ا.بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتىندە وتكەن «بايتۇرسىنوۆ وقۋلارى–2015» حالىقارالىق عىلىمي-تەوريالىق كونفەرەنتسياسى بۇل جولى «نۇرلى جول» دامۋ باعدارلاماسى: ءبىلىم-عىلىم-ءوندىرىس» تاقىرىبىنا ارنالدى. كونفەرەنتسياعا رەسەيدەن, تۇركيادان, قىرعىزستاننان, قازاقستاننىڭ وبلىستارىنان عالىمدار مەن ماگيسترانتتار قاتىستى. وندا ا.بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتىنىڭ رەكتورى, ۆەتەريناريا عىلىمدارىنىڭ دوكتورى, پروفەسسور اسقار نامەتوۆ «ەلىمىزدىڭ يندۋستريالىق-يننوۆاتسيالىق دامۋى ءۇشىن جاڭا فورماتسيادا ماماندار دايىنداۋدىڭ ماڭىزى», رەسەيدىڭ چەليابى مەملەكەتتىك ۋنيۆەرسيتەتىنىڭ وقۋ ءىسى جونىندەگى پرورەكتورى, فيلولوگيا عىلىمدارىنىڭ دوكتورى, پروفەسسور ليليا نەفەدوۆا «شەت ءتىلى سالاسىندا پاراديگمدى ۇيىمداستىرۋ», جانبول جىلباەۆ «قورشاعان ورتانى قورعاۋدان – تۇراقتى دامۋعا جانە «جاسىل ەكونوميكاعا: قازاقستانداعى ءبىلىم بەرۋ سالاسىنداعى ەكولوگيزاتسيانىڭ حالىقارالىق مازمۇنى» جونىندە تەرەڭ باياندامالار جاسادى.
حالىقارالىق عىلىمي-تەوريالىق كونفەرەنتسياعا قاتىسۋشىلار دوڭگەلەك ۇستەل ءماجىلىسىندە جوعارى مەكتەپتە ءبىلىم بەرۋ پروتسەسىنىڭ ماڭىزدى ماسەلەلەرىن قوزعادى. سونىمەن قاتار, عالىمدار مەن ىزدەنۋشىلەر بىرنەشە سەكتسياعا ءبولىنىپ, تاقىرىپتار بويىنشا عىلىمي تالقىلاۋعا قاتىستى. بۇل كونفەرەنتسيانىڭ جىلداعىدان ەرەكشەلىگى وعان عىلىم كوگىنە تالپىنعان ماگيسترانتتار كوپ كەلدى. قازاقتىڭ قىزدار مەملەكەتتىك پەداگوگيكالىق ۋنيۆەرسيتەتىنىڭ ماگيسترانتتارى ۇلدانا بيسەنبيەۆا كۇرىش جارماسىنان سپيرت الۋدىڭ تەحنولوگيالىق ۇلگىسىن جاساۋدى, بانۋ دياروۆا كوكساعىز ءوسىمدىگى قۇرامىنداعى امين قىشقىلدارىن زەرتتەۋدى قولعا الىپتى. ماگيستراتۋرانىڭ ەكىنشى كۋرسىندا وقيتىن ولار عىلىمي ەڭبەگىنىڭ وندىرىسكە ەنگىزىلەتىنىنە, بولاشاعىنا سەنىمدى.
ءنازيرا جارىمبەتوۆا, «ەگەمەن قازاقستان».
قوستاناي.