قوستاناي. 2 ءساۋىر. ۇلى وتان سوعىسىندا قازا تاپقان قوستانايلىق جاۋىنگەر قاسىم احمەتوۆتىڭ كەڭەس وداعىنىڭ باتىرى اتاعىنا ۇسىنىلعانى 72 جىلدان كەيىن بەلگىلى بولدى. ونى بوزداقتىڭ تۋىستارى پودولك قالاسىنداعى رەسەيدىڭ قورعانىس مينيسترلىگى ارحيۆىنەن تاپتى. بۇل تۋرالى egemen.kz ءتىلشىسى حابارلادى.
ماراپاتتاۋ قاعازىندا بەلورۋس مايدانى, 63-ارميانىڭ, 41-اتقىشتار ديۆيزياسى, 244-اتقىشتار پولكى, 2-اتقىشتار روتاسىنىڭ بولىمشە كومانديرى, كىشى سەرجانت كىشى سەرجانتى قاسىم احمەتوۆتىڭ كەڭەس وداعىنىڭ باتىرى اتاعىنا ۇسىنىلعانى ايتىلادى. 1943 جىلى 30 جەلتوقساندا ۇسىنىلعان ماراپاتتاۋ قاعازىندا: «جولد. احمەتوۆ 244-اتقىشتار پولكى قۇرىلعاننان باستاپ, بارلىق ۇرىستارعا بەلسەندى قاتىستى. 1943 جىلى 26 شىلدەدە حاتەتوۆو تەمىر جول ستانساسىنىڭ ماڭىندا نەمىستىڭ ارتيللەريا جانە پۋلەمەت كۇشىنە قارسى ۇرىستا «وتان ءۇشىن», «ستالين ءۇشىن» دەگەن ۇرانمەن روتانى جاۋعا قارسى كوتەرىپ, تەمىر جول ستانساسىن العاندا, ءبىرىنشى بولىپ جەتكەن. ءوز ەرلىگىمەن احمەتوۆ وسى شايقاستا نەمىستى جەڭگەنى ءۇشىن قىزىل تۋ وردەنىمەن ماراپاتتالدى.
1943 جىلدىڭ 23 جەلتوقسانىندا مالىي كوزلوۆيچي سەلوسىنىڭ اۋماعىندا نەمىس اسكەرلەرى تانك پەن زەڭبىرە كۇشتەرىنىڭ قولداۋىمەن ىڭعايلى مەجەنى (زيرات اۋماعى) الۋعا تىرىستى. 17 ادامنان قۇرالعان احمەتوۆ باسقارعان توپ 3 ساعات بويى تولىق قامالدا 6 رەت جاياۋ اسكەرمەن, تانك جانە زەڭبىرەكتەر قولداۋىمەن نەمىس شابۋىلىنا تويتارىس بەرە ءبىلدى. بۇل شايقاستا 100-دەن استام نەمىس جاۋىنگەرىن جويىپ, 3 كۇن بويى سۇراپىل قاندى شايقاستا الىنعان ماڭىزدى مەجە جاۋعا بەرىلمەدى. وتان ءۇشىن جاساعان ەرلىگىنە احمەتوۆ جولداس كەڭەس وداعىنىڭ باتىرى اتاعىنا ۇسىنۋعا لايىقتى» دەپ جازىلعان. ءوتىنىشتىڭ سوڭىنا 244-اتقىشتار پولكىنىڭ كومانديرى م.ۆ..كولەسوۆ پەن 41-اتقىشتار ديۆيزياسىنىڭ گەنەرال-مايورى ا.ي.سۋرچەنكو قولدايتىندىعىن قولداپ, قول قويعان.
وسى ماراپاتتاۋ قاعازى اسكەري مەكەمەلەردە قارالماعان. ونىڭ نە سەبەپتى جوعارى ساتىعا جەتپەي قالعانى بەلگىسىز. 1945 جىلى 16 ساۋىرىندەگى شايقاستا اۆتوموتشىلار ۆزۆودىنىڭ كومانديرى قاسىم احمەتوۆ قازا تابادى. ونىڭ سۇيەگى گەرمانيانىڭ براندەنبۋرگ جەرىندەگى ودەردەگى فرانكفۋرت وكرۋگىنىڭ زەەلوۆ اۋدانى لەبۋس ەلدى مەكەنىندە جەرلەنگەن.
قاسىم احمەتوۆ قوستاناي وبلىسى مەڭدىعارا اۋدانىنداعى تولەڭگىت اۋىلىندا 1917 جىلى تۋعان. 1939 جىلى قىزىل ارميا قاتارىنا الىنىپ, سوعىسىنا قاتىسادى. ۇلى وتان سوعىسى باستالعان سوڭ مايدانعا اتتانادى. قاسىم قىزىل تۋ وردەنىنەن باسقا ءى دارەجەلى « ۇلى وتان سوعىسى» وردەنىمەن, 3-دارەجەلى «داڭق» وردەنىمەن ماراپاتتالعان. وسىنىڭ بارلىعى دا جيىرمانىڭ ىشىندە قىرشىنىنان قيىلعان باتىر بوزداقتىڭ ەرلىك ىستەرىن بەينەلەدى.
ءنازيرا جارىمبەتوۆا.
دەرەك, سۋرەت: egemen.kz.