كونستيتۋتسيالىق زاڭنىڭ نەگىزگى ماقساتى – الاتاۋ قالاسىنىڭ قارقىندى ءارى ورنىقتى دامۋى ءۇشىن جاعداي جاساۋ.
قالانىڭ ەرەكشە قۇقىقتىق مارتەبەسىنە ساي يننوۆاتسيالار, ينۆەستيتسيالار جانە ەكونوميكالىق ءوسىم ءۇشىن قولايلى ورتا قۇرۋعا باعىتتالعان دەربەس ەكوجۇيەنى قالىپتاستىرۋدى كوزدەيتىن تۇبەگەيلى جاڭا تاسىلدەر قولدانىلادى.
كونستيتۋتسيالىق زاڭعا سايكەس, قالانى مەملەكەتتىك باسقارۋدىڭ جاڭا مودەلى ەنگىزىلدى. اتاپ ايتقاندا, كاسىپكەرلىك, كەدەن ءىسى, تسيفرلىق اكتيۆتەر, قۇمار ويىندارى, الەۋمەتتىك سالا, قارجى نارىعى, ارحيتەكتۋرا مەن قالا قۇرىلىسى, ەكولوگيا ءارى قورشاعان ورتانى قورعاۋ, مادەنيەت, سپورت جانە تاعى باسقا سالالاردى رەتتەۋدىڭ نەگىزگى قاعيدالارى بەلگىلەندى.
قاسىم-جومارت توقاەۆ: الاتاۋ قالاسى جاڭا ينۆەستيتسيالىق كەزەڭنىڭ نەگىزگى جوباسى بولۋعا ءتيىس
«الاتاۋ رەزيدەنتى» قۇقىقتىق مارتەبەسى بەكىتىلدى. ارناۋلى مارتەبەنى اكىمشىلىك بىرقاتار سانات بويىنشا جەكە جانە زاڭدى تۇلعالارعا بەرەدى. ارنايى رەجيمنىڭ قولدانىلۋ كولەمى مەن ءتيىستى قۇقىقتار, مىندەتتەر مەن تالاپتار وسى رەزيدەنت مارتەبەسىنە قاراي انىقتالادى.
شاھاردىڭ ۇزاق مەرزىمدى ينۆەستيتسيالىق جانە تەحنولوگيالىق وركەندەۋى ستراتەگيالىق قۇجاتتار نەگىزىندە قامتاماسىز ەتىلەدى. ناقتى ايتقاندا, الاتاۋ قالاسىنىڭ ۇزاق مەرزىمدى دامۋ جوسپارى, ماستەر-جوسپارى جانە دامىتۋ ستراتەگياسى قابىلدانادى.
الاتاۋ قالاسىنىڭ قاۋىپسىزدىگىن, سونداي-اق «اقىلدى قالا» رەتىندە ءتيىمدى جۇمىس ىستەۋى مەن دامۋىن قامتاماسىز ەتۋ ماقساتىندا ينفراقۇرىلىم نىساندارى مەن قوعامدىق قاۋىپسىزدىكتى قامتاماسىز ەتۋ جۇيەلەرىنىڭ بارلىق دەرەگى بىرىڭعاي تسيفرلىق باسقارۋ پلاتفورماسىنا بىرىكتىرىلەدى.
سونىمەن قاتار قالانىڭ ينۆەستيتسيالىق كليماتى مەن ينۆەستورلارعا بەرىلەتىن كەپىلدىكتەرى, سالىق-بيۋدجەت ساياساتى, ديزاينى مەن جەر قاتىناستارى اتالعان كونستيتۋتسيالىق زاڭ اياسىندا رەتتەلەدى.
