اباي وبلىسىنداعى سارباز ءولىمى: دارىگەر جازادان بوساتىلدى

وتكەن جىلدىڭ 25 ساۋىرىندە سولتۇستىك قازاقستان وبلىسىنان اسكەرگە شاقىرىلعان 20 جاستاعى سارباز 16 مامىر كۇنى ءوزىن جايسىز سەزىنىپ, دەنە قىزۋى كوتەرىلگەن سوڭ اياگوزدەگى اسكەري گوسپيتالعا جەتكىزىلگەن. دارىگەرلەر تەكسەرىپ, ەم تاعايىنداعانىمەن, ونىڭ جاعدايى جاقسارماعان. كەيىن ورتالىق اۋداندىق اۋرۋحاناعا اۋىستىرىلىپ, 19 مامىردا جانساقتاۋ بولىمىندە قايتىس بولدى. وسى دەرەك بويىنشا قىلمىستىق ءىس قوزعالدى.

سوت ماتەريالدارىنا سايكەس, ايىپتالۋشى – اسكەري گوسپيتالدىڭ ەمحانا ءبولىمىنىڭ 38 جاستاعى مەڭگەرۋشىسى. وعان قىلمىستىق كودەكستىڭ 317-بابى 3-بولىگى («مەديتسينا قىزمەتكەرىنىڭ كاسىبي مىندەتتەرىن تيىسىنشە ورىنداماۋى, ابايسىزدا ادام ولىمىنە اكەلۋى») بويىنشا ايىپ تاعىلعان.

جامبىل وبلىسىنداعى سارباز ءولىمى: كومانديردىڭ سالعىرتتىعى بويىنشا تەرگەۋ اياقتالدى

ايىپتالۋشى سوتتا سارباز العاش تۇسكەندە ونىڭ تاماعى قىزارىپ, جەڭىل جوتەل مەن اسا جوعارى ەمەس تەمپەراتۋرا بولعانىن ايتتى. ول جاعدايدى پلاتستا انت قابىلداۋعا دايىندىق كەزىندە كۇن وتۋىمەن بايلانىستىرعان. دارىگەر جەدەل نازوفارينگيت دياگنوزىن قويىپ, اۋرۋحاناعا جاتقىزعان.

الايدا 17 مامىر كۇنى ساربازدىڭ جاعدايى كۇرت ناشارلاپ, دەنە قىزۋى 38,5 گرادۋسقا دەيىن كوتەرىلگەن, قان قىسىمى تومەندەپ, قۇسۋ مەن جوتەل پايدا بولعان. سوعان قاراماستان دارىگەر ەمدەۋ ءتاسىلىن وزگەرتپەي, ناۋقاستىڭ جاعدايىنىڭ اۋىرلىعىن دەر كەزىندە باعالاماعان جانە ونى ۋاقىتىلى مامانداندىرىلعان ستاتسيونارعا جىبەرمەگەن.

سول كۇنى كەشكە سارباز اۋداندىق اۋرۋحاناعا جەتكىزىلگەنىمەن, تەك كەلەسى كۇنى تاڭەرتەڭ عانا جانساقتاۋ بولىمىنە اۋىستىرىلىپ, جاساندى تىنىس الۋ اپپاراتىنا قوسىلعان.

سوت-مەديتسينالىق ساراپتاما قورىتىندىسى بويىنشا, ولىمگە ءىرىڭدى مەنينگيت سەبەپ بولعان. ول ەكىجاقتى ءىرىڭدى وتيتتەن اسقىنىپ, مي ىسىنۋىنە, سەپسيسكە, ترومبوتسيتوپەنياعا جانە بۇيرەكتىڭ ۋىتتى زاقىمدانۋىنا اكەلگەن. ساراپشىلار دارىگەر اۋرۋ بەلگىلەرىن دەر كەزىندە انىقتاماي, دۇرىس دياگنوز قويماعانىن جانە مەنينگوكوكك ينفەكتسياسىنا تەكسەرۋ جۇرگىزبەگەنىن اتاپ ءوتتى. ۋاقتىلى ءارى دۇرىس ەم كورسەتىلگەن جاعدايدا ساربازدىڭ ءومىرىن ساقتاپ قالۋعا بولاتىنى ايتىلدى.

مارقۇمنىڭ اتا-اناسى سوتتا ۇلىن اسكەرگە جىبەرەر الدىندا تولىق مەديتسينالىق تەكسەرىستەن وتپەگەنىن مالىمدەدى. ولاردىڭ ايتۋىنشا, 2025 جىلعى 22 ساۋىردە اسكەري كوميسساريات قىزمەتكەرلەرى كەلىپ, شاقىرتۋ تۋرالى حابارلاعان. كەلەسى كۇنى ولار ۇلىمەن بىرگە كوميسسارياتقا بارىپ, سول كەشتە ونى قىزمەت ورنىنا جىبەرگەن. اناسىنىڭ ايتۋىنشا, سوڭعى رەت 14 مامىردا سويلەسكەندە ۇلى دەنساۋلىعىنا شاعىمدانباعان.

شەكارا قىزمەتىنىڭ ساربازدارى ۇيلەرىنە ورالا باستادى

سەمەي گارنيزونىنىڭ اسكەري سوتى ايىپتالۋشىنى كىنالى دەپ تانىپ, 2 جىلعا باس بوستاندىعىنان ايىرۋ جانە وسى مەرزىمگە مەديتسينا قىزمەتىمەن اينالىسۋ قۇقىعىنان ايىرۋ جازاسىن تاعايىندادى. الايدا قىلمىستىڭ اۋىر ەمەس ساناتقا جاتاتىنىن, سونداي-اق ونىڭ ءۇش بالاسى بارىن جانە اۋىرلاتاتىن ءمان-جايلاردىڭ جوقتىعىن ەسكەرە وتىرىپ, سوت ونى امنيستياعا ىلىكتىردى.

سونىمەن قاتار سوت جابىرلەنۋشى تاراپتىڭ ازاماتتىق تالابىن ءىشىنارا قاناعاتتاندىرىپ, سوتتالۋشىدان مورالدىق جانە ماتەريالدىق شىعىندار مەن وكىلدىك شىعىنداردى قوسا العاندا, 12 ميلليون تەڭگەدەن استام قارجى ءوندىرۋ تۋرالى شەشىم شىعاردى.