پولشانىڭ كرىنيتسا-زدرۋي قالاسىندا شايبالى حوككەيدەن جاسوسپىرىمدەر اراسىندا IA ديۆيزيونىنىڭ الەم چەمپيوناتى ءوتىپ جاتىر. اتالعان تۋرنيردە قازاقستاننىڭ جاسوسپىرىمدەر قۇراماسى ەليتالى ديۆيزيونعا جولداما الۋ ءۇشىن سىنعا ءتۇسىپ جاتىر, دەپ حابارلايدى Egemen.kz.
جارىستا قازاقستان قۇراماسىمەن قاتار پولشا, ماجارستان, ۋكراينا, شۆەيتساريا جانە سلوۆەنيا قۇرامالارى دا باق سىناپ جاتىر. الەم چەمپيوناتىندا قازاقستان قۇراماسى ازىرگە ءۇش ماتچ وتكىزىپ, بارلىعىندا جەڭىسكە جەتتى. قازىرگى تاڭدا قازاقستان قۇراماسى 9 ۇپايمەن تۋرنير كەستەسىندە كوش باستاپ كەلەدى.
العاشقى تۋردا قازاقستان قۇراماسى ماجارستاندى 5:2 ەسەبىمەن جەڭسە, ەكىنشى تۋردا پولشا قۇراماسىن 10:2 ەسەبىمەن تىزە بۇكتىردى. ءۇشىنشى تۋردا ۋكراينا قۇراماسىنا قارسى كەزدەسۋدە وتاندىق حوككەيشىلەر كامبەك جاساپ, جەڭىسكە جەتتى. كەزدەسۋدىڭ 25-مينۋتىنا دەيىن قازاقستان قۇراماسى 0:3 ەسەبىمەن ۇتىلىپ جاتقان ەدى. الايدا ماكسيم حۋدياكوۆتىڭ شاكىرتتەرى قارسىلاس قاقپاسىنا جاۋاپسىز بەس شايبا سوقتى – 5:3.
قازاقستان قۇراماسى كەلەسى كەزدەسۋىن 23 ساۋىردە شۆەيتساريا قۇراماسىنا قارسى وتكىزەدى. ويىن ەلوردا ۋاقىتىمەن 15:30-دا باستالادى. ال توپتىق كەزەڭدەگى سوڭعى ماتچ 24 ساۋىردە (ساعات 15:30-دا) سلوۆەنيا قۇراماسىنا قارسى وتەدى.
ايتا كەتەيىك, تۋرنير قورىتىندىسى بويىنشا ءبىرىنشى ورىن العان كوماندا ەليتالى ديۆيزيونعا جولداما الادى.