استانا. 26 تامىز. قازاقستان پرەزيدەنتى مەن پاكستان پرەمەر-ءمينيسترى كەلىسسوزدەردىڭ قورىتىندىسى بويىنشا بىرلەسكەن ءباسپاسوز بريفينگىن وتكىزدى. بۇل تۋرالى akorda.kz حابارلادى.
بريفينگتە قازاقستان پرەزيدەنتى كەلىسسوزدەر بارىسىندا ەكىجاقتى ىنتىماقتاستىقتىڭ كەڭ اۋقىمداعى ماسەلەلەرى قوزعالعانىن جانە ءوڭىردىڭ احۋالى, سونىڭ ىشىندە اۋعانستان مەن تاياۋ شىعىستاعى جاعدايدىڭ تالقىلانعانىن اتاپ ءوتتى.
مەملەكەت باسشىسى كولىك-ترانزيت سالاسىنداعى ىقپالداستىقتى دامىتۋعا ايرىقشا كوڭىل بولىنگەنىن, ەكى ەلدىڭ تاۋار اينالىمى دەڭگەيىن ارتتىرۋدىڭ وسىعان بايلانىستى ەكەنىن ايتتى. «قازاقستاننىڭ «نۇرلى جول» باعدارلاماسى مەن قىتايدىڭ «جىبەك جولىنىڭ ەكونوميكالىق بەلدەۋى» جانە قاراقورىم جولى مەملەكەتتەر اراسىنداعى ىنتىماقتاستىقتى جانداندىرۋعا سەپتىگىن تيگىزەدى دەپ سانايمىن. سونىمەن بىرگە, قازاقستان-تۇرىكمەنستان-يران تەمىرجولى پاكستاننىڭ تەڭىز پورتتارىنا شىعۋعا جول اشادى. وسى كولىك بايلانىستارى بىزگە ساۋدا جانە ەكونوميكالىق قارىم-قاتىناستاردى جاقسارتۋعا مۇمكىندىك بەرەدى», – دەدى قازاقستان پرەزيدەنتى.
نۇرسۇلتان نازارباەۆ ونەركاسىپكە, فارماتسەۆتيكاعا, ەنەرگەتيكاعا, اسكەري-تەحنيكالىق سالاعا, عىلىمعا جانە باسقا دا ماڭىزدى باعىتتارعا قاتىستى قازاقستان مەن پاكستاننىڭ ناقتى قادامدارى تۋرالى ۋاعدالاستىققا قول جەتكىزىلگەنىن ايتتى.
قازاقستان پرەزيدەنتى اۋىل شارۋاشىلىعى ونىمدەرىن وڭدەۋ, حيميا جانە جەڭىل ونەركاسىپ, بانك سەكتورى سياقتى سالالاردا ىنتىماقتاستىقتى جولعا قويۋ ماقساتىندا ىسكەرلىك كەڭەس قۇرىلعانىنا دا توقتالىپ ءوتتى. سونىمەن قاتار, پاكستان پرەمەر-ءمينيسترى دەلەگاتسياسىنىڭ قۇرامىندا ىسكەر توپ وكىلدەرى دە كەلدى.
مەملەكەت باسشىسى پاكستان ن.ءشاريفتىڭ باسشىلىعىمەن ەكونوميكالىق ءوسىم قارقىنىن ۇدەتىپ, الەمدىك ساياساتتاعى سالماقتى ورنى بار ەلگە اينالىپ كەلە جاتقانىن اتاپ ءوتتى.
نۇرسۇلتان نازارباەۆ ازياداعى ءوزارا ءىس-قيمىل جانە سەنىم شارالارى كەڭەسىن وتكىزۋ, «ەكسپو-2017» كورمەسىن وتكىزۋ قۇقىعى ءۇشىن داۋىس بەرۋ, قازاقستاننىڭ دسۇ-عا كىرۋى ماسەلەلەرىنە قاتىستى ءبىزدىڭ ەلىمىزدى پاكستاننىڭ قولداعانىنا جانە بۇگىنگى تاڭدا قازاقستاننىڭ بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە كانديداتۋراسىن دا قولداپ وتىرعانىنا نازار اۋداردى. وسىعان وراي مەملەكەت باسشىسى پاكستان تاراپىنا زور العىس ءبىلدىردى.
پاكستان پرەمەرى جىلى قابىلداۋ مەن قوناقجايلىق ءۇشىن العىس ايتىپ, جاڭا ەلوردا – استانا قالاسى قازاقستاننىڭ ىلگەرىلەۋى مەن وركەندەۋىنىڭ سيمۆولى بولىپ سانالاتىنىن اتاپ ءوتتى. «مەنى نۇرسۇلتان نازارباەۆتىڭ كەمەل باسشىلىعىنىڭ ارقاسىندا قازاقستاننىڭ قول جەتكىزگەن الەۋمەتتىك-ەكونوميكالىق پروگرەسىنىڭ اۋقىمى ءتانتى ەتتى. ءبىز ەلدەرىڭىزگە الداعى ۋاقىتتا دا تابىس پەن باق-بەرەكە تىلەيمىز. ءبىزدىڭ مەملەكەتتەرىمىزدە قارىم-قاتىناس پەن ءوزارا ىنتىماقتاستىقتى جاقسارتۋعا قاجەتتى زور الەۋەت بار», – دەدى ن.شاريف. ول ساپار بارىسىندا تاراپتار ەكىجاقتى قارىم-قاتىناستار مەن حالىقارالىق كۇن تارتىبىندەگى كەڭ اۋقىمدى ماسەلەلەردى تالقىلاعانىن دا ايتتى. «ءبىز ءبىلىم جانە عىلىم, ەكونوميكا, كولىك, كەمە قۇرىلىسى, سونداي-اق اۋە قاتىناسى سالالارىنداعى ءوزارا ىقپالداستىقتى نىعايتۋعا كەلىستىك. قازاقستان مۇنايى مەن گازىنىڭ يمپورتىنا, جەڭىل ونەركاسىپتە, اۋىل شارۋاشىلىعىندا, فارماتسەۆتيكا جانە باسقا سالالاردا بىرلەسكەن كاسىپورىندار اشۋعا قاتىستى ۋاعدالاستىقتارعا قول جەتكىزىلدى», – دەدى پاكستان يسلام رەسپۋبليكاسىنىڭ پرەمەر-ءمينيسترى.
ن.شاريف ەكىجاقتى قاتىناستارداعى ينستيتۋتسيونالدىق تەتىكتەردى نىعايتۋ ينتەگراتسيالىق ۇدەرىستەرگە, بۇكىل وڭىردەگى بەيبىتشىلىك پەن تۇراقتىلىقتى ساقتاۋعا وڭ ىقپال ەتەتىنىن اتاپ ءوتتى. «قازاقستان مەن پاكستان شىۇ جانە بۇۇ سياقتى حالىقارالىق ۇيىمدار اياسىندا بۇدان ءارى دە ىنتىماقتاسۋعا ىقىلاس تانىتىپ وتىر», – دەپ اتاپ ءوتتى ن.شاريف.
پاكستان پرەمەرى ن.ءشاريفتىڭ قازاقستانعا رەسمي ساپارى اياسىندا قول قويىلعان ەكىجاقتى قۇجاتتاردىڭ ءتىزىمى:قازاقستان رەسپۋبليكاسىنىڭ پرەزيدەنتى مەن پاكستان يسلام رەسپۋبليكاسىنىڭ پرەمەر-ءمينيسترىنىڭ بىرلەسكەن مالىمدەمەسى.
قازاقستان رەسپۋبليكاسىنىڭ قورعانىس مينيسترلىگى مەن پاكستان يسلام رەسپۋبليكاسىنىڭ قورعانىس مينيسترلىگى اراسىنداعى قازاقستان رەسپۋبليكاسى قارۋلى كۇشتەرىنىڭ اسكەري قىزمەتشىلەرىن پاكستان يسلام رەسپۋبليكاسى قورعانىس مينيسترلىگىنىڭ اسكەري وقۋ ورىندارىندا وقىتۋ تۋرالى كەلىسىم.
قازاقستان رەسپۋبليكاسىنىڭ سىرتقى ساۋدا پالاتاسى مەن پاكستان يسلام رەسپۋبليكاسىنىڭ ساۋدا جانە ونەركاسىپتىك پالاتالارى فەدەراتسياسى اراسىنداعى بىرلەسكەن ىسكەرلىك كەڭەستى قۇرۋ تۋرالى ءوزارا تۇسىنىستىك مەموراندۋم.
ايدار ورىسباەۆ.
دەرەك, سۋرەت: akorda.kz.