ورتالىق كوممۋنيكاتسيالار قىزمەتى الاڭىندا وتكەن ءباسپاسوز كونفەرەنتسياسىندا «كەلەشەك مەكتەپتەرى» ۇلتتىق جوباسى اياسىندا مەكتەپ قۇرىلىسىنىڭ قورىتىندىسى جاريالاندى. جوبا ەلىمىزدە زاماناۋي ءارى قولجەتىمدى ءبىلىم ينفراقۇرىلىمىن قالىپتاستىرۋعا باعىتتالعان. كەيىنگى ءۇش جىلدا جۇزەگە اسقان جۇمىس ءبىلىم ساپاسىن ارتتىرۋمەن قاتار, وڭىرلەر اراسىنداعى تەڭسىزدىكتى ازايتۋعا دا سەرپىن بەرىپ وتىر.
وقۋ-اعارتۋ ۆيتسە-ءمينيسترى جايىق شاراباسوۆتىڭ ايتۋىنشا, ءۇش جىلدىڭ ىشىندە حالىقارالىق ستاندارتتارعا ساي كەلەتىن 460 مىڭ وقۋشى ورنىنا ارنالعان 217 جاڭا فورماتتاعى مەكتەپ سالىندى. ونىڭ ىشىندە 105 مەكتەپ 2024 جىلى, 112 مەكتەپ 2025 جىلى پايدالانۋعا بەرىلگەن. جوبانى ىسكە اسىرۋ ناتيجەسىندە 52 ءۇش اۋىسىمدى, 12 اپاتتى مەكتەپ ماسەلەسى شەشىلىپ, 100-دەن استام مەكتەپتەگى ورىن تاپشىلىعى قىسقارعان.
بارلىق نىسان بىرىڭعاي ستاندارتپەن سالىنعان. ونىڭ ىشىندە 87 مەكتەپ اۋىلدىق جەرلەردە ورنالاسقان. بۇل قالا مەن اۋىل مەكتەپتەرى اراسىنداعى الشاقتىقتى ايتارلىقتاي ازايتتى. سونىمەن قاتار مەكتەپتەردىڭ اۋدانى بۇرىنعى تيپتىك جوبالارمەن سالىستىرعاندا ورتا ەسەپپەن 15–20 پايىزعا ۇلعايىپ, تەحنيكالىق جابدىقتالۋ دەڭگەيى ءتورت ەسەدەن استام جوعارىلاعان.
جوبانى ىسكە اسىرۋعا شامامەن 30 مەملەكەتتىك ورگان مەن ۇيىم, ونىڭ ىشىندە 20 ءوڭىردىڭ اكىمدىگى قاتىسقان. قۇرىلىس جۇمىسى ەكى مەحانيزم ارقىلى جۇزەگە اسىرىلدى. اتاپ ايتقاندا, 208 مەكتەپ «Samruk-Kazyna Construction» اق ارقىلى «كىلتپەن تاپسىرۋ» فورماتىندا سالىنسا, 9 مەكتەپ جەرگىلىكتى اتقارۋشى ورگانداردىڭ دايىن نىسانداردى ساتىپ الۋى ارقىلى ىسكە اسىرىلعان.
«جاڭا فورماتتاعى مەكتەپتەر زاماناۋي پاندىك كابينەتتەرىمەن, STEM-زەرتحانالارىمەن, روبوتتەحنيكا كابينەتتەرىمەن, سونداي-اق شىعارماشىلىق ورتالىقتار, شەبەرحانالارمەن جابدىقتالعان. وقۋ كەڭىستىكتەرى ءار وقۋشىعا ارنالعان جەكە شكاف پەن جىلجىمالى پارتالار, اۋىزسۋ فونتاندارىمەن قامتاماسىز ەتىلگەن. سونىمەن قاتار فيزيكالىق بەلسەندىلىكتى دامىتۋعا ەرەكشە نازار اۋدارىلعان, ياعني 2–4 سپورت زالدارى مەن فۋتبول, باسكەتبول, ۆولەيبول, ۆوركاۋت الاڭدارى بار. سولتۇستىك ايماقتارداعى كليماتتىق جاعدايلاردى ەسكەرە وتىرىپ حوككەي, ال وڭتۇستىكتە تەننيس الاڭدارى سالىنعان», دەدى جايىق شاراباسوۆ.
ۆيتسە-ءمينيستردىڭ ايتۋىنشا, قۇرىلىس بارىسىندا نەگىزىنەن وتاندىق ءوندىرىستىڭ زاماناۋي ماتەريالدارى قولدانىلىپ, ۇلتتىق ەكونوميكا مەن وڭدەۋشى ونەركاسىپتىڭ دامۋىنا وڭ اسەرىن تيگىزگەن. نىسانداردىڭ ساپاسىن قامتاماسىز ەتۋ ماقساتىندا قۇرىلىس كونسترۋكتسيالارىنا 5 جىل, جابدىقتار مەن جيھازدارعا 3 جىل كەپىلدىك مەرزىمدەرى بەلگىلەنگەن. بۇل مەكتەپتەردىڭ ساپالى, ۇزاقمەرزىمدى بولۋىن قامتاماسىز ەتەدى.
وقۋ-اعارتۋ ۆيتسە-ءمينيسترى شىنار اقپاروۆانىڭ ايتۋىنشا, 217 مەكتەپتىڭ 183-ىندە وقۋ ۇدەرىسى ۇيىمداستىرىلعان. بۇل مەكتەپتەردە 218 مىڭعا جۋىق وقۋشى ءبىلىم الىپ, 17 مىڭعا جۋىق پەداگوگ ەڭبەك ەتىپ جاتىر.
«مەكتەپ ساپاسىنىڭ نەگىزگى فاكتورى – ونى باسقارۋ. وسىعان بايلانىستى باسقارۋ جۇيەسىن كۇشەيتۋگە باسىمدىق بەردىك. بۇگىندە 183 ديرەكتور مەن 800-دەن استام ديرەكتور ورىنباسارىنان تۇراتىن باسقارۋ كورپۋسى قالىپتاستى. بۇل قۇرامدا تاجىريبەلى باسشىلارمەن قاتار, جاڭا بۋىن كوشباسشىلار دا بار. بۇگىندە «كەلەشەك مەكتەپتەرىن» باسقارۋدىڭ بىرىڭعاي, ورتالىقتاندىرىلعان مودەلى ەنگىزىلدى. جوبانىڭ وپەراتورى رەتىندە ى.التىنسارين اتىنداعى ۇلتتىق ءبىلىم اكادەمياسى بەلگىلەندى. اكادەميا قۇرامىندا عىلىمي-ادىستەمەلىك سۇيەمەلدەۋ ورتالىعى جۇمىس ىستەيدى. بۇل ورتالىق وقۋ-تاربيە ۇدەرىسىن ادىسنامالىق جانە مازمۇندىق سۇيەمەلدەۋدى, تسيفرلاندىرۋ جۇمىسىن ۇيلەستىرۋدى, كادرلىق ىرىكتەۋدى, پەداگوگتەردىڭ كاسىبي دامۋىن, ءبىلىم ساپاسىن تالداۋدى جۇزەگە اسىرادى. ال جەرگىلىكتى اتقارۋشى ورگانداردىڭ قۇزىرەتىندە ينفراقۇرىلىم, ماتەريالدىق-تەحنيكالىق بازا جانە قارجىلاندىرۋ ماسەلەلەرى ساقتالادى. ياعني رەسۋرستىق قامتاماسىز ەتۋ وڭىرلەردە, ال ءبىلىم ساپاسىن باسقارۋ ۇلتتىق دەڭگەيدە جۇزەگە اسىرىلادى», دەدى شىنار اقپاروۆا.