استانا. 7 ناۋرىز. ەستونيادا وتكەن مانەرلەپ سىرعاناۋدان جاسوسپىرىمدەر اراسىنداعى الەم چەمپيوناتىندا سپورتشىمىز ەليزابەت تۇرسىنباەۆا ءتورتىنشى ورىن الدى. بۇل تۋرالى egemen.kz حابارلادى.
قىسقا باعدارلاما بويىنشا سايىستا ول 55,95 ۇپاي جيناپ, جارىستىڭ العاشقى بولىگىن جەتىنشى ورىنمەن اياقتاعان ەدى. كەلەسى ەركىن باعدارلاما بويىنشا باسەكەدە ەليزابەت بارلىق جاتتىعۋىن ءمىنسىز ورىنداپ شىقتى. سونىڭ ناتيجەسىندە, تورەشىلەر تۇرسىنباەۆانىڭ ونەرىن 117,49 ۇپايمەن باعالادى. بۇرىن-سوڭدى ءبىزدىڭ قىز ەركىن باعدارلامادا مۇنداي ناتيجە كورسەتپەگەن ەدى. وسى ۇپايمەن ول بۇل سىندا ءتورتىنشى ورىنعا تابان تىرەدى. ەركىن باعدارلامادا 124,49 ۇپايمەن رەسەيلىك ەۆگەنيا مەدۆەدەۆا ءبىرىنشى ورىن السا, جاپونيالىق ۆاكابا حيگۋچي ەكىنشى ساتىعا جايعاستى (124,30 ۇپاي). ال تاعى ءبىر رەسەي سپورتشىسى سەرافيما ساحانوۆيچ 123,06 ۇپايمەن ۇزدىك ۇشتىكتى تۇيىندەدى.
قوس سايىس قورىتىندىسى بويىنشا ە.مەدۆەدەۆا الەم چەمپيونى اتاندى (192,97 ۇپاي). كۇمىس جۇلدە جەنيانىڭ وتانداسى س.ساحانوۆيچكە بۇيىردى (186,15 ۇپاي). ال كۇنشىعىس ەلىنىڭ وكىلى ۆ.حيچۋچي قولا مەدالعا قول جەتكىزدى (185,57 ۇپاي).
جالپىەسەپتە 173,44 ۇپاي جيناعان ەليزابەت بيىلعى الەم چەمپيوناتىن 4-ورىنمەن اياقتادى. ەكى باعدارلاما بويىنشا جيعان ۇپاي دا ءبىزدىڭ قىز ءۇشىن جەكە رەكوردتىق كورسەتكىش ەكەنىن ايتا كەتەيىك.
تۇرسىنباەۆانىڭ ءتورتىنشى ورىنى كەلەسى جىلعى جاسوسپىرىمدەر اراسىنداعى الەم چەمپيوناتىنا ەكى جولداما الىپ بەردى. ياعني, كەلەسى جىلى ۆەنگريانىڭ دەبرەتسەن قالاسىندا وتەتىن جاسوسپىرىمدەر اراسىنداعى الەمدىك دوداعا ەكى قىزىمىزدى قاتىستىرۋعا مۇمكىندىك بار. سونداي-اق, ءبىزدىڭ قىز 2016 جىلى نورۆەگيانىڭ ليللەحاممەر قالاسىندا وتەتىن جاسوسپىرىمدەر اراسىنداعى ءىى قىسقى وليمپيادا ويىندارىنا جولداما جەڭىپ الدى. سوندىقتان ەليزابەتتىڭ ەستونياداعى ناتيجەسى اۋىز تولتىرىپ ايتارلىقتاي كورسەتكىش دەۋگە تولىق نەگىز بار.
ايتا كەتەر جايت, اقپان ايىندا 15 جاسقا تولعان مانەرلەپ سىرعاناۋشى قىزىمىز الداعى كۇزدەن باستاپ ەرەسەكتەر اراسىنداعى سايىستارعا قاتىسۋعا مۇمكىندىك الدى.
ەلامان قوڭىر.
دەرەك: egemen.kz.
سۋرەت: youtube.com.