بيىلعى ناۋرىز ومبى قالاسىندا بۇرىن-سوڭدى بولماعان اۋقىمدا وتكىزىلدى. بۇرىن ونى قالامىزداعى تۇركىتىلدەس حالىقتاردىڭ وكىلدەرى ءوزدى-ءوزى, بولەك-بولەك اتاپ وتەتىن. قازاقتار ءبىر جەردە, وزبەكتەر باسقا جەردە, تاتارلار مەن ازەربايجاندار دا بۇيىرعان ورىندارىندا تويلايتىن. بيىل قالا باسشىلىعى بارلىق ۇلتتىق-مادەني ورتالىقتاردىڭ ءبارىنىڭ باسىن بىرىكتىرىپ, ناۋرىزدى ورتاق تۇردە اتاپ ءوتۋ كەرەك دەگەن شەشىم قابىلدادى. ءسويتىپ, وعان «كراسنايا زۆەزدا» سپورت كەشەنى بەرىلدى.
جەكسەنبى كۇنى تاڭەرتەڭنەن باستاپ بارلىق ومبى حالقى «كراسنايا زۆەزدا» سپورت كەشەنى ورنالاسقان «ۆلكسم-ءنىڭ 30 جىلدىعى» اتىنداعى پارككە اعىلدى. ولاردىڭ اراسىندا مۇسىلماندار عانا ەمەس, ورىستار, ۋكرايندار, بەلارۋستار دا بولدى. ءبارى دە شىعىستىڭ حالىق مەرەكەسى ناۋرىزدى كورگىسى كەلەتىن سياقتى. ونىڭ ۇستىنە الدىن الا حابارلانعان باعدارلامالارى دا جۇرتتى قاتتى قىزىقتىرعان ەدى. سپورتتىق جارىستار, بالالارعا ارنالعان ۇلتتىق ويىندار, ۇلتتىق ءان-كۇيلەر, ءدامى ءتىل ۇيىرەتىن شىعىس تاعامدارى بولاتىنىن باق قايتا-قايتا ايتىپ جاتتى.
سپورتتىق جارىستاردىڭ ءبارى دالادا ۇيىمداستىرىلىپ, ونى كوبىنەسە ەر-ازاماتتار قىزىقتادى. ال سپورت كەشەنىنىڭ ىشىندە ءاربىر ۇلتتىڭ ءتاتتى-دامدىلەرىنە تولى بولعان جايما بازارلار اجە-انالار مەن بالالاردى قارق قىلدى. وسى جەردەگى ءازىل-قالجىڭدار, ءان - كۇيلەر, قىزىق باعدارلامانى كورۋگە كەلگەن ادامداردىڭ ءبىرىن دە سەلسوق قالدىرماي, ءبارىن دە قىزىعىنا ەلىتىپ اكەتتى.
سونىڭ ىشىندە قۇرىلعانىنا ەكى-اق جىل بولعان ازەربايجانداردىڭ «ۆاتان-رودينا» ۇلتتىق ورتالىعى وزدەرىنىڭ ەكسپوزيتسيالارىن تۇڭعىش رەت ۇسىندى. ازەربايجانداعى اتاقتى «قىز مۇناراسىنىڭ» كىشىرەيتىلگەن نۇسقاسى, ۇلتتىق كيىمدەگى قۋىرشاقتار, مۋزىكالىق اسپاپتار – ءبار-ءبارى ولاردىڭ تاريحي وتاندارىن كوزگە ەلەستەتتى. سونىمەن بىرگە, ازەربايجاننىڭ ىشىنە قۇيىلعان ىستىق سۋ ۇزاق ۋاقىت سالقىندامايتىن اتاقتى اعاش توستاعاندارى دا جۇرتتىڭ قىزىعۋشىلىعىن تۋدىردى.
ومبىداعى «ءمولدىر» اتتى قازاق ۇلتتىق مادەني ورتالىعىنىڭ قۇرىلعانىنا 25 جىل بولعان. ولار ۇلتتىق كادەسىيلار ساتاتىن «مەرۋەرت» اتتى دۇكەن دە اشقان ەكەن. سونىمەن بىرگە, «ومبى قازاقتارى» اتتى گازەت تە شىعارادى. ءبىز وسى گازەتتىڭ باس رەداكتورى تورعىن اشەنوۆامەن سويلەسكەنىمىزدە ول: «بۇگىنگى مەرەكە بارلىق حالىقتاردىڭ بىرىگۋىنىڭ, ءبىر ماقسات, ءبىر تىلەكتە بولۋىنىڭ قانشالىقتى ماڭىزدى ەكەنىن كورسەتتى. باسقا حالىقتاردىڭ مادەنيەتىن, ونەرىن بىلگەن سايىن, تانىعان سايىن ولارعا دەگەن قۇرمەتىڭ دە ارتا تۇسەدى. ءبىزدىڭ ءبىر-ءبىرىمىزدى تەرەڭىرەك بىلۋىمىزگە ناۋرىزدىڭ پايداسى وتە كوپ», دەدى.
سپورت كەشەنىنىڭ ىشىندەگى «داستارقان» الاڭىنا كەلگەن جۇرتتىڭ بارىنە تەگىن تاعامدار تاراتىلدى. مۇسىلمانداردىڭ ءداستۇرى بويىنشا ءبىر قازاننان ۇلەستىرىلگەن ءدام سودان اۋىز تيگەن بارلىق حالىق ونىمدەرىن تاتۋلىققا شاقىرادى ەكەن.
مەرەكە ويلاعاننان دا ارتىق كوڭىلدى بولدى. تەك بەلگىلەنگەن ورىننىڭ تارلىعى عانا كوزگە انىق كورىنىپ تۇردى. كەلەسى جىلى قالا باسشىلىعى بۇدان گورى كەڭىرەك ورىندى تاڭدايتىن شىعار. سوندا ناۋرىز بۇگىنگىدەن دە كوپ حالىقتى ءبىر-بىرىمەن جاقىنداستىرا تۇسەرى ءسوزسىز.
اندرەي موتوۆيلوۆ,
«ومسكايا پراۆدا» گازەتىنىڭ
باس رەداكتورى.
رەسەي فەدەراتسياسى,
ومبى قالاسى.
سۋرەتتەردى تۇسىرگەندەر
ەۆگەنيا كارماەۆا مەن تاتيانا شيپيلوۆا.