تريپوليدە ء«ال-يتتيحاد» فۋتبول كلۋبىنىڭ جانكۇيەرلەرى ليۆيا ۇكىمەتى عيماراتىنىڭ قاسبەتىن جانە ونىڭ الدىنداعى اۋماقتى ورتەپ جىبەردى. بۇل وقيعا «سۋەحلي» كلۋبىنا قارسى ماتچتاعى داۋلى ەپيزودتان باستالعان, دەپ حابارلايدى Egemen.kz.
ويىن تريپوليدەن وڭتۇستىك-شىعىسقا قاراي 65 كم جەردە ورنالاسقان تارحۋنا قالاسىنداعى ستاديوندا ءوتتى. 87-مينۋتتا ء«ال-يتتيحاد» فۋتبولشىلارى تورەشى «سۋەحلي» قاقپاسىنا پەنالتي بەلگىلەمەگەننەن كەيىن نارازىلىق بىلدىرە باستادى. وسىدان كەيىن ويىن توقتاتىلدى.
ستاديوندا بولعان ء«ال-يتتيحاد» جانكۇيەرلەرى الاڭعا جۇگىرىپ شىقتى. تارتىپسىزدىكتەر باستالدى: م ۇلىكتەر قيراتىلىپ, كۇزەتشىلەر جاراقات الدى.
تريپوليدە ء«ال-يتتيحاد» كلۋبىنىڭ بازاسىندا ماتچتى تاماشالاعان جانكۇيەرلەر ۇكىمەت عيماراتىنا بارىپ, سول جەردە وتشاشۋلارمەن نارازىلىق اكتسياسىن ۇيىمداستىرعان. ناتيجەسىندە عيماراتتىڭ الدىنداعى قاسبەت پەن اكىمشىلىك نىساننىڭ اۋماعى ورتەندى.
«اسپانعا قويۋ ءتۇتىن كوتەرىلىپ, اۋدانداعى كولىكتەر قاۋىپتەن سەسكەنىپ, تەزىرەك كەتۋگە اسىقتى. جانكۇيەرلەردىڭ قاتتى اشۋلاندى», دەدى كۋاگەرلەردىڭ ءبىرى.
Libya al-Ahrar TV جەلىسىندەگى جانە ەفيردەگى بەينەدە عيماراتتىڭ اينەك قاسبەتى جانىپ تۇرعانىن جانە ونىڭ ۇستىندە قارا ءتۇتىن كوتەرىلگەنىن كورۋگە بولادى. ءتۇن ورتاسىنا قاراي جاعداي باقىلاۋعا الىنىپ, ءورت سوندىرۋشىلەر قىزىل جالىندى اۋىزدىقتادى.
ء«ال-يتتيحاد» كلۋبى ماتچتاعى بارلىق تورەشىلىك شەشىمدەردى تولىعىمەن قايتا قاراۋدى تالاپ ەتتى. «سۋەحلي» قىسقا مالىمدەمەسىندە كوماندا ميسراتاعا جەڭىسپەن ورالاتىنىن جازدى.
ءتريپوليدى بومبالاۋ توقتار ەمەس
ەستەرىڭىزگە سالايىق, ليۆيانىڭ ۇلتتىق بىرلىك ۇكىمەتىن پرەمەر-مينيستر ابدۋلحاميد دبەيبا باسقارادى. ول بيلىككە 2021 جىلى بۇۇ دەلدالدىعىمەن كەلگەن ەدى. ليۆيا 2011 جىلى ەلدە مۋاممار كاددافي بيلىگى قۇلاتىلعاننان بەرى ساياسي تۇراقسىزدىق قىسپاعىنان شىعا الماي كەلەدى