ۋاقىتشا شەكتەۋلەر اياقتالعاننان كەيىن ۇكىمەت تەڭگەرىمدى تاريف ساياساتىن جۇيەلى تۇردە جالعاستىرۋعا نيەتتى. نەگىزگى ۇستانىم – حالىققا تۇسەتىن جۇكتەمەنى مۇمكىندىگىنشە جەڭىلدەتىپ, قىزمەت ساپاسىن ارتتىرۋ.
تاريفتەردى وزگەرتۋ بارىسىندا ەكونوميكالىق نەگىزى جوق شەشىمدەرگە جول بەرىلمەيدى. ءاربىر قادام ناقتى ەسەپكە, نارىقتاعى احۋالعا سۇيەنىپ قابىلدانادى. بۇل ءوز كەزەگىندە ينفلياتسيالىق قىسىمدى تەجەپ, تۇرعىنداردىڭ الەۋمەتتىك جاعدايىنا كەرى اسەردى بارىنشا ازايتپاق.
تاريف ساياساتىنىڭ تۇپكى ماقساتى – حالىقتىڭ تۇرمىس ساپاسىن جاقسارتۋ. وسى باعىتتا ينفراقۇرىلىمنىڭ توزۋىنا جول بەرمەي, جوندەۋ جۇمىستارىن ۋاقىتىلى جۇرگىزۋ, اپاتتاردىڭ الدىن الۋ باستى نازاردا ۇستالادى. دەمەك تاريف تەك باعا قۇرالى ەمەس, كوممۋنالدىق جۇيەلەردىڭ ساپاسىنا جاۋاپ بەرەتىن ەكونوميكالىق تەتىككە اينالماق.
ەنەرگەتيكا مينيسترلىگىنىڭ مالىمەتىنە سايكەس, بيىل 1 ساۋىردەن باستاپ ەلەكتر ەنەرگياسىنا ارنالعان شەكتى تاريفتەر وزگەرىسسىز قالادى. ولار بىلتىرعى دەڭگەيدە ساقتالىپ وتىر. ايتا كەتەيىك, 2025 جىلعى جەلتوقساندا 2026– 2032 جىلدارعا ارنالعان شەكتى تاريفتەر بەكىتىلىپ, ولاردىڭ تۇراقتىلىعى الدىن الا قاراستىرىلعان.
سونىمەن قاتار جانار-جاعارماي باعاسى نارىق قاعيداتتارىنا ساي قالىپتاسادى. دەگەنمەن ۇكىمەت بۇل سالاداعى باقىلاۋدى بوساڭسىتپاي, باعانىڭ كۇرت ءارى نەگىزسىز وسۋىنە جول بەرمەۋدى كوزدەيدى. ەل ىشىندە جانار-جاعارماي تاپشىلىعى تىركەلگەن جوق, قاجەتتى قور جەتكىلىكتى كولەمدە جاساقتالعان.
وڭىرلەردە جەرگىلىكتى اتقارۋشى ورگاندار, سالالىق ۆەدومستۆولار جانە نارىق قاتىسۋشىلارى بىرلەسە وتىرىپ جەدەل مونيتورينگ جۇرگىزىپ جاتىر. ارنايى شتابتار كۇن سايىن باعا دەڭگەيىن, جانار-جاعارمايدىڭ قولجەتىمدىلىگى مەن جەتكىزۋ تىزبەگىن باقىلاۋدا ۇستاپ وتىر. بۇل شارالار ىشكى نارىقتاعى تۇراقتىلىقتى ساقتاپ, كەز كەلگەن اۋىتقۋعا دەر كەزىندە ارەكەت ەتۋگە مۇمكىندىك بەرەدى.