استانا. 17 مامىر. بۇگىن تاڭەرتەڭ اقش-تا جەرگىلىكتى بوكسشى كىشى ۆيللي مونرومەن شايقاستا ورتا سالماقتاعى WBA (Super), IBO جانە WBC (Interim) نۇسقالارى بويىنشا الەم چەمپيوندىعى اتاعىن قورعاعان جەرلەسىمىز گەننادي گولوۆكين 6-راۋندتا جەڭىسكە جەتتى. بۇل تۋرالى egemen.kz حابارلادى.
جەكپە-جەك امەريكانىڭ كاليفورنيا شتاتىنداعى ينگلۆۋد قالاسىنىڭ «فورۋم» ارەناسىندا ءوتتى. گەننادي گولوۆكين ادەتتەگىدەي ۇرىستىڭ باسىنان العا ۇمتىلىپ, ءوزىن جويقىن شابۋىلدارىن قولعا الدى. ول ايقاستىڭ باسىندا-اق كىشى مونرونى تەڭسەلتىپ جىبەرەتىندەي شالت تا قاتتى سوققىلار بەرىپ تاستادى. ال ەكىنشى راۋندتا ءبىزدىڭ جەرلەسىمىز قارسىلاسىن ءتىپتى ەكى رەت نوكداۋنعا جىبەرىپ ۇلگەردى. بىراق امەريكالىق بوكسشى گونگ سوعىلعانعا دەيىن ورنىنان تۇرىپ كەتتى.
ءۇشىنشى راۋندتا گەنناديدىڭ ەپتەپ قارقىنى باسىلىپ قالعانداي بولىپ كورىندى. مۇنى وسى كەزگە دەيىن ءبىراز ەسەسى كەتىپ قالعان ۆيللي جاقسى پايدالانىپ قالدى. ونىڭ وسى ساتتەگى بىرنەشە شابۋىلى ءساتتى شىقتى. بۇدان كەيىنگى ءتورتىنشى جانە بەسىنشى راۋندتار دا وسى سيپاتپەن ءوتتى. وسى تۇستاردا قازاقستاندىق جانكۇيەرلەردىڭ كوڭىلدەرى ەپتەپ قوبالجىعانداي دا بولدى. گەنا شايقاستىڭ وسى كەزەڭدەرىندە قارسىلاسىنا بىرنەشە رەت قاۋىرت سوققىلار بەرە الدى. الايدا, ونىڭ قارىمتا سوققىلار جاساۋىنا دا جول بەرىپ قويدى.
وسى الما-كەزەك شابۋىلمەن التىنشى راۋند تا كەلىپ جەتتى. وعان ءبىزدىڭ باعلان بىردەن قارقىندى كىرىستى. كەنەت ونىڭ تاعى ءبىر وقىس سوققىسى مونروعا ءدال ءتيىپ, مۇرتتاي ۇشىرىپ ءتۇسىردى. وسىدان كەيىن الاڭداعى اربيتر ساۋساقتارىن بۇگىپ ساناي باستادى. امەريكالىق اتلەت تووەشىنىڭ «ون» دەگەن ساندى ايتۋىمەن بىرگە ورنىنان دا تۇردى. بىراق رەفەري بۇدان كەيىن ايقاستى جالعاستىرۋ مۇمكىن ەمەس دەپ تاپتى. تەحنيكالىق نوكاۋت! وسىلايشا گەننادي گولوۆكين كاسىپقويلار رينگىندەگى كەزەكتى جەڭىسىنە جەتتى.
وسىمەن ءوزىنىڭ 33 جاستاعى قاراعاندى قابىلانى 2015 جىلعى – ەكىنشى, جالپى سانى 33-ءشى ۇتىسىنا اياق ارتتى. ول بۇلاردىڭ 30-ىن نوكاۋتپەن اياقتاسا, سولاردىڭ سوڭعى 20-سىنا وسىلايشا مەرزىمىنەن بۇرىن قول جەتكىزىپ وتىر. ال 28 جاستاعى كىشى ۆيللي مونرو ءوزىنىڭ كاسىپقويلار رينگىندەگى 21 شايقاسىنىڭ ەكىنشىسىندە جەڭىلىستىڭ اششى ءدامىن تاتىپ قالدى.
ايتا كەتۋ كەرەك, مونرو ۇرىستان 30 جانە 7 كۇن بۇرىن وتكىزىلگەن سالماق ولشەۋ كەزىندە ۇرىسقا WBC ەرەجەلەرى بويىنشا قاتىسپايتىنىن الدىن الا ايتقان ەدى. سوندىقتان WBC چەمپيوندىعى اتاعى بۇل جولى باسكە قوسىلعان جوق. ال شايقاس الدىنداعى رەسمي سالماق ولشەۋ پروتسەدۋراسىندا گولوۆكين - 72,12 كگ (159 فۋنت), ال مونرو 72,57 كگ (160 فۋت) تارتتى. ۇرىس كەزىندە قازاقستاندىقتىڭ سالماعى - 77,1 كيلو (170 فۋنت), امەريكالىق 78 كيلو (172 فۋت) بولدى.
رۋسلان يگىلىك.
دەرەك: egemen.kz
سۋرەت: Vesti.kz.