كەشە اقوردادا قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆا جاپونيانىڭ قازاقستانداعى توتەنشە جانە وكىلەتتى ەلشىسى ماساەسي كاموحارامەن كەزدەستى.
كەزدەسۋ بارىسىندا مەملەكەتتىك حاتشى جاپونيانىڭ قازاقستان ءۇشىن ماڭىزدى ستراتەگيالىق ارىپتەس ەكەنىن جەتكىزىپ, ەكى ەلدىڭ اراسىنداعى ساياسي جانە الەۋمەتتىك-ەكونوميكالىق ىنتىماقتاستىقتى ودان ءارى دامىتۋعا قازاقستان جاعى مۇددەلى ەكەنىن اتاپ ءوتتى. ەلباسى ن.نازارباەۆتىڭ 2008 جىلدىڭ ماۋسىم ايىندا جاپونياعا جاساعان ساپارىنىڭ ناتيجەسى ستراتەگيالىق سەرىكتەستىكتى نىعايتۋعا ىقپال ەتكەندىگى دە ايتىلدى. سونىمەن قاتار, گ.ءابدىقالىقوۆا قازاقستان مەن جاپونيانىڭ ۇكىمەتتىك جانە جەكە سەكتورلارىنىڭ ەكونوميكالىق ىنتىماقتاستىق جونىندەگى ءبىرلەسكەن كوميسسياسىنىڭ قىزمەتىن جوعارى باعالادى.
2014 جىلى قازاقستان مەن جاپونيا اراسىنداعى تاۋار اينالىمى 1,7 ملرد. اقش دوللارىن قۇرادى, سونىڭ ىشىندە ەكسپورت – 741 ملن. دوللار, ال يمپورت 925 ملن. دوللار بولدى. كەزدەسۋ بارىسىندا الەۋمەتتىك-گۋمانيتارلىق سالاداعى قازاقستان-جاپونيا قارىم-قاتىناستارىن دامىتۋدىڭ وزەكتى ماسەلەلەرى قوزعالدى. گ.ءابدىقالىقوۆا ەكى ەل حالىقتارىنىڭ ءوسىپ كەلە جاتقان ءوزارا ءمۇددەلەستىگى جاعدايىندا مادەني الماسۋلاردىڭ ماڭىزدىلىعىنا ەرەكشە توقتالىپ, مادەنيەت سالاسىندا ەكىجاقتى كەلىسىم جاساۋ مۇمكىندىگىن قاراستىرۋدى ۇسىندى. كەزدەسۋ سوڭىندا تاراپتار گەندەرلىك تەڭدىك ماسەلەلەرىن, سونىڭ ىشىندە 1995 جىلى وتكەن بۇۇ-نىڭ ايەلدەر احۋالى جونىندەگى ءتورتىنشى بۇكىلالەمدىك كونفەرەنتسياسىندا قابىلدانعان بەيجىڭ دەكلاراتسياسى مەن ءىس-قيمىلدار تۇعىرناماسى اياسىنداعى ماسەلەلەردى تالقىلادى. سونداي-اق, جاپونيا ەلشىسى مەملەكەتتىك حاتشىعا بيىلعى جىلدىڭ تامىز ايىندا توكيو قالاسىندا وتەتىن 2-ءشى بۇكىلالەمدىك ايەلدەر كونفەرەنتسياسىنا قاتىسۋعا جاپونيا پرەمەر-ءمينيسترى ح.ابەنىڭ شاقىرۋىن تابىس ەتتى. كەزدەسۋگە قازاقستان تاراپىنان ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا ءتورايىمىنىڭ ورىنباسارى, ءماجىلىس دەپۋتاتى ەلەنا تاراسەنكو, جاپونيا تاراپىنان پارلامەنتتىك ءبىلىم, مادەنيەت, سپورت, عىلىم جانە تەحنولوگيا اعا ۆيتسە-ءمينيسترى موتويۋكي فۋدزي, مادەنيەت اگەنتتىگىنىڭ دۇنيەجۇزىلىك مۇرالار جونىندەگى ءبولىمىنىڭ ديرەكتورى تاكاحيرو وكاموتا قاتىستى.
جاقسىباي سامرات, «ەگەمەن قازاقستان».