اقمولا وبلىسىنداعى تسەلينوگراد اۋدانىنىڭ ورتالىعى – اقمول اۋىلىندا ۇستىمىزدەگى جىلدىڭ 9 مامىرىندا ەكى مارتە كەڭەس وداعىنىڭ باتىرى تالعات بيگەلدينوۆ پەن حالىق قاھارمانى راقىمجان قوشقارباەۆقا ارنالعان قوس ءبيۋستتىڭ جانە وسى اۋداننان سوعىسقا قاتىسقان جانە تىلدا ەڭبەك ەتكەن ازاماتتاردىڭ ەسىمدەرى قاشالىپ جازىلعان ەسكەرتكىش تاقتانىڭ اشىلۋ سالتاناتى ءوتتى.
بۇل وڭىردەن سوعىسقا 2 019 بوزداق اتتانىپتى. ولار باسقىنشىلارعا قارسى ايانباي كۇرەسىپ, ەرلىكتىڭ جارقىن ۇلگىسىن كورسەتە ءبىلدى. سول سياقتى, تىل ەڭبەككەرلەرىنىڭ دە جەڭىستى جاقىنداتۋعا قوسقان ۇلەسى ەرەكشە. بۇگىندە ولاردىڭ جانقيارلىق ەرلىكتەرى مەن ەرەن ەڭبەكتەرىن ۇمىتپاي, ۇرپاق جادىندا جاڭعىرتۋ ماقساتىندا كوپتەگەن جۇمىستار اتقارىلۋدا. وسىناۋ يگى ىستەردىڭ ءبىرى رەتىندە, اقمول اۋىلىنىڭ ورتالىق الاڭىنا وسى ايماقتان شىققان ارداگەرلەردىڭ ەسىمدەرى جازىلعان ەسكەرتكىش تاقتانىڭ اشىلعانىن ايتار ەدىك.
تاعى ءبىر ەرەكشە توقتالا كەتەر جايت, ەكى مارتە كەڭەس وداعىنىڭ باتىرى تالعات بيگەلدينوۆ پەن حالىق قاھارمانى راقىمجان قوشقارباەۆ ءدال وسى وڭىردە دۇنيەگە كەلىپ, مايدانعا وسى ايماقتان اتتانعان-دى. سوندىقتان دا, قوس باتىردىڭ ءوز اۋداندارىنىڭ تۋماسى ەكەنىن ماقتان تۇتاتىن جەرلەستەرى ولاردىڭ ەڭسەلى ءمۇسىندەرىن اقمول اۋىلىنىڭ كورنەكتى جەرىنە قويىپ, كوڭىلدەرىن دەمدەدى.
ارداقتى تۇلعالارعا ارنالعان ەسكەرتكىشتەردىڭ اشىلۋى راسىمىنە راقىمجان قوشقارباەۆتىڭ اپاسى رىمجان مۇسابەكقىزى جانە تالعات بيگەلدينوۆتىڭ ۇلى تالعات تالعات ۇلى قاتىسىپ, وسىناۋ يگى شارانى ۇيىمداستىرعان ەل اعالارىنا, تسەلينوگراد اۋدانىنىڭ حالقىنا العىستارىن ءبىلدىردى.
رىمجان مۇسابەكقىزى:
– بۇل كىسىگە دەر كەزىندە اتاق بەرىلمەسە دە, حالقى باتىر دەپ اتاعان. قاھارمان اتاعىن ءوزى ومىردەن وزعاننان كەيىن 11 جىلدان سوڭ بەردى. ەندى, مىنە, ەسكەرتكىشى قويىلدى دەگەننەن كەيىن ارنايى كەلىپ تۇرمىن. ەل اعالارىنا, وزدەرىنىڭ باتىر ۇلدارىن قۇرمەتتەگەن حالىققا راحمەت, – دەدى.
ءوز كەزەگىندە تالعات بيگەلدينوۆتىڭ ۇلى تالعات تالعات ۇلى دا جۇرەكجاردى ءسوزىن ارناپ, اكەسىن ارداق تۇتقان جاماعاتقا جىلى لەبىزىن ارنادى.
ال وبلىس, اۋدان باسشىلارى باتىرلاردىڭ بۇل ەرلىگى بۇگىنگى ەلگە ەستەلىك, ەرتەڭگى وسكەلەڭ ۇرپاققا ونەگە ەكەنىن, سول سەبەپتى دە, ەرلەرىمىزدى ۇلىقتاپ, ەسكەرتكىش قويعاندى ءجون دەپ ساناعاندارىن جەتكىزدى.
باتىرلاردى قاستەرلەگەن وسىناۋ سالتاناتتى شارا بارىسىندا حالىققا اۋدان ونەرپازدارى جىردان شاشۋ شاشىپ, مەرەكەلىك كوڭىل-كۇي سىيلادى.
دانا الدانقىزى,
تسەلينوگراد اۋداندىق
اكىمدىگىنىڭ ءباسپاسوز حاتشىسى.
اقمولا وبلىسى.