مەملەكەت باسشىسى قاسىم-جومارت توقاەۆ رەفەرەندۋمعا قاتىسىپ, مەملەكەتىمىزدىڭ تاعدىرىنا بەي-جاي قاراماعان بۇكىل ەل ازاماتتارىنا شىنايى ريزاشىلىعىن ءبىلدىردى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
«رەفەرەندۋمعا جۇرتشىلىق وتە بەلسەندى قاتىستى, بۇل دا قۋانارلىق جاعداي. وسى سايلاۋ ناۋقانى ىرىستى ىنتىماعىمىزدى پاش ەتتى. بۇل دا وتە ماڭىزدى ۇدەرىس. ويتكەنى ءبىز ازاماتتارىمىزدىڭ وتانشىلدىق رۋحىن ايقىن سەزىندىك.
تۇركىستان جۇرتشىلىعى ءاردايىم ەلدىك ىستەن سىرت قالماي, جۇرگىزىلىپ جاتقان رەفورمالاردى جاپپاي قولداپ كەلەدى. بۇل جولى دا سىزدەر اۋىزبىرشىلىكتىڭ وزىق ۇلگىسىن ايقىن كورسەتتىڭىزدەر», دەدى ق.توقاەۆ.
پرەزيدەنتتىڭ ايتۋىنشا, تۇركىستان رەفەرەندۋمدا اتا زاڭدى قولداعان ەڭ بەلسەندى وبلىستاردىڭ قاتارىندا تۇر. داۋىس بەرگەن جۇرتشىلىقتىڭ 92,21 پايىزى جاڭا كونستيتۋتسيانى قولدادى.
«بارشاڭىزعا راقمەت! كيەلى تۇركىستاندا مەملەكەتىمىزدىڭ تاعدىرىنا بەي-جاي قاراماعان بۇكىل ەل ازاماتتارىنا شىنايى ريزاشىلىعىمدى بىلدىرەمىن», دەدى مەملەكەت باسشىسى.
سونىمەن قاتار پرەزيدەنت جاڭا كونستيتۋتسيا, ەڭ الدىمەن, وسكەلەڭ ۇرپاقتىڭ يگىلىگى ءۇشىن قابىلدانعانىن اتاپ ءوتتى.
«وزدەرىڭىزگە ءمالىم, مەن وسى اپتانىڭ باسىندا قازاقستان رەسپۋبليكاسىنىڭ كونستيتۋتسياسىنا جانە باس قۇجاتتىڭ ەرەجەلەرىن ىسكە اسىرۋ جونىندەگى شارالار تۋرالى جارلىققا قول قويدىم. ەندى 1 شىلدەدەن باستاپ كونستيتۋتسيا ءوز كۇشىنە ەنەدى. ال كونستيتۋتسيا كۇنىن ءبىز ءبارىمىز ءبىرتۇتاس حالىق بولىپ رەفەرەندۋم وتكىزىلگەن كۇنى, ياعني, 15 ناۋرىزدا جىل سايىن مەملەكەتتىك مەرەكە رەتىندە اتاپ وتەمىز, تويلايمىز.
جالپىحالىقتىق رەفەرەندۋمدا جاستارىمىزدىڭ بەلسەندىلىگى, جاڭاشىلدىعى جانە جاۋاپكەرشىلىگى ايقىن كورىندى. ولار وتانىنا ادال, ويى وزىق, جاسامپاز ازاماتتار رەتىندە وزدەرىنىڭ جارقىن كەلەشەگىنە قاتىستى تاڭداۋىن جاسادى.
جاڭا كونستيتۋتسيا, ەڭ الدىمەن, وسكەلەڭ ۇرپاقتىڭ يگىلىگى ءۇشىن قابىلداندى, بۇل جاستارعا ارنالعان قۇجات دەسەك, قاتە بولمايدى. تورگە وزعان حالىق كونستيتۋتسياسى جاستارعا ءجون سىلتەيدى, ءومىر جولىن كورسەتەدى. جاڭا اتا زاڭ جاس ۇرپاقپەن بىرگە جاساي بەرەدى», دەدى ەل پرەزيدەنتى.
ايتا كەتەيىك, بۇگىن مەملەكەت باسشىسى قاسىم-جومارت توقاەۆ تۇركىستان وبلىسىنا جۇمىس ساپارىمەن بارىپ, قوجا احمەت ياساۋي كەسەنەسىنە زيارات ەتتى.
سونىمەن قاتار قاسىم-جومارت توقاەۆ تۇركىستان وبلىسى جۇرتشىلىعىمەن كەزدەسۋدە تۇركىستاننىڭ تاريحي ءارى رۋحاني ماڭىزىنا توقتالىپ, بۇل وڭىرگە ەرەكشە ىقىلاسى بار ەكەنىن اتاپ ءوتتى.