ۇكىمەت قاراعاندى وبلىسىندا فارماتسەۆتيكالىق زاۋىت سالۋ جوباسىن ماقۇلدادى. ءتيىستى قاۋلىعا پرەمەر-مينيستر ولجاس بەكتەنوۆ قول قويدى, دەپ حابارلايدى Egemen.kz
جوبانى جۇزەگە اسىرۋ اياسىنداعى ينۆەستيتسيالىق كەلىسىمگە دەنساۋلىق ساقتاۋ مينيسترلىگى مەن «قاراعاندى فارماتسەۆتيكالىق كەشەنى» جشس قول قويعان. جەكە ينۆەستيتسيالاردىڭ جالپى كولەمى 42,5 ملرد تەڭگەنى قۇرايدى.
جاڭا زاۋىتتا 74 ءتۇرلى دارىلىك زات شىعارۋ جوسپارلانىپ وتىر.
«جوبا اياسىندا دارىلىك زاتتاردىڭ 74 اتاۋىن ءوندىرۋ جوسپارلانىپ وتىر. وندىرىستىك جەلى مەديتسينانىڭ ماڭىزدى باعىتتارىن, ونىڭ ىشىندە, ونكولوگيالىق, اۋتويممۋندى جانە ورفاندىق اۋرۋلاردى ەمدەۋگە ارنالعان يننوۆاتسيالىق دارىلىك پرەپاراتتاردى قامتيدى. زاۋىت الەۋمەتتىك ماڭىزى بار اۋرۋلاردىڭ الدىن الۋ مەن ەمدەۋگە قاجەتتى يممۋنوبيولوگيالىق جانە باسقا دا جوعارى تەحنولوگيالىق پرەپاراتتاردى وندىرۋمەن قاتار, الەمدىك ستاندارتتار بويىنشا بەلسەندى فارماتسەۆتيكالىق ينگرەديەنتتەردىڭ, بيولوگيالىق جانە بيوتەحنولوگيالىق ونىمدەردىڭ سينتەدەۋدى جولعا قويادى» دەلىنگەن ۇكىمەت ءباسپاسوز قىزمەتىنىڭ حابارلاماسىندا.
شىمكەنت فارماتسەۆتيكاسىنا 39,5 ملرد تەڭگە ينۆەستيتسيا قۇيىلادى
جوبانى ىسكە اسىرۋ ناتيجەسىندە 70 جاڭا جۇمىس ورنى اشىلادى. جالپى, قازاقستاننىڭ فارماتسەۆتيكا سالاسى تۇراقتى ءوسىم كورسەتىپ كەلەدى. 2025 جىلى فارماتسەۆتيكالىق ءونىم ءوندىرىسىنىڭ كولەمى 191,1 ملرد تەڭگەگە جەتىپ, 2024 جىلمەن سالىستىرعاندا 8,7%-عا ارتقان.
ەسكە سالا كەتەيىك, بۇعان دەيىن قاراعاندىدا 1 ملن تونناعا دەيىن مەتاللۋرگيالىق كوكس وندىرەتىن زاۋىت سالىناتىندىعىن حابارلاعان ەدىك.