ورتالىق كوممۋنيكاتسيالار قىزمەتىندە اۋىل شارۋاشىلىعى ۆيتسە-ءمينيسترى ساپارحان وماروۆ ءباسپاسوز ءماسليحاتىن وتكىزدى. ول بۇگىنگى تاڭدا اۋىل شارۋاشىلىعى ەڭبەككەرلەرىنىڭ ەگىس ناۋقانىنا دايىندىعى جونىندە ايتتى.
كوكتەم ەرتە كەلەتىن وڭتۇستىك وڭىردە دالا جۇمىستارى باستالىپ تا كەتىپتى. وسىنى ايتقان ۆيتسە-مينيستر بيىلعى جىلى اۋىلشارۋاشىلىق داقىلدارى 21,5 ملن. گەكتار القاپقا ەگىلەتىنىن جەتكىزدى. ءداندى داقىلدار 15,2, ونىڭ ىشىندە بيداي 12,2 ملن. گەكتارعا سەبىلەتىن كورىنەدى. ال, وسىمدىك شارۋاشىلىعىن ءارتاراپتاندىرۋ بويىنشا جۇمىستى كۇشەيتۋ ماقساتىندا مينيسترلىك بىرقاتار شارالار قابىلداپتى. ماسەلەن, بيداي ءوندىرىسىن سۋبسيديالاۋ نورمالارى قىسقارتىلىپ, قوسىمشا بولىنگەن قاراجات ەسەبىنەن وزگە باسىم داقىلدارعا كوتەرىڭكى سۋبسيديا نورماتيۆتەرى بەلگىلەنگەن. كەيبىر ساندارعا زەر سالساق, بيىل بيداي القاپتارى – 235, كۇرىش 8,5 مىڭ گەكتارعا قىسقارىپتى. سونىڭ ەسەبىنەن ءداندى-جەم, بۇرشاقتى جانە جارما داقىلدارىنىڭ القابى 104 مىڭ گەكتارعا ۇلعاياتىن بولادى. مايلى داقىلداردى 2,2 ملن. گەكتارعا, جەمشوپ داقىلدارىن وتكەن جىلعى دەڭگەيدەن 349 مىڭ گەكتارعا وسىرە وتىرىپ, 3,7 ملن. گەكتارعا جۋىق القاپتا ورنالاستىرۋ كوزدەلىپتى.
بيىلعى جىلى كوكتەمگى دالا جۇمىستارىن جۇرگىزۋگە, شارۋالاردى ودان ءارى نەسيەلەندىرۋگە 60 ملرد. تەڭگە كولەمىندە بيۋدجەتتىك نەسيە بولىنگەن. بۇل بىلتىرعى 20 ملرد. تەڭگەگە ارتىق. كورسەتىلگەن قاراجات قارىز تۇرىندە ەكىنشى دەڭگەيلى بانكتەر مەن ازىق-ت ۇلىك كەلىسىم-شارت جانە اگرارلىق نەسيە كورپوراتسيالارى ارقىلى بەرىلەدى. سونداي-اق, بۇگىندە بارلىق اۋىل شارۋاشىلىعى تاۋارلارىن وندىرۋشىلەر تۇقىممەن قامتاماسىز ەتىلگەن. «وبلىستىق اۋىل شارۋاشىلىعى باسقارمالارىنىڭ دەرەكتەرى بويىنشا, 2,2 ملن. توننا تۇقىم ساقتالدى, بۇل قاجەتتىلىكتىڭ 94 پايىزىن قۇرايدى. دەسەك تە, اقتوبە, باتىس قازاقستان, قوستاناي جانە سولتۇستىك قازاقستان وبلىستارىندا 162,5 مىڭ توننا كولەمىندە ءداندى داقىلدار تۇقىمىنىڭ تاپشىلىعى بولعان. ايتسە دە, تاپشىلىق وبلىسىشىلىك, وبلىسارالىق الماسۋ جانە بيدايدى فورۆاردتىق ساتىپ الۋ باعدارلاماسى ەسەبىنەن 100 پايىزعا تولتىرىلدى. ال, قاجەتتى ديزەل وتىنىنىڭ كولەمى 366 مىڭ توننا مولشەرىندە. وپەراتورلاردىڭ شىعىندارىن ەسكەرگەندە اۋىل شارۋاشىلىعى تاۋارلارىن وندىرۋشىلەر ءۇشىن ديزەل وتىنىنىڭ ورتاشا باعاسى ليترىنە 81 تەڭگەنى قۇرايدى», دەدى س.وماروۆ.
ەگىس ناۋقانىنا كەرەك تەحنيكانىڭ ازىرلىگى دە كوڭىل كونشىتەرلىك. وسى كەزدە رەسپۋبليكادا 154 مىڭ تراكتور, 90 مىڭ دانسەپكىش, 334 مىڭ توپىراق وڭدەۋ قۇرالى, 5 مىڭ بۇرىككىش, 3,4 مىڭ زاماناۋي جوعارى ءونىمدى سەبۋ كەشەنى بار. ۆيتسە-ءمينيستردىڭ سوزىنە يلانساق, ناۋقاندى جاقسى وتكەرۋگە وسى تەحنيكالار جەتكىلىكتى. شارادا بيداي ەكسپورتى دا نازاردان تىس قالمادى. «2014-2015 جىلدارعا قازاقستاننىڭ ەكسپورتتىق الەۋەتى 7 ملن. توننا دەڭگەيىندە جوسپارلانىپ وتىر. بۇگىندە 4,7 ملن. توننا جونەلتىلدى, بۇل استىق ءداستۇرلى باعىتتاردا ەكسپورتتالدى. نەگىزىنەن, بيداي ورتالىق ازيا, ازەربايجان, يران, اۋعانستان, قىتاي ەلدەرىنە جىبەرىلدى. مۇنىمەن بىرگە, 1,1 ملن. توننا كولەمىندە ۇن ەكسپورتتالدى. ەندى تاياۋ شىعىس باعىتىنداعى پەرسپەكتيۆاعا توقتالسام, نەگىزىنەن ءبىزدىڭ استىقتى يران جاعى تاسىمالدايدى. وسى ورايدا اتالعان ەلگە دەيىنگى تەمىرجولدىڭ قۇرىلىسىنا بايلانىستى بيىل ەكسپورت كولەمى ەكى ەسەگە ارتادى دەپ ۇمىتتەنەمىز», دەدى ءمينيستردىڭ ورىنباسارى.
ەلىمىزدە باۋ-باقشا مەن جەمىس-جيدەك ءوندىرۋ سالاسىنداعى جۇمىستار جونىندە قويىلعان سۇراققا: «قازاقستان جەمىس-جيدەكپەن ءوزىنىڭ ىشكى نارىعىن 80 پايىزعا قامتاماسىز ەتىپ وتىر. بۇل – وتە جاقسى كورسەتكىش», دەپ جاۋاپ بەردى س.وماروۆ. ءوز ەلىمىزدىڭ استانا بازارلارىنداعى جەمىس-جيدەكتەرىنىڭ كولەمى مەن ۇلەسى قانداي ەكەنىن بىلەتىن جۋرناليستەر ۆيتسە-مينيستردىڭ بۇل جاۋابىنا كۇمانمەن قارادى.
نۇرباي ەلمۇراتوۆ,
«ەگەمەن قازاقستان».