قانات بوزىمباەۆ بقو-داعى كوممۋنالدىق نىسانداردىڭ قۇرىلىسىن تەكسەردى

بۇگىندە وڭىردە كوممۋنالدىق ينفراقۇرىلىمدى اۋقىمدى جاڭارتۋ جۇمىستارى جۇرگىزىلىپ جاتىر. جاڭعىرتىلىپ جاتقان نەگىزگى نىسانداردىڭ ءبىرى – ورال قالاسىن جىلۋ جانە ىستىق سۋمەن قامتاماسىز ەتەتىن «جايىقتەپلوەنەرگو» اق قازىرگى ۋاقىتتا «قىزىل ايماقتا» تۇر. 2029 جىلعا دەيىن جۇرگىزىلەتىن جاڭعىرتۋ جۇمىستارىنىڭ ناتيجەسىندە توزۋ دەڭگەيىن 83%-دان 60%-عا دەيىن تومەندەتىپ, نىساندى «سارى ايماققا» شىعارۋ جوسپارلانعان.

سونىمەن قاتار, توزۋ دەڭگەيى 65%-دى قۇرايتىن ۇزىندىعى 1,8 شاقىرىم بولاتىن №7 جىلۋ ماگيسترالىن قايتا جاڭارتۋ جۇمىستارى جالعاسىپ جاتىر. قانات بوزىمباەۆ قۇرىلىس-مونتاجداۋ جۇمىستارىنىڭ ساپاسىن قاتاڭ باقىلاۋدى تاپسىردى. اتالعان جىلۋ ماگيسترالى 24 بيۋدجەتتىك مەكەمە مەن 130 تۇرعىن ءۇيدى جىلۋمەن قامتاماسىز ەتەدى. جوبانى جۇزەگە اسىرۋ جەلىلەردىڭ توزۋىن ازايتۋعا, جۇيەنىڭ وتكىزۋ قابىلەتىن ارتتىرۋعا جانە پايدالانۋ شىعىندارىن تومەندەتۋگە مۇمكىندىك بەرەدى.

ەنەرگەتيكالىق جانە كوممۋنالدىق ينفراقۇرىلىمدى جاڭعىرتۋعا قانشا قارجى جۇمسالادى؟

سونداي-اق قانات بوزىمباەۆ ورال قالاسىنىڭ زاچاگان كەنتىندەگى №29 كارىز-سورعى ستانساسىنىڭ جۇمىسىمەن تانىستى. قازىرگى تاڭدا مۇندا قۇرىلىس-مونتاجداۋ جۇمىستارىنىڭ 40%-ى ورىندالعان. جوبانىڭ قۇنى – 1,7 ملرد تەڭگە. جاڭعىرتۋ اياقتالعاننان كەيىن, 2027 جىلدىڭ سوڭىنا قاراي ستانسا تاۋلىگىنە 14 700 تەكشە مەترگە دەيىن سارقىندى سۋدى ايداي الادى. بۇل جۇيەگە جاڭا ابونەنتتەردى قوسۋعا جانە كەنتتىڭ كوممۋنالدىق ينفراقۇرىلىمىن ءتيىمدى باسقارۋعا جول اشادى. 

ودان كەيىن ۆيتسە-پرەمەر «باتىس قازاقستان ايماقتىق ەلەكتر جەلىلىك كومپانياسى» جشس-ءنىڭ قالالىق ەلەكتر جەلىلەرى كەشەنىنە باردى. مۇندا 138 شاقىرىم ەلەكتر جەلىلەرىن جاڭعىرتۋعا باعىتتالعان ءۇش كەزەڭدى جوبا جۇزەگە اسىرىلىپ جاتىر. قازىرگى ۋاقىتتا جوبانىڭ ەكى كەزەڭى اياقتالىپ, ءۇشىنشى كەزەڭ بويىنشا جۇمىستار جالعاسۋدا.

قانات بوزىمباەۆ قازىرگى جاڭعىرتۋ قارقىنىن ساقتاۋ ءوڭىردىڭ كوممۋنالدىق ينفراقۇرىلىمىنداعى جۇيەلى ماسەلەلەردى شەشۋگە جانە ەنەرگيامەن جابدىقتاۋ سەنىمدىلىگىن ارتتىرۋعا مۇمكىندىك بەرەتىنىن اتاپ ءوتتى. جۇرگىزىلىپ جاتقان جۇمىستاردىڭ ناتيجەسىندە وبلىستاعى ەلەكتر جەلىلەرىنىڭ توزۋ دەڭگەيى 82%-دان 75,4%-عا دەيىن تومەندەدى.

ەلىمىزدىڭ ەنەرگەتيكالىق نىساندارىندا اۋقىمدى جوندەۋ جۇمىستارى ءجۇرىپ جاتىر

جۇمىس ساپارى بارىسىندا وتاندىق وندىرۋشىلەردى قولداۋ ماسەلەسىنە ەرەكشە نازار اۋدارىلدى. جوبالاردا قازاقستاندىق تەمىربەتون تىرەكتەرى, كابەلدىك-وتكىزگىش ونىمدەر, مەتالل كونسترۋكتسيالار, ترانسفورماتورلىق قوسالقى ستانسالار, پوليەتيلەن قۇبىرلارى جانە وزگە دە جابدىقتار پايدالانىلىپ جاتىر. كەيبىر نىسانداردا قازاقستاندىق قامتۋ ۇلەسى 80-99%-عا دەيىن جەتەدى.

قازىرگى تاڭدا ەكسج ەلەكتروندىق پلاتفورماسىندا باتىس قازاقستان وبلىسى بويىنشا جالپى سوماسى 113,7 ملرد تەڭگەنى قۇرايتىن 38 جوبا تىركەلگەن. ونىڭ ىشىندە جالپى قۇنى 21,9 ملرد تەڭگە بولاتىن 10 پيلوتتىق جوبا بەلسەندى جۇزەگە اسىرىلۋ كەزەڭىندە تۇر.