شىعىس قازاقستان وبلىسىنىڭ ورتالىعىندا 1500-گە جۋىق كاسىپكەردى, ساراپشىلاردى جانە مەملەكەتتىك ورگاندار وكىلدەرىن بىرىكتىرگەن «ALTAY BUSINESS» فورۋمى ءوتتى. اۋقىمدى ءىس-شارا ءوڭىردىڭ ەكونوميكالىق الەۋەتىن ارتتىرۋعا باعىتتالعان جاڭا باستامالار مەن ناقتى شەشىمدەردى تالقىلاۋعا ارنالدى, دەپ حابارلايدى Egemen.kz.
فورۋمدى شقو اكىمدىگىنىڭ كاسىپكەرلىك جانە ونەركاسىپ باسقارماسى ۇيىمداستىردى. شاراعا تەك بيزنەس وكىلدەرى عانا ەمەس, ءوز ءحوببيىن كرەاتيۆتى يندۋسترياعا اينالدىرعان, باسقا وڭىرلەردەن كەلگەن حەدلاينەرلەر دە شاقىرىلدى. بۇل فورۋمنىڭ مازمۇنىن كەڭەيتىپ, تاجىريبە الماسۋ الاڭىنا اينالۋىنا مۇمكىندىك بەردى.
فورۋم اياسىندا شىعىس قازاقستان وبلىسىنىڭ اكىمى نۇرىمبەت ساقتاعانوۆ وڭىرلىك كاسىپورىنداردىڭ ونىمدەرى ۇسىنىلعان كورمەمەن تانىستى. ايماق باسشىسى ءوڭىردىڭ ەكونوميكالىق كورسەتكىشتەرىنە توقتالىپ, شقو-نىڭ ەل دامۋىنداعى ماڭىزدى ورنىن اتاپ ءوتتى.
«شىعىس قازاقستان – الەۋەتى جوعارى ءوڭىر. بۇگىندە مۇندا ەلدەگى ونەركاسىپ ءوندىرىسىنىڭ شامامەن 6% قالىپتاستى, ينۆەستيتسيا كولەمى 838 ملرد تەڭگەدەن اسادى, ال شاعىن جانە ورتا بيزنەستىڭ ەكونوميكاداعى ۇلەسى 24,4%-دى قۇرايدى. وبلىستا 58 مىڭنان استام شاعىن جانە ورتا بيزنەس سۋبەكتىسى جۇمىس ىستەيدى, وندا 157 مىڭنان استام ادام ەڭبەك ەتەدى. بۇل – ەكونوميكالىق جانە الەۋمەتتىك تۇراقتىلىقتىڭ نەگىزى», دەدى وبلىس اكىمى.
ءوڭىر باسشىسى قازىرگى كەزەڭدە تەك پىكىر الماسۋ جەتكىلىكسىز ەكەنىن, ناقتى شەشىمدەر قابىلداپ, بىرلەسكەن ارەكەتكە كوشۋ قاجەت ەكەنىن اتاپ ءوتتى. ونىڭ ايتۋىنشا, مۇنداي فورۋمداردىڭ باستى ماقساتى – جاڭا يدەيالاردى قولداۋ جانە ولاردى ىسكە اسىرۋعا جاعداي جاساۋ.
شقو-دا دەپۋتات قارجى جىمقىردى دەگەن كۇدىكپەن تەرگەلىپ جاتىر
فورۋم بارىسىندا كاسىپكەرلىكتى دامىتۋدىڭ نەگىزگى باعىتتارى كەڭىنەن تالقىلاندى. اتاپ ايتقاندا, شاعىن جانە ورتا بيزنەستى قولداۋ, كومپانيالاردىڭ ءوسۋى, اگروبيزنەس, اكۆامادەنيەت, ارا شارۋاشىلىعى, كرەاتيۆتى يندۋستريا, IT سالاسى, ءتۋريزمدى دامىتۋ, ەكسپورتتى ۇلعايتۋ جانە جاڭا نارىقتارعا شىعۋ ماسەلەلەرى قارالدى.
سونىمەن قاتار قاتىسۋشىلار اكىمشىلىك كەدەرگىلەردى ازايتۋ, جوبالاردى ىسكە قوسۋ راسىمدەرىن جەدەلدەتۋ جانە بيزنەستى ءوڭىر ىشىندە دە, سىرتىندا دا كەڭەيتۋ جولدارىن تالقىلادى. بۇل رەتتە نەگىزگى باسىمدىقتاردىڭ ءبىرى رەتىندە ء«بىر تەرەزە» قاعيداتىن ەنگىزۋ ماسەلەسى كوتەرىلدى. اتالعان جۇيە كاسىپكەرلەرگە مەملەكەتتىك قولداۋ مەن قىزمەتتەردى ءبىر ورتالىقتان, ارتىق بيۋروكراتياسىز جانە ۋاقىت جوعالتپاي الۋىنا مۇمكىندىك بەرەدى.
فورۋم قورىتىندىسىندا وبلىس اكىمى ءسوز سويلەپ, وڭىردەگى كاسىپكەرلىكتى دامىتۋعا باعىتتالعان ناقتى ءىس-قيمىل تەتىكتەرى ايقىندالعانىن اتاپ ءوتتى. «ALTAY BUSINESS» الاڭى شىعىس قازاقستان ءۇشىن جاڭا ەكونوميكالىق سەرپىن بەرەتىن ماڭىزدى ديالوگ پلاتفورماسى رەتىندە باعالاندى.
شقو-دا ءۇش جۇمىسشى كارىز قۇدىعىندا گازبەن ۋلانىپ قالعان