قازاقستان مەن قىتاي ونەركاسىپتىك ىنتىماقتاستىقتى كەڭەيتىپ, ەلىمىزدە اۋقىمدى مەتاللۋرگيالىق جوبا ىسكە اسىرۋدى جوسپارلاپ وتىر. جوبا اياسىندا جىلىنا 3 ملن تونناعا دەيىن بولات وندىرەتىن زاماناۋي كومبينات سالۋ كوزدەلگەن. بۇل – ءوندىرىستى دامىتىپ قانا قويماي, جاڭا جۇمىس ورىندارىن اشۋعا مۇمكىندىك بەرەتىن ماڭىزدى باستاما, دەپ جازادى Egemen.kz.
ساۋدا جانە ينتەگراتسيا ءمينيسترى ارمان شاققاليەۆتىڭ قىتايدىڭ فۋتسزيان پروۆينتسياسىنا جاساعان جۇمىس ساپارى بارىسىندا ءىرى ينۆەستيتسيالىق جوبالار بويىنشا كەلىسسوزدەر جۇرگىزىلدى. ناتيجەسىندە قىتايلىق Fujian Hengwang Investment كومپانياسىمەن مەتاللۋرگيالىق كومبينات سالۋ ماسەلەسى پىسىقتالدى.
جوسپارلانعان جوباعا سايكەس, ينۆەستيتسيا كولەمى 1,2 ملرد دوللارعا دەيىن جەتۋى مۇمكىن. كومبينات ىسكە قوسىلعان جاعدايدا شامامەن 2,5 مىڭ جاڭا جۇمىس ورنى اشىلادى. وندىرىلگەن بولات نەگىزىنەن ىشكى نارىقتى قامتىپ, سونىمەن قاتار ەكسپورتقا باعىتتالماق.
سونىمەن بىرگە تاراپتار قازاقستان اۋماعىندا باسقا دا وندىرىستىك جوبالاردى دامىتۋعا نيەتتى. اتاپ ايتقاندا, Jinyuan توقىما كومپانياسىمەن ءجىپ ءيىرۋ ءوندىرىسىن ىسكە قوسۋ جانە شيكىزاتتى تەرەڭ وڭدەۋ باعىتتارى قاراستىرىلىپ جاتىر. Weihua Heavy Machinery كومپانياسىمەن جۇك كوتەرگىش تەحنيكا شىعاراتىن ءوندىرىس پەن ينجەنەرلىك ورتالىقتار قۇرۋ مۇمكىندىگى تالقىلانىپ جاتىر.
Shenda Electric كومپانياسىمەن ترانسفورماتورلار مەن ەلەكتروتەحنيكالىق ونىمدەر ءوندىرۋ جوباسى پىسىقتالسا, Jinlun Hi-tech Fiber كومپانياسىمەن سينتەتيكالىق تالشىقتار مەن حيميالىق وڭدەۋ سالاسىنداعى جوبالار قاراستىرىلىپ وتىر.
قازاقستان قىتايدان كولىك يمپورتتاۋشى 10 ەلدىڭ قاتارىنا ەندى
بۇل باستامالار ەلىمىزدە قوسىلعان قۇنى جوعارى وندىرىستەردى دامىتۋعا, جاڭا تەحنولوگيالاردى ەنگىزۋگە جانە ەكسپورتتىق الەۋەتتى ارتتىرۋعا باعىتتالعان. سونىمەن قاتار وندىرىستەردى جەرگىلىكتەندىرۋ ارقىلى قازاقستاننىڭ يندۋستريالىق بازاسى نىعايا تۇسەدى.
مينيستر ارمان شاققاليەۆتىڭ ايتۋىنشا, فۋتسزيان – قىتايدىڭ جەتەكشى ونەركاسىپتىك جانە ەكسپورتتىق وڭىرلەرىنىڭ ءبىرى. قازاقستان قىتايمەن تەك ەل دەڭگەيىندە ەمەس, ناقتى ايماقتارمەن تىكەلەي جۇمىس ىستەۋ ارقىلى ءتيىمدى ناتيجەگە قول جەتكىزۋدى كوزدەپ وتىر.
«فۋتسزياننىڭ پورتتارى ارقىلى قازاقستان ونىمدەرى قىتايدىڭ وڭتۇستىگىنە جانە اسەان ەلدەرىنىڭ نارىعىنا شىعۋعا مۇمكىندىك الادى», دەدى مينيستر.
QazTrade مالىمەتىنە سايكەس, 2025 جىلى قازاقستان مەن فۋتسزيان پروۆينتسياسى اراسىنداعى تاۋار اينالىمى شامامەن 522 ملن دوللاردى قۇراعان. بۇل كورسەتكىش ەكىجاقتى ەكونوميكالىق بايلانىستاردىڭ الەۋەتى جوعارى ەكەنىن ايقىندايدى.
قازاقستان قىتاي ارقىلى ترانزيتتىك اۆتوتاسىمالداۋ قۇقىعىن العان العاشقى ەل اتاندى