ورال قالاسىندا جاسالعان ەڭ ءىرى كەمە وتان قورعاۋشىلار كۇنىنە وراي سۋعا ءتۇسىرىلىپ, ەل شەبىن قورعاۋ ءۇشىن كاسپيدى بەتكە الدى. كەمە پرەزيدەنت تاپسىرماسىمەن قورعانىس مينيسترلىگىنىڭ تاپسىرىسى اياسىندا جاسالىپ شىققان.
كەمەنى سۋعا ءتۇسىرۋ سالتاناتىنا وراي وتكەن راسىمگە باتىس قازاقستان وبلىسىنىڭ اكىمى ناريمان تورەعاليەۆ قاتىسىپ, پرەزيدەنت تاپسىرماسىمەن جۇزەگە اسقان ماڭىزدى جوبانىڭ ءساتتى اياقتالۋىمەن قۇتتىقتادى.
– بۇگىن «زەنيت» زاۋىتى ۇجىمىنىڭ كاسىبي شەبەرلىگى مەن قاجىرلى ەڭبەگىنىڭ ارقاسىندا ەلىمىزدەگى ەڭ ءىرى كەمەنى سۋعا ءتۇسىرىپ وتىرمىز. كورابلگە مەملەكەت جانە قوعام قايراتكەرى دىنمۇحامەد قوناەۆتىڭ ەسىمى بەرىلدى. ەكيپاج قورعانىس الەۋەتىن كۇشەيتۋدە قالتقىسىز قىزمەت ەتەدى دەپ سەنەمىن, ساتتىلىك تىلەيمىن! – دەدى ن.تورەعاليەۆ.
«زەنيت» زاۋىتى جاساپ شىعارعان 37-سۋ كولىگىنىڭ سالماعى – 720 توننا. جۇك تاسىمالداۋعا ارنالعان ءتريۋمنىڭ كولەمى – 30 تەكشە مەتر. «ورال «زەنيت» زاۋىتى» اق باس ديرەكتورى ۆيتالي كاپلۋنوۆتىڭ ايتۋىنشا, كەمەنىڭ جىلدامدىعى 16 تۇيىنگە دەيىن جەتەدى. ۇزىندىعى 51 مەتر, ەنى 9,5 مەترلىك اسكەري كورابل 8 بالدىق داۋىلعا شىداس بەرەدى. جوبانى جۇزەگە اسىرۋعا زاۋىت جۇمىسشىلارى تۇگەل اتسالىسقان.
كوپفۋنكتسيونالدى بۇل كەمە ەلىمىزدىڭ اسكەري تەڭىز كۇشتەرىنىڭ كەمەلەرى مەن كاتەرلەرىن ديزەلدىك وتىن, اۋىزسۋ, ازىق-ت ۇلىك جانە وزگە دە ماتەريالدىق-تەحنيكالىق جاعىنان قامتاماسىز ەتۋگە باعىتتالعان. جەكە قۇرام 30 شاقتى ادامنان تۇرادى. ەكيپاجعا قولايلى جاعداي جاسالعان.
«كەمەنى ورال قالاسىنان جايىق وزەنى ارقىلى تەڭىزگە جەتكىزگەنگە دەيىن بىرنەشە كوپىردىڭ استىنان وتكىزۋگە تۋرا كەلەدى. سوندىقتان ونىڭ دىڭگەگى اقتاۋ ايلاعىندا ورناتىلادى», دەيدى كەمەنى جاساۋشىلار.
بۇل كەمە ورالدىق «زەنيت» زاۋىتىنىڭ كونۆەيەرىنەن شىققان 37-سۋ كولىگى ەكەنىن ايتتىق. تەڭىزشىلەر بۇعان دەيىنگى كورابلدەرگە دە «ورال», «سارىارقا», «تۇركىستان», «ماڭعىستاۋ», «سەمەي» سىندى قالا مەن جەر اتاۋلارىن قويعان ەدى. بۇل جولعى ەڭ ۇلكەن اسكەري كەمە مەملەكەت جانە قوعام قايراتكەرى – دىنمۇحامەد احمەت ۇلى قوناەۆتىڭ ەسىمىن يەلەنىپ وتىر.
باتىس قازاقستان وبلىسى