كەشە سەنات سپيكەرى ماۋلەن اشىمباەۆتىڭ توراعالىعىمەن بيۋرو ءوتتى. دەپۋتاتتار 9 ساۋىردەگى پالاتا وتىرىسىنىڭ كۇن ءتارتىبىن ايقىندادى.
بەيسەنبىدە وتەتىن پالاتانىڭ الداعى وتىرىسىندا سەناتورلار «ازەربايجان رەسپۋبليكاسى, قازاقستان رەسپۋبليكاسى جانە وزبەكستان رەسپۋبليكاسى اراسىنداعى جاسىل ەنەرگيانى ءوندىرۋ جانە بەرۋ سالاسىنداعى ستراتەگيالىق ارىپتەستىك تۋرالى كەلىسىمدى راتيفيكاتسيالاۋ تۋرالى» قر زاڭىن قارايدى. ىنتىماقتاستىق ەكولوگيالىق تازا سۋتەگى مەن اممياكتى بىرلەسىپ ءوندىرۋدى جانە ساتۋدى, سونداي-اق ەلدەر اراسىندا جاڭارتىلاتىن ەنەرگيانى ۇزدىكسىز بەرۋ ءۇشىن بىرىڭعاي تەحنيكالىق جانە اكىمشىلىك ەرەجەلەردى ازىرلەۋدى كوزدەيدى.
كۇن تارتىبىندەگى كەلەسى ماسەلە «تمد-عا قاتىسۋشى مەملەكەتتەردىڭ رادياتسيالىق جاعداي مونيتورينگىنىڭ دەرەكتەرىمەن الماسۋ كەزىندەگى ءوزارا ءىس-قيمىلى تۋرالى كەلىسىمدى راتيفيكاتسيالاۋ تۋرالى» قر زاڭى بولماق. كەلىسىم رادياتسيالىق جاعداي مونيتورينگىنىڭ دەرەكتەرىمەن الماسۋ, تالداۋ جانە بولجاۋ ارقىلى ءوزارا ءىس-قيمىل تيىمدىلىگىن ارتتىرۋعا جانە يادرولىق ءارى رادياتسيالىق قاۋىپسىزدىكتى قامتاماسىز ەتۋگە باعىتتالعان.
سونىمەن قاتار دەپۋتاتتار مەملەكەت باسشىسىنىڭ جىل سايىنعى جولداۋىنداعى مىندەتتەرگە سايكەس سەناتتىڭ جۇمىس جوسپارىن تالقىلاپ, ءماجىلىس بۇعان دەيىن قابىلداعان زاڭداردى تۇراقتى كوميتەتتەر اراسىندا ءبولىپ بەردى.