الماتىدا اۋا ساپاسىن باقىلاۋ جۇيەسىن كەڭەيتۋ جوسپارلانىپ وتىر. ءماسليحات وتىرىسىندا قالانىڭ ءار اۋدانىنداعى اتموسفەرالىق اۋانىڭ جاي-كۇيى تۋرالى دەرەكتەردى ناقتى ۋاقىت رەجيمىندە الۋعا مۇمكىندىك بەرەتىن 20 جىلجىمالى ەكولوگيالىق ستانتسيانى ساتىپ الۋ ماسەلەسى قارالدى, دەپ حابارلايدى Egemen.kz.
«قازىرگى تاڭدا الماتىدا 16 ستاتسيونارلىق باقىلاۋ بەكەتى جۇمىس ىستەيدى. الايدا ولاردىڭ مۇمكىندىكتەرى شاھار اۋماعىن تولىق قامتۋعا جانە لاستانۋدىڭ جەرگىلىكتى كوزدەرىن جەدەل انىقتاۋعا جەتكىلىكسىز. جاڭا جىلجىمالى ستانتسيا قالانىڭ كەز كەلگەن نۇكتەسىنە ورنالاستىرىلىپ, اۋا ساپاسىنىڭ ناشارلاۋىنا قانداي فاكتورلار اسەر ەتەتىنىن انىقتاۋعا كومەكتەسەدى. اتاپ ايتقاندا, كولىك قوزعالىسىنىڭ قارقىندىلىعى, ءوندىرىس ورىندارىنىڭ قىزمەتى نەمەسە قاتتى وتىندى پايدالانۋ سياقتى سەبەپتەردى ايقىنداۋعا مۇمكىندىك بەرەدى», دەلىنگەن اقپاراتتا.
الماتىدا اۋا ساپاسىن باقىلاۋعا ارنالعان تاعى 30 داتچيك ورناتىلدى
جينالعان دەرەكتەر ەكولوگيا, قوعامدىق كولىكتى دامىتۋ, گازداندىرۋ جانە زياندى شىعارىندىلاردى ازايتۋ سالالارىندا الداعى شەشىمدەردى قابىلداۋعا نەگىز بولادى.
بۇل ستانتسيالار جۇزەگە اسىرىلىپ جاتقان ەكولوگيالىق جوبالاردىڭ تيىمدىلىگىن باعالاۋعا جانە الماتىداعى اۋا ساپاسىن جاقسارتۋ بويىنشا ناقتى ءارى ءتيىمدى شارالاردى قابىلداۋعا مۇمكىندىك بەرەدى.
ايتا كەتەيىك, «قازتسينك» كومپانياسى وسكەمەندەگى زاۋىتتا بولعان جارىلىس پەن ورتتەن كەيىنگى ەكولوگيالىق احۋالعا قاتىستى مالىمدەمە جاسادى.