استانا. 2 ءساۋىر. «لەۆادا» ورتالىعى جۇرگىزگەن ساۋالناما ناتيجەسى بويىنشا, رەسەي حالقىنىڭ جارتىسىنا جۋىعى (45 پايىزى) ءستاليننىڭ قۋعىن-سۇرگىن ساياساتىن اقتاپ شىقتى. بۇل تۋرالى interfax.ru حابارلادى.
ولار سولاقاي ساياساتتىڭ ارقاسىندا ۇلى ماقساتتار ورىندالىپ, بيىك بەلەستەردى باعىندىردىق دەپ سانايدى. ال 41 پايىزى جازىقسىز جانداردى جاپپاي قىرىپ-جويعان جۇيەنى ەشقاشان اقتاپ الۋعا بولمايتىنىن ايتقان.
سونىمەن قاتار ساۋالناماعا قاتىسۋشىلار ءستاليننىڭ ءولىمى تۋرالى دا ءوز پىكىرلەرىن ءبىلدىردى. ولاردىڭ 46 پايىزى يوسيف ءۆيسساريونوۆيچتىڭ ءولىمىن حالىقتى جاپپاي قۋعىن-سۇرگىنگە دۋشار ەتكەن لاڭكەستىك وقيعانىڭ اياقتالۋى دەپ سانايدى. ال 24 پايىزى حالىق ۇلى كوسەمى مەن ۇلت ۇستازىنان ايىرىلدى دەگەن.
الەۋمەتتانۋشىلاردىڭ ايتۋىنشا, رەسەيدە ستالين تۋرالى جاقسى پىكىردەگى جاندار 39 پايىزدى قۇرايدى. سونداي-اق, سوڭعى 15 جىلدا بۇرىنعى كسرو باسشىسىن جەك كورۋشىلەردىڭ قاتارى ازايعان. ماسەلەن, ونى جاۋىز سانايتىندار 2001 جىلى 27 پايىزدى قۇراسا, قازىر مۇنداي جاندار 14 پايىزعا عانا جەتەدى. ودان بولەك, رەسەيلىكتەردىڭ 6 پايىزى ءالى كۇنگە ءستاليننىڭ اتىن ەستىسە, قورقاتىندارىن ايتقان. دەگەنمەن, مۇنىڭ ءوزى 2001 جىلمەن سالىستىرعاندا 10 پايىزعا ازايعان.
ۋاقىت وتكەن سايىن ستالين تۋرالى دەرەكتەرگە ەش قىزىقپايتىن حالىقتىڭ قاراسى ارتىپ كەلەدى. وسىدان 14 جىل بۇرىن بۇل كورسەتكىش 12 پايىزدى قۇراسا, بۇگىندە رەسەيلىكتەردىڭ 30 پايىزى بۇرىنعى باسشىلارى تۋرالى مالىمەتتەرگە اسا ءمان بەرمەيتىنىن ايتقان.
ەلامان قوڭىر.
دەرەك: interfax.ru.
سۋرەت: haqqin.az.