مەملەكەت باسشىسى جوعارى ەۋرازيالىق ەكونوميكالىق كەڭەستىڭ كەڭەيتىلگەن قۇرامداعى وتىرىسىندا ءسوز سويلەدى. پرەزيدەنتتىڭ توراعالىعىمەن جوعارى ەۋرازيالىق ەكونوميكالىق كەڭەستىڭ كەڭەيتىلگەن قۇرامداعى كەزەكتى وتىرىسى ءوتتى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
قاسىم-جومارت توقاەۆ استاناداعى ءىس-شارالارعا قاتىسقانى ءۇشىن ەاەو-عا مۇشە ەلدەردىڭ جانە بايقاۋشى مەملەكەتتەردىڭ باسشىلارىنا, سونداي-اق ارنايى شاقىرىلعان قوناقتارعا العىس ايتتى.
«بۇگىنگى كەزدەسۋىمىز ەرەكشە مانگە يە. 2014 جىلى ءدال وسى كۇنى بىرلەستىگىمىزدىڭ نەگىزىن قالاعان شارتقا قول قويىلدى. جوعارى كەڭەستىڭ شەشىمىمەن 29 مامىر – ەۋرازيالىق ەكونوميكالىق وداق كۇنى بولىپ رەسمي تۇردە جاريالاندى. بىرلەستىگىمىزدىڭ ون جىلدان استام تاريحى بار. وسى ۋاقىت ىشىندە ەكونوميكالىق ينتەگراتسيانى تەرەڭدەتۋ بويىنشا اۋقىمدى جۇمىس اتقارىلدى. اتاپ وتەرلىك جايت, بۇل كۇندەرى استانادا جوعارى كەڭەستىڭ وتىرىسىمەن قاتار, ەۋرازيالىق ەكونوميكالىق فورۋم ءوتىپ جاتىر. فورۋم قورىتىندىسى سان قىرلى ىسكەرلىك سەرىكتەستىگىمىزگە تىڭ سەرپىن بەرەتىنىنە سەنىمدىمىن», دەدى پرەزيدەنت.
پرەزيدەنت: وداق قۇرىلعان ساتتەن بەرى ەۋرازيالىق «بەستىكتىڭ» باستى ىنتىماقتاستىق الاڭىنا اينالدى
مەملەكەت باسشىسى ەۋرازيالىق ەكونوميكالىق وداق ماكروەكونوميكالىق دامۋدىڭ وڭ ديناميكاسىن ساقتاپ وتىرعانىنا توقتالدى.
«بولجامعا ساي, 2026-2027 جىلدارى ەاەو ەلدەرىنىڭ جيىنتىق ىشكى جالپى ءونىم ءوسىمى 2,5 پايىزعا جۋىقتاۋعا ءتيىس. جاھاندىق نارىقتاعى تۇراقسىزدىققا قاراماستان, بىلتىر ەلدەرىمىز اراسىنداعى تاۋار اينالىمى 95 ميلليارد دوللاردان استى. بيىل ءوزارا ساۋدا-ساتتىق كولەمى 6 پايىزعا ۇلعايادى دەپ كۇتىپ وتىرمىز. بۇل 100 ميلليارد دوللارلىق مەجەنى ەڭسەرۋگە مۇمكىندىك بەرەدى. دەگەنمەن حالىقارالىق ۇيىمداردىڭ جاھاندىق نارىقتاعى جاعدايعا بەرگەن باعاسى كوڭىل كونشىتپەيدى. حالىقارالىق ۆاليۋتا قورىنىڭ بايانداماسىنا سايكەس, بيىل الەم ەكونوميكاسى 3 پايىزعا دەيىن باياۋلايتىنى جونىندە ايتىلىپ ءجۇر. ارينە, دۇنيە جۇزىندەگى قۇرىلىمدىق وزگەرىستەر ەاەو-نىڭ ەكونوميكالىق دامۋىنا دا اسەر ەتپەي قويمايدى. قازىرگى ساتتە بىرلەستىگىمىزدى جاڭا جاعدايلارعا بەيىمدەۋ, ىشكى ورنىقتىلىقتى نىعايتۋ جانە باسەكەگە قابىلەتتىلىكتى ارتتىرۋ وتە وزەكتى مىندەت بولىپ تۇر», دەدى مەملەكەت باسشىسى.
رەسەي پرەزيدەنتى 2027 جىلى جي-گە ارنالعان جوعارى دەڭگەيدەگى كەزدەسۋ وتكىزۋدى ۇسىندى