الماتى وبلىسىندا تەرروريزم تۋرالى جالعان حابار تاراتتى دەگەن كۇدىكپەن توعىزىنشى سىنىپتىڭ ەكى وقۋشىسى ۇستالدى, دەپ حابارلايدى Egemen.kz.
تەرگەۋ مالىمەتىنشە, جاسوسپىرىمدەر استانا قالاسى مەن وزدەرى تۇراتىن وڭىردە وسىنداي 14 جالعان حابارلاما تاراتقان بولۋى مۇمكىن.
سونىمەن قاتار شىعىس قازاقستان وبلىسىندا تاعى ءبىر توعىزىنشى سىنىپ وقۋشىسى انىقتالدى. ول الەۋمەتتىك جەلىدەگى جانجالدان كەيىن باسقا ادامداردىڭ اتىنان شىمكەنت اكىمدىگىنە جانە اقتاۋداعى ساۋدا ءۇيىنىڭ اكىمشىلىگىنە جارىلعىش زات قويىلعانى تۋرالى ەلەكتروندى حاتتار جىبەرگەن.
قۇقىق قورعاۋ ورگاندارىنىڭ ايتۋىنشا, وقۋشىلار قىلمىس جاساۋ كەزىندە ءانونيمدى تەلەفون نومىرلەرى مەن ەلەكتروندى پوشتالاردى پايدالانعان.
ءىىم كيبەرقىلمىسقا قارسى ءىس-قيمىل دەپارتامەنتى باسشىسىنىڭ ورىنباسارى امان اۋباكىروۆ مۇنداي ارەكەتتەر ء«ازىل» نەمەسە «ويىن» بولسا دا, قىلمىستىق جاۋاپكەرشىلىككە اكەلەتىنىن ەسكەرتتى. ونىڭ سوزىنشە, مۇنداي ىستەر مۇقيات تەكسەرىلىپ, كىنالىلەر مىندەتتى تۇردە انىقتالادى.
الماتى قالاسىندا وسىعان دەيىن دە لاڭكەستىك اكتى تۋرالى جالعان حابارلاما تاراتقان ازاماتقا قاتىستى سوت ۇكىمى شىققان ەدى.
ال ىشكى ىستەر مينيسترلىگى تەرروريزم اكتىسى تۋرالى ادەيى جالعان اقپارات تاراتقاندار زاڭ الدىندا جاۋاپ بەرەتىنىن ەسكەرتكەن بولاتىن. باس پروكۋراتۋرا دا كۋرەرلىك قىزمەت اتىنان كەلەتىن جالعان حابارلامالار كوبەيگەنىن مالىمدەگەن ەدى.