى العا تارتىپ, بۋحگالتەردى 200 مىڭ تەڭگەمەن جارىلقاپ تاستاعان»,– دەپ جازىلعان اۋدان پروكۋرورى شوقان قۇلتانوۆتىڭ حابارلاماسىندا.
تارتىپتىك كەڭەس مۇشەلەرى ت. ناۋرىزباەۆقا ەسكەرتۋ بەرۋ, گ. حاسەنوۆانى جۇمىستان بوساتۋ تۋرالى ۇيعارىمدى ءبىراۋىزدان قولدادى.
ءومىر ەسقالي.
دەرەك: مەملەكەتتىك قىزمەت ىستەرى جانە سىبايلاس جەمقورلىققا قارسى كۇرەس ءىس-قيمىل دەپارتامەنتىنىڭ ءباسپاسوز قىزمەتى.
سۋرەت: egemen.kz