ەسىك قالاسىندا تۇلەكتەر ينتەرنەتتىڭ وشۋىنە بايلانىستى ۇبت-نى قايتا تاپسىرادى

وقيعا تۋرالى تالاپكەرلەردىڭ ءبىرىنىڭ اناسى الەۋمەتتىك جەلىدە جازدى. ونىڭ ايتۋىنشا, ۇلى 28 مامىر كۇنى تاڭعى ساعات 09:00-دە تەست تاپسىرعان. الايدا ەمتيحان اياقتالۋعا نەبارى 20 مينۋت قالعاندا تەستىلەۋ ورتالىعىندا كەنەتتەن ينتەرنەت ءوشىپ قالعان.

« ۇلىم تاڭعى 9-دان بەرى ۇبت تاپسىرىپ وتىردى. اياقتالۋىنا 20 مينۋت قانا قالعان ەدى. سول كەزدە تەستىلەۋ ورتالىعىندا ينتەرنەت ءوشىپ قالدى. تەستتى اياقتاپ ۇلگەرمەگەندەردىڭ ناتيجەلەرى ساقتالماي قالدى. ەندى بالالار وسى كۇيزەلىستى قايتا باستان وتكەرۋگە ءماجبۇر, سەبەبى ەمتيحان جەكسەنبىگە اۋىستىرىلدى», دەپ جازدى ول.

بۇل جاعداي الەۋمەتتىك جەلىلەردە قىزۋ تالقىعا ءتۇستى. قولدانۋشىلار تەستىلەۋدى ۇيىمداستىرۋ ساپاسىن سىنعا الىپ, مۇنداي ماڭىزدى ەمتيحان كەزىندە تەحنيكالىق اقاۋدىڭ قالاي ورىن العانىنا نارازىلىق ءبىلدىردى.

پاۆلودارلىق وقۋشى ۇبت-دان 140 بالل جينادى

ۇلتتىق تەستىلەۋ ورتالىعىنىڭ مالىمەتىنشە, 20 مامىر كۇنى قازاقستاننىڭ بىرنەشە وڭىرىندە جانە 28 مامىردا الماتى وبلىسىنىڭ ەسىك قالاسىندا ينتەرنەت قىزمەتىن ۇسىناتىن مەردىگەر ۇيىمدار تاراپىنان تەحنيكالىق اقاۋلار بولعان.

ۇلتتىق تەستىلەۋ ورتالىعى تالاپكەرلەر مەن اتا-انالاردىڭ الاڭداۋشىلىعىن تۇسىنەتىنىن مالىمدەدى.

«20 مامىردا ينتەرنەت قالپىنا كەلگەننەن كەيىن تەستىلەۋ 30 مينۋتتان سوڭ جالعاستى. ال 28 مامىردا ەسىك قالاسىندا تەستتى اياقتاپ ۇلگەرمەگەن تالاپكەرلەر ءۇشىن ۇبت 31 مامىرعا, ءبىرىنشى لەككە اۋىستىرىلدى», دەلىنگەن حابارلامادا.

ەسكە سالا كەتەيىك, بۇعان دەيىن عىلىم جانە جوعارى ءبىلىم ءمينيسترى ساياسات نۇربەك جارىق ءوشىپ قالعان جاعدايدا باعالاۋ جۇيەسى قالاي جۇرگىزىلەتىنىن ايتقان بولاتىن.