استانا. 27 ناۋرىز. ساۋد ارابياسى مەن ونىڭ وداقتاستارى يەمەندى بومبىلاۋدى جالعاستىرىپ جاتىر. بۇل تۋرالى «كوممەرسانت» حابارلادى.
حابارلانعانداي, اراب كواليتسياسىنىڭ حۋسيتتەرگە قارسى اسكەري وپەراتسياسى قارسىلاستىڭ ونداعان ادام قۇربان ەتكەن.
«ساۋد ارابياسى مەن ونىڭ وداقتاستارى ەلدىڭ استاناسى سانا قالاسىنا اۋەدەن سوققى بەرىپ, يەمەنگە قارسى اسكەري وپەراتسياسىن جالعاستىرۋدا. يەمەننىڭ دەنساۋلىق ساقتاۋ مينيسترلىگى ونداعان ادامنىڭ ءولىپ, جارالانىپ قالعاندارىن, اراسىندا بەيبىت تۇرعىنداردىڭ دا بار ەكەنىن مالىمدەدى», - دەلىنگەن حابارلامادا.
يەمەننىڭ دەنساۋلىق ساقتاۋ مينيسترلىگىنىڭ وكىلدەرى مەن جەرگىلىكتى باسقا دا شەنەۋنىكتەردىڭ مالىمەتتەرىنە سۇيەنگەن بۇقارالىق اقپارات قۇرالدارى اسكەري وپەراتسيانىڭ العاشقى كۇنىنىڭ وزىندە 40-تان 65-كە دەيىنگى ادام سانىنىڭ قۇرباندىققا ۇشىراعانىن جازىپ وتىر.
ەسكە سالا كەتەيىك, سوڭعى ايلاردا يەمەن تەرريتورياسىنىڭ جارتى اۋماعى ەلدىڭ پرەزيدەنتى مانسۋر حاديگە قارسى سوعىس ارەكەتتەرىن جاساپ جاتقان جانە يراننىڭ قولداۋىنا يە بولعان شيت توبىرلارى – حۋسيتتەردىڭ قولدارىنا كوشكەن بولاتىن. ال 26 ناۋرىز كۇنى يراننىڭ مۇسىلمان الەمىندەگى ءبىرىنشى قارسىلاسى – ساۋد ارابياسى كورشى يەمەن جەرىندە «شەشىمدىلىك داۋىلى» دەپ اتالاتىن اسكەري وپەراتسياسىن باستادى.
ازىرگە ءسوز بىروڭكەي اۋەدەن سوققى جاساۋ وپەراتسياسى تۋرالى عانا بولىپ وتىر. ازىرگە ولار يەمەننىڭ استاناسى – سانا قالاسىنداعى اەروپورت پەن اسكەري نىسانعا, ەلدىڭ سولتۇستىگىندەگى ساادا پروۆينتسياسىنا بەرىلىپ جاتىر. ناۋرىزدىڭ 27-ءسى كۇنى تۇندە استانانىڭ وڭتۇستىگىندەگى رەسپۋبليكالىق گۆاردياعا, ىشكى ىستەر اسكەرلەرى شتابىنا تاعى سوققى جاسالعان, اۋە شابۋىلىنا سونداي-اق شيت ب ۇلىكشىلەرىنىڭ سااداداعى جانە لاحدجداعى لاگەرلەرى مەن باسقارۋ پۋنكتتەرى دە ۇشىراعان.
بەيسەنبى كۇنى كەشكە ساۋد ارابياسى مەن ونىڭ وداقتاستارىنىڭ حالىقارالىق وپەراتسياسىن اراب مەملەكەتتەرى ليگاسى سىرتقى ىستەر مينيسترلىگىنىڭ كەڭەسى قولدادى. بۇدان بۇرىن بۇل كواليتسياعا كۋۆەيت, باحرەين, ءباا جانە كاتار قوسىلدى, سودان كەيىن يوردانيا, پاكستان, ەگيپەت جانە سۋدان اسكەري وپەراتسيانى بۇدان ءارى قولداپ اكەتۋگە دايىن ەكەندەرىن مالىمدەدى.
بۇگىن يەمەن پرەزيدەنتى ءحاديدىڭ ەلدەن كەتىپ, ساۋد ارابياسىنا كەلىپ العانى بەلگىلى بولدى.
رەسەي سىرتقى ىستەر ءمينيسترى سەرگەي لاۆروۆ يەمەندەگى جاعدايعا تۇسىندىرمە بەرە كەلىپ, شيەلەنىستى بەيبىت جولمەن شەشۋگە شاقىردى جانە ونى ۋكراينادا بولعان جاعدايمەن سالىستىردى. رەسەي ءمينيسترىنىڭ پىكىرىنشە, «ەكىجۇزدىلىك ستاندارت» ۇستانعان اقش بۇل جەردە ەلدەن قاشىپ كەتكەن يەمەننىڭ پرەزيدەنتىنە قولداۋ كورسەتەدى دە, ونى ءدال سونداي احۋالعا تاپ بولعان ۋكراينانىڭ بۇرىنعى پرەزيدەنتى ۆيكتور يانۋكوۆيچكە جاسامايدى.
مۇرات ايتقوجا.
مانبە, سۋرەت: كوممەرسانت.