ەلىمىزدە مەملەكەت باسشىسى قاسىم-جومارت توقاەۆتىڭ باستاماسىمەن «تازا قازاقستان» ەكولوگيالىق اكتسياسى ءوتىپ جاتقالى ەكى جىلدان اسىپ بارادى. جۇرت بولىپ جۇمىلا اتقارعان جۇمىس وسى كۇنى شىن مانىندە ەلدىك سيپات الىپ ۇلگەردى, دەپ حابارلايدى Egemen.kz.
جۋىردا وبلىس اكىمى بەرىك ءۋالي ءوڭىر تۇرعىندارىنا ارنايى بەينەۇندەۋ جاساپ, جالپىوڭىرلىك تازالىق اكتسياسىنا بەلسەندى قاتىسۋعا شاقىرعان بولاتىن.
«اباي وبلىسى – ۇلى تۇلعانىڭ اتىمەن اتالعان, تاريحى تەرەڭ, تابيعاتى كوركەم ءوڭىر. بۇل – ءبىزدىڭ ورتاق ءۇيىمىز. ونى تازا, جايلى, كورىكتى ەتىپ ۇستاۋ – ارقايسىمىزدىڭ ازاماتتىق بورىشىمىز. توعىز جولدىڭ تورابىندا بوي كوتەرىپ, ايماقتىق كولىك-لوگيستيكالىق حابقا اينالىپ كەلە جاتقان سەمەيىمىزدىڭ گەوگرافيالىق ورىنى بىزگە ۇلكەن مۇمكىندىك بەرگەنىمەن, زور جاۋاپكەرشىلىك تە ارتارى بەلگىلى. ايماق ەكونوميكاسى, ونەرى مەن مادەنيەتى, ەكولوگياسى مەن تازالىعى – بارىمىزگە ورتاق. ال تازالىق دەگەنىمىز – ايىنا ءبىر رەت سەنبىلىككە قاتىسۋ ەمەس, بۇل – ءبىزدىڭ وڭىردە كۇندەلىكتى داعدىعا اينالىپ, سالت بولىپ قالىپتاسۋى ءتيىس ۇلكەن مادەنيەت. وسىنى ەسكەرە وتىرىپ, ءبىز بىلتىر ساۋىردە «تازا قازاقستان» باعدارلاماسى اياسىندا وبلىسىمىزدا جالپىوڭىرلىك سەنبىلىك باستاعانبىز», دەدى ايماق باسشىسى.
راسىندا, سونىڭ ناتيجەسىندە تازالىق ناۋقاندارىنا بىلتىر وڭىردە 349 مىڭنان استام تۇرعىن اتسالىسىپ, 52 مىڭ توننا قوقىس شىعارىلدى. كوگالداندىرۋ جۇمىستارىنىڭ ناتيجەسىندە 70 مىڭنان استام كوشەت ەگىلدى. عارىشتىق مونيتورينگ ارقىلى انىقتالعان 191 رۇقسات ەتىلمەگەن قوقىس ورىندارى جويىلدى. وسى يگى ىستەردىڭ زاڭدى جالعاسى رەتىندە وبلىستا 10 اۋدانىندا «ۇلگىلى اۋىل» بايقاۋىن وتكىزگەن. اۋىلدىڭ ينفراقۇرىلىمىن جاقسارتۋ مەن تازالىعىن ساقتاۋ جۇمىستارىنا قاتىسىپ, بەلسەندىلىك تانىتقان 20 اۋىلعا 20 تراكتوردىڭ كىلتى بەرىلگەنىنە كۋا بولعانبىز.
الايدا اتتەگەن-ايلار دا جوق ەمەس. جاۋىردى جابا توقىمداپ, جارامىزدى جاسىرا بەرگەن دە بولماس. كۇنى كەشە ءۇرجار اۋداندا بولعانىمىزدا وسىنداي جايتتارعا تاپ بولعانىمىز بار. جىل سايىن داستۇرگە اينالدىرعان وبلىس اكىمىنىڭ ۇندەۋىنە ءۇن قوسىپ, تۋعان جەردىڭ تازالىعىنا سالعىرت قارايتىن ەلدى مەكەندى كورىپ, قاراداي قارنىمىزدىڭ اشقانى بار. باسقاسىن ايتپاعاندا, اۋدان ورتالىعىنىڭ نەگىزگى كوشەلەرىندە تازالىق تالابى ساقتالماعان. قۇلاعان كارى تەرەكتىڭ دىڭدەرى, شاشىلعان پلاستيك قۇتىلار, تەمەكى تۇقىلى جانە قوقىس جاشىكتەرىنىڭ دە اينالاسى شاشىلىپ جاتقانىن كوردىك.
وسىعان بايلانىستى اۋداندىق اكىمدىكتەن ءمان-جايدى سۇراپ كورگەنبىز. اۋداندىق تۇكش, جولاۋشىلار كولىگى جانە اۆتوموبيل جولدارى ءبولىمىنىڭ باسشىسى ە. جۇماشەۆتىڭ بەرگەن مالىمەتىنشە, «تازا قازاقستان» ەكولوگيالىق باعدارلاماسى اياسىندا ءۇرجار اۋدانىندا سانيتارلىق تازالىق, كوگالداندىرۋ جانە اباتتاندىرۋ جۇمىستارى جۇيەلى جۇرگىزىلىپ كەلەدى ەكەن. بيىل كوكتەمنەن بەرى اۋدان كولەمىندە بىرنەشە سەنبىلىك ۇيىمداستىرىلىپ, وعان ەلدى مەكەن تۇرعىندارى, كاسىپكەرلەر مەن مەكەمە قىزمەتكەرلەرى بەلسەندى قاتىسقان. ناتيجەسىندە جۇزدەگەن توننا قاتتى تۇرمىستىق قالدىق شىعارىلىپ, كوشەتتەر وتىرعىزىلىپ, ارىقتار مەن قوعامدىق ورىندار تازارتىلعان. سونىمەن قاتار زاڭسىز قوقىس توگۋ ورىندارىنا ەسكەرتۋ تاقتايشالارى مەن بەينەكامەرالار ورناتىلعان.
«سونداي-اق ءۇرجار اۋىلىندا جاڭا تۇرمىستىق قاتتى قالدىقتار پوليگونىنىڭ جوبالىق-سمەتالىق قۇجاتتارى ازىرلەنىپ جاتىر. بۇعان قوسا, اۋداندا قاتتى تۇرمىستىق قالدىقتاردى شىعارۋمەن اينالىساتىن «تازا ءۇرجار» جشس جۇمىسىن باستاپ, تۇرعىندارعا قىزمەت كورسەتە باستاعان», دەيدى ءبولىم باسشىسى.
ونىڭ بەرگەن مالىمەتىنشە, بيىل 30 ساۋىردە سەنبىلىك وتكەن, وعان 130 ادام قاتىسقان, 43 توننا قوقىس شىعارىلعان, 600م ارىق تازالانعان, 6 دانا تەحنيكا تارتىلعان. ياعني قاعازدا ءبارى «قانتتاي», ال كورىنىس كوڭىل كونشىتەرلىك ەمەس ەكەنىن ءبىز تۇسىرگەن فوتوسۋرەتتەردەن بايقاۋعا بولادى.
اباي وبلىسى, ءۇرجار اۋدانى