مەديتسينانىڭ ەڭ ۇلكەن جەتىستىكتەرىنىڭ ءبىرى ۆاكتسينا – اعزانى جۇقپالى اۋرۋلاردان قورعاۋدىڭ ەڭ سەنىمدى ءتاسىلى. دۇنيەجۇزىلىك دەنساۋلىق ساقتاۋ ۇيىمىنىڭ مالىمەتى بويىنشا, ۆاكتسيناتسيا جىل سايىن الەمدە 3-5 ملن ادامنىڭ ءومىرىن ساقتاپ قالادى.
ەلىمىزدە بالالاردىڭ نەگىزگى ەكپەلەرمەن قامتىلۋ دەڭگەيى جوعارى. 2025 جىلعا ارنالعان جوسپارعا سايكەس, ەگىلگەن بالا سانى كۇتىلەتىن كورسەتكىشتىڭ شامامەن 95%-ىن قۇرايدى. ايتالىق, الماتى قالاسىنىڭ المالى اۋدانىندا جاڭا تۋعان بالالار اراسىندا ديفتەريا, كوكجوتەل, سىرەسپەگە قارسى ۆاكتسيناتسيامەن قامتىلۋ دەڭگەيى ورتا ەسەپپەن 95-97% بولدى. پەرزەنتحانادا, ءومىرىنىڭ 1-4 كۇنىندە نارەستەلەرگە ۆ ۆيرۋستى گەپاتيتىنە, تۋبەركۋلەزگە (بتسج) قارسى ەكپە جۇرگىزىلەدى. 2 ايلىق شاعىندا بالالار كوكجوتەلگە, ديفتەرياعا, سىرەسپەگە (اكدس), پوليوميەليتكە, ۆ گەپاتيتىنە, b ءتيپتى گەموفيلدى ينفەكتسياعا, پنەۆموكوكك ينفەكتسياسىنا قارسى كەشەندى ۆاكتسيناتسيا الادى. 3-4 ايلىق كەزدە وسى ينفەكتسيالارعا قارسى ۆاكتسيناتسيا جالعاسادى, ونىڭ ىشىندە پنەۆموكوكك ينفەكتسياسىنا قارسى ۆاكتسينانىڭ ەكىنشى دوزاسى ەنگىزىلەدى. تۋعانىنا 12-15 اي بولعان بالالارعا قىزىلشا, قىزامىق, ەپيدەميالىق پاروتيتكە قارسى ەكپە, سونداي-اق پوليوميەليت پەن پنەۆموكوكك ينفەكتسياسىنا قارسى ۆاكتسيناتسيا جۇرگىزىلەدى. 1,5 جاستا كوكجوتەل, ديفتەريا, سىرەسپە, پوليوميەليت, b ءتيپتى گەموفيلدى ينفەكتسياعا قارسى رەۆاكتسيناتسيا جاسالادى. كەيىن ۆاكتسيناتسيا مەكتەپ جاسىندا جالعاسادى.
مامانداردىڭ ايتۋىنشا, جۇقپالى اۋرۋلاردىڭ تارالۋىنىڭ الدىن الۋ ءۇشىن حالىقتىڭ كەمىندە 95%-ى ۆاكتسيناتسيالانعان بولۋى قاجەت. مۇنداي دەڭگەي ۇجىمدىق يممۋنيتەتتى قالىپتاستىرادى. ول ەگىلگەن ادامداردى عانا ەمەس, مەديتسينالىق سەبەپتەرگە بايلانىستى ۆاكتسينا الا المايتىن ادامداردى دا قورعايدى.
پروفيلاكتيكالىق ەگۋلەر – بالالاردىڭ دەنساۋلىعىن قورعاۋدىڭ ەڭ ءتيىمدى ءارى قاۋىپسىز تاسىلدەرىنىڭ ءبىرى. ۆاكتسيناتسيانىڭ ارقاسىندا كوپتەگەن قاۋىپتى ينفەكتسيالاردىڭ تارالۋى ايتارلىقتاي ازايدى, بۇكىل الەمدە قاتەرلى اۋرۋلاردىڭ ميلليونداعان جاعدايىنىڭ الدىن الۋعا مۇمكىندىك تۋدى.
الماگۇل قاليبەكوۆا,
الماتى قالاسى المالى اۋدانىنىڭ سانيتارلىق ەپيدەميولوگيالىق باقىلاۋ باسقارماسى ەپيدقاداعالاۋ ءبولىمىنىڭ باسشىسى