فوتو: Polisia.kz
الاياقتار مەملەكەتتىك قىزمەتتەرگە دەگەن سەنىمدى پايدالانىپ, ازاماتتاردىڭ جەكە دەرەكتەرىن يەمدەنۋگە تىرىسادى. جابىرلەنۋشىلەردىڭ ۇيالى تەلەفوندارىنا مەملەكەتتىك بايلانىس ورتالىعىنىڭ نومىرىنە ۇقساس نومىردەن حابارلاما كەلىپ تۇسەدى. وندا سىزگە اكىمشىلىك ايىپپۇل سالىنعانى تۋرالى جالعان اقپارات بەرىلەدى جانە ونى تەكسەرۋ نەمەسە تولەۋ ءۇشىن سىلتەمە ۇسىنىلادى.
سىلتەمە رەسمي پورتالعا ۇقساس بولۋى مۇمكىن, الايدا بۇل – جالعان سايت. الاياقتار ونى «eGov» پورتالىنا ۇقساتىپ ارنايى جاسايدى. ەڭ قاۋىپتىسى – كەز كەلگەن كولىك ءنومىرىن نەمەسە جسن ەنگىزگەن كەزدە دە جۇيە «ايىپپۇل بار» دەگەن جالعان اقپاراتتى كورسەتۋى.
پسيحولوگيالىق قىسىم ءتاسىلى – ازاماتتاردى شۇعىل شەشىم قابىلداۋعا يتەرمەلەۋگە باعىتتالعان. جالعان سايتتا «تولەۋ» باتىرماسىن باسقان جاعدايدا, پايدالانۋشىدان بانك كارتاسىنىڭ تولىق دەرەكتەرىن ەنگىزۋ سۇرالادى. وسى دەرەكتەردى العان ساتتە الاياقتار قارجىنى زاڭسىز شەشىپ الۋى مۇمكىن.
مامانداردىڭ ايتۋىنشا, الاياقتىقتىڭ باستى بەلگىسى – قاتە دەرەك ەنگىزىلگەنىنە قاراماستان, جۇيەنىڭ ءاردايىم «ايىپپۇل بار» دەپ كورسەتۋى. بۇل – قولدانۋشىنى اداستىرىپ, سەنىم قالىپتاستىرۋعا باعىتتالعان ءتاسىل.
قۇقىق قورعاۋ ورگاندارى ازاماتتارعا مىنا تالاپتاردى قاتاڭ ساقتاۋعا كەڭەس بەرەدى:
- كۇماندى سىلتەمەلەردى اشپاۋ;
- جەكە جانە بانك دەرەكتەرىن بوگدە سايتتارعا ەنگىزبەۋ;
- بەلگىسىز جانە شۇعىل ارەكەت تالاپ ەتەتىن حابارلامالارعا سەنبەۋ;
- ايىپپۇلداردى تەك رەسمي جانە سەنىمدى پلاتفورمالار ارقىلى تەكسەرۋ.
سونداي-اق, مەملەكەتتىك ورگاندار ەشقاشان SMS ارقىلى بانكتىك دەرەكتەردى سۇرامايتىنى ەسكەرتىلەدى.
پوليتسيا ازاماتتاردى تسيفرلىق قاۋىپسىزدىك تالاپتارىن ساقتاۋعا شاقىرادى. ساقتىق – الاياقتىقتىڭ الدىن الۋدىڭ ەڭ ءتيىمدى جولى.
ينتەرنەت-الاياقتىققا قارسى ناقتى ناتيجە: جەتىسۋدا 600 مىڭ تەڭگە قايتارىلدى
