ابىلقاس ساعىنوۆ اتىنداعى قاراعاندى تەحنيكالىق ۋنيۆەرسيتەتىنىڭ اسكەري كافەدراسىندا «ۇشقىشسىز باسقارىلاتىن اۆياتسيالىق جۇيەلەر» باعىتى ىسكە قوسىلىپ, زاپاستاعى وفيتسەرلەردى دايارلاۋ اۋقىمى كەڭەيتىلدى. قازىر بۇل باعىتتا 35 ستۋدەنت ءبىلىم الىپ جاتىر, دەپ جازادى Egemen.kz.
جاڭا باعدارلاما بارلاۋ جانە توپوگەودەزيا باعىتى بويىنشا جۇرگىزىلەدى. بولاشاق وفيتسەرلەر درونداردى باسقارۋمەن قاتار دەرەكتەردى تالداۋ, جەرگىلىكتى جەردى باعدارلاۋ, شەشىم قابىلداۋ جانە كوماندالىق قۇرامدا ۇيلەسىمدى ارەكەت ەتۋدى مەڭگەرەدى. ولاردىڭ ىشىندە 15 ستۋدەنت وپەراتور, ال 20 ستۋدەنت ەسەپتوپ كومانديرى رەتىندە دايىندالىپ جاتىر.
وقىتۋدىڭ باستاپقى كەزەڭى ارنايى جابدىقتالعان سىنىپتاردا وتەدى. مۇندا كاسىبي باسقارۋ پۋلتتەرى بار اۆتوماتتاندىرىلعان جۇمىس ورىندارى قاراستىرىلعان. كۋرسانتتار العاشقىدا ترەناجەرلەردە دايىندالىپ, تەك نورماتيۆتەردى تاپسىرعاننان كەيىن عانا ناقتى ۇشۋلارعا جىبەرىلەدى.
تاجىريبەلىك ساباقتار ىشكى پوليگوندا جانە كۇردەلى جاعدايلاردا وتەدى. بولاشاق وپەراتورلار اۋە بارلاۋىن جۇرگىزۋ, نىسانداردى انىقتاۋ, دەرەكتەردى ناقتى ۋاقىتتا جەتكىزۋ جانە ينتەرنەتسىز اۆتونومدى بايلانىس ارنالارىمەن جۇمىس ىستەۋ داعدىلارىن مەڭگەرەدى.
اتىراۋدا ماسالارعا قارسى كۇرەسكە دروندار تارتىلادى: بيۋدجەتتەن 200 ملن تەڭگە ءبولىندى
دايىندىقتىڭ سوڭعى كەزەڭىندە ستۋدەنتتەر اتىس جۇيەلەرىمەن ينتەگراتسيالانعان جۇمىس ىستەۋدى ۇيرەنەدى. ولار نىساننىڭ ناقتى كوورديناتتارىن انىقتاپ, وق اتۋدى رەتتەۋ جانە تاپسىرمالاردى جوعارى دالدىكپەن ورىنداۋ ماشىعىن قالىپتاستىرادى.
«مامانداردى دايارلاۋ تەوريالىق ءبىلىمدى, پراكتيكالىق داعدىلاردى جانە ستۋدەنتتەردىڭ موتيۆاتسياسىن ەسكەرە وتىرىپ جۇرگىزىلەدى. كوماندالىق جۇمىس پەن جوعارى تەحنولوگيالىق تەحنيكانى باسقارۋعا دەگەن كاسىبي قىزىعۋشىلىققا ءجىتى كوڭىل بولىنەدى. بولاشاق وفيتسەرلەر ۇشقىشسىز باسقارىلاتىن قۇرىلعىلاردى باسقارۋ جارىستارىندا تابىستى ونەر كورسەتىپ ءجۇر. سونىڭ ىشىندە AITU KazRoboDrone سايىسىنداعى ناتيجەنى ايتۋعا بولادى. وتكەن جىلى ۋنيۆەرسيتەت كومانداسى رەسپۋبليكالىق دەڭگەيدە ءبىرىنشى ورىن, ال حالىقارالىق ارەنادا ءتورتىنشى ورىن يەلەندى», دەدى «ارنايى اسكەرلەردى ۇرىستا قولدانۋ» تسيكلىنىڭ باسشىسى زاپاستاعى پودپولكوۆنيك مارات يستەمەسوۆ.
دايىندىق تولىقتاي تاجىريبەگە نەگىزدەلگەن. كۋرسانتتار ۆيرتۋالدى ترەناجەرلەردەن باستاپ كۇردەلى تاكتيكالىق تاپسىرمالاردى ورىنداۋعا دەيىنگى كەزەڭدەردەن وتەدى. وقۋ بارىسىندا زاماناۋي بارلاۋ دروندارى مەن FPV-دروندار قولدانىلادى.
ستۋدەنتتەر تەحنيكا قۇرىلىمىن مەڭگەرىپ, اپپاراتتاردى جيناۋ جانە باعدارلامالاۋ داعدىلارىن يگەرەدى, سونداي-اق شەكتەۋلى بايلانىس پەن راديوەلەكتروندىق كەدەرگىلەر جاعدايىندا ارەكەت ەتۋگە ۇيرەنەدى.
باتىس قازاقستان وبلىسىنا قۇلاعان درون قاي ەلگە تيەسىلى؟