ەلوردادا قازاقستانداعى رەسەيدىڭ مادەنيەت كۇندەرى اياسىندا رەسەي كينوسى فەستيۆالى شىمىلدىعىن ءتۇردى. 26 ساۋىرگە دەيىن جالعاساتىن مادەني شارا ەكى ەل اراسىنداعى گۋمانيتارلىق جانە شىعارماشىلىق بايلانىستى نىعايتۋعا باعىتتالعان, دەپ حابارلايدى Egemen.kz.
فەستيۆالدىڭ اشىلۋ راسىمىندە «روسكينو» ۇيىمىنىڭ باس ديرەكتورى ەلزا انتونوۆا رەسەي فەدەراتسياسىنىڭ مادەنيەت ءمينيسترى ولگا ليۋبيموۆانىڭ قۇتتىقتاۋ حاتىن وقىپ بەردى. قۇتتىقتاۋ حاتتا ونەر مەن كينەماتوگرافيا ارقىلى ىنتىماقتاستىقتى تەرەڭدەتۋدىڭ ماڭىزى اتاپ وتىلگەن.
ەلزا انتونوۆا ءوز سوزىندە «روسكينو» جىل سايىن الەمنىڭ ءار تۇكپىرىندە وسىنداي فەستيۆالدەر وتكىزەتىنىن ايتىپ, قازاقستانداعى كينو مەرەكەسىنىڭ ورنى ەرەكشە ەكەنىن جەتكىزدى. ونىڭ ايتۋىنشا, بيىلعى باعدارلاماعا رەسەيلىك پروكاتتا جوعارى باعالانعان, زاماناۋي كينونىڭ جانرلىق ارتۇرلىلىگىن قامتيتىن تۋىندىلار ەنگىزىلگەن.
تەاتر, كينو جانە ديالوگ: استانادا رەسەيدىڭ مادەنيەت كۇندەرى وتەدى
ش. ايمانوۆ اتىنداعى «قازاقفيلم» اق پرەزيدەنتىنىڭ مىندەتىن اتقارۋشى ايدار وماروۆ مۇنداي باستامالار مادەني بايلانىستاردى تەرەڭدەتىپ قانا قويماي, ۇلتتىق كينو ءوندىرىسىن دامىتۋعا دا سەرپىن بەرەتىنىن اتاپ ءوتتى.
فەستيۆال «پەرۆىي نا وليمپە» سپورت دراماسىنىڭ كورسەتىلىمىمەن اشىلدى. جالپى, 4 كۇن بويى كورەرمەندەرگە 7 رەسەيلىك فيلم تەگىن ۇسىنىلادى. ولاردىڭ قاتارىندا «اۆياتور», «بۋراتينو», «چەبۋراشكا 2», «كراسنىي شەلك», «تري كوتا. پۋتەشەستۆيە ۆو ۆرەمەني» جانە «اۆگۋست» كارتينالارى بار.
باعدارلاما اياسىندا دەلەگاتسيا وكىلدەرىمەن كەزدەسۋلەر مەن شىعارماشىلىق باعىتتا ءبىلىم الىپ جۇرگەن ستۋدەنتتەرگە ارنالعان شەبەرلىك ساباقتارى جوسپارلانعان. سونىمەن قاتار كورەرمەندەر «اۆياتور» ءفيلمىنىڭ اكتريساسى داريا كۋكارسكايامەن جانە «پەرۆىي نا وليمپە» كارتيناسىندا ويناعان اكتەر انتون ساۆۆاتيموۆپەن جۇزدەسۋگە مۇمكىندىك الادى.
قازاقستان مەن رەسەي مادەنيەت سالاسىندا قانداي جوبالاردى جۇزەگە اسىرماق؟