كەشە اقوردادا قازاقستان رەسپۋبليكاسىنىڭ مەملەكەتتىك حاتشىسى, قازاقستان رەسپۋبليكاسى پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا ءتورايىمى گۇلشارا ابدىقالىقوۆا «بۇۇ - ايەلدەر» ۇيىمىنىڭ قازاقستانداعى وكىلى, ورتالىق ازياداعى «بۇۇ-ايەلدەر» بىرنەشە ەلگە ارنالعان بولىمشەسىنىڭ ديرەكتورى يلەين كونكيەۆيچپەن كەزدەستى.
مەملەكەتتىك حاتشى قازاقستان مەن «بۇۇ-ايەلدەر» ۇيىمى اراسىنداعى ىنتىماقتاستىقتىڭ جوعارى دەڭگەيدە ەكەنىن اتاپ ءوتتى. گ.ابدىقالىقوۆا گەندەرلىك تەڭدىكتى ىلگەرىلەتۋ, ەلىمىز قاتىسۋشىسى بولىپ تابىلاتىن ايەلدەرگە قاتىستى شەكتەۋدىڭ بارلىق ءپىشىندەرىن جويۋ تۋرالى بۇۇ كونۆەنتسياسىنىڭ ەرەجەلەرىن ساقتاۋ جونىندەگى بىرلەسكەن جۇمىسقا دا قاناعاتتاناتىنىن ءبىلدىردى. «بۇۇ-ايەلدەر» ۇيىمىنىڭ بەلسەندى ىقپال ەتۋىمەن قازاقستان رەسپۋبليكاسىنىڭ 2006-2016 جىلدارعا ارنالعان گەندەرلىك تەڭدىك ستراتەگياسى ازىرلەنىپ, قابىلداندى.
گ.ابدىقالىقوۆا قازىرگى جاعدايداعى ايەلدەر ءرولىنىڭ كوپقىرلىلىعىن ايتا كەلىپ, ولاردىڭ جان-جاقتى دامۋى مەن جاسامپازدىق الەۋەتىن ىسكە اسىرۋعا جاعداي جاساۋ قاجەتتىگىن اتاپ كورسەتتى. مەملەكەتتىك حاتشى ەلباسىنىڭ «نۇرلى جول – بولاشاققا باستار جول» اتتى جاڭا ەكونوميكالىق ساياساتىنىڭ اياسىندا جاڭا جۇمىس ورىندارى مەن ءوندىرىس ورىندارىنىڭ قۇرىلۋىنا بايلانىستى ىسكە اسىرىلاتىن بارلىق ينفراقۇرىلىمدىق جوبالارعا ايەلدەردى بەلسەندى تارتۋعا ۇلتتىق كوميسسيا بارىنشا ىقپال ەتەتىنىن كولدەنەڭ تارتتى.
تاراپتار ايەلدەردى جۇمىسپەن قامتۋ, ايەلدەر كاسىپكەرلىگىنە قولداۋ كورسەتۋ, انا مەن بالانى قورعاۋ, تۇرمىستىق زورلىق-زومبىلىقتىڭ الدىن الۋ, وتباسىلىق جانە رۋحاني-ادامگەرشىلىك قۇندىلىقتاردى نىعايتۋ ماسەلەلەرىن شەشۋدەگى ىنتىماقتاستىقتىڭ ودان ارعى كەلەشەگىن تالقىلادى.
كەزدەسۋگە ۇلتتىق كوميسسيا ءتورايىمىنىڭ ورىنباسارى, پارلامەنت ءماجىلىسىنىڭ دەپۋتاتى ەلەنا تاراسەنكو قاتىستى.
جاقسىباي سامرات,
«ەگەمەن قازاقستان».
سۋرەت : baq.kz