قازاقستاندا وتكەن رەسپۋبليكالىق رەفەرەندۋم ازاماتتاردىڭ مەملەكەتتىك ماڭىزى بار شەشىمدەردى قابىلداۋعا بەلسەندى قاتىسۋعا دايىن ەكەنىن كورسەتتى. بۇل تۋرالى ەۋرازيالىق ينتەگراتسيا ينستيتۋتىنىڭ باس ساراپشىسى امينا قوسباەۆا مالىمدەدى, دەپ حابارلايدى Egemen.kz.
ساراپشىنىڭ ايتۋىنشا, قازاقستانداعى رەفەرەندۋم قوعامدىق-ساياسي دامۋداعى بىرنەشە ماڭىزدى ءۇردىستى ايقىندادى. ەڭ الدىمەن, 73,12% دەڭگەيىندەگى جوعارى قاتىسۋ كورسەتكىشى جانە داۋىس بەرۋشىلەردىڭ 87,15%-ىنىڭ ء«يا» دەپ داۋىس بەرۋى كەڭ كولەمدە جۇرگىزىلگەن اقپاراتتىق-ءتۇسىندىرۋ جۇمىستارىنىڭ ناتيجەسىن كورسەتەدى. ازاماتتار داۋىس بەرۋدى ەل ءۇشىن شىن مانىندە ماڭىزدى وقيعا رەتىندە قابىلدادى.
كوپتەگەن سايلاۋ ۋچاسكەلەرىندە كەزەكتەر بايقالىپ, ازاماتتار وزدەرىنىڭ كونستيتۋتسيالىق قۇقىقتارىن جۇزەگە اسىرۋعا بەلسەندى تۇردە كەلدى. بۇل قوعامنىڭ جوعارى دەڭگەيدەگى ساياسي بەلسەندىلىگىن ايقىن كورسەتتى. قازاقستاندىقتار ۇسىنىلعان كونستيتۋتسيالىق وزگەرىستەردىڭ ماڭىزىن, ولاردىڭ مەملەكەتتىك قۇرىلىمنىڭ نەگىزگى قاعيداتتارىنا اسەر ەتەتىنىن تۇسىنە باستادى.
رەفەرەندۋمدا داۋىس بەرگەندەر سانى 9 ميلليوننان استى
سونداي-اق داۋىس بەرۋ فورماتىنىڭ ءوزى دە ەرەكشە نازار اۋدارۋعا لايىق. ناقتى ساياسي تۇلعالارعا داۋىس بەرىلەتىن ەلەكتورالدىق ناۋقانداردان ايىرماشىلىعى, رەفەرەندۋم ازاماتتاردىڭ مەملەكەتتىڭ ۇزاق مەرزىمدى دامۋىن ايقىندايتىن نورماتيۆتىك قۇجاتقا دەگەن كوزقاراسىن بىلدىرەدى. سوندىقتان مۇنداي داۋىس بەرۋ ەلدىڭ بولاشاعىنا قاتىستى ماسەلەلەرگە ازاماتتاردىڭ مازمۇندى تۇردە قاتىسۋىنىڭ ءبىر كورىنىسى رەتىندە قاراستىرىلادى.
سونىمەن بىرگە كەڭ قولداۋ قوعامنىڭ قازىرگى ساياسي رەفورمالار باعىتىنا دەگەن سەنىمىنىڭ جوعارى ەكەنىن دە كورسەتەدى. رەفەرەندۋم ناتيجەلەرى زاڭدى ءارى تابيعي كورىنەدى جانە ازاماتتاردىڭ مەملەكەت باسشىسىنىڭ ساياساتى مەن رەفورمالارىنا دەگەن سەنىمىنىڭ بەلگىسى بولىپ تابىلادى. بۇل تۇرعىدا جاڭا كونستيتۋتسيانى قابىلداۋ پرەزيدەنتتىڭ ينستيتۋتسيونالدىق جاڭارۋ, ساياسي جۇيەنى جاڭعىرتۋ جانە مەملەكەتتىڭ تۇراقتىلىعىن نىعايتۋعا باعىتتالعان باعىتىن قولداۋ رەتىندە باعالانۋى مۇمكىن.
حالىقارالىق بايقاۋشىلار: ادامدار رەفەرەندۋمعا جۇرەك قالاۋىمەن كەلدى
ماڭىزدى جايتتاردىڭ ءبىرى – داۋىس بەرۋ پروتسەسىنىڭ تىنىش جاعدايدا ءوتىپ, ەلەۋلى زاڭبۇزۋشىلىقتاردىڭ تىركەلمەۋى. داۋىس بەرۋ بارىسىنىڭ ساۋاتتى ۇيىمداستىرىلعانىن حالىقارالىق بايقاۋشىلار مەن باسقا ەلدەردىڭ سايلاۋ ورگاندارىنىڭ وكىلدەرى دە اتاپ ءوتتى.
جالپى العاندا, وتكەن رەفەرەندۋم ازاماتتاردىڭ ساياسي پروتسەسكە قاتىسۋ دەڭگەيىنىڭ جوعارى ەكەنىن كورسەتتى. ول قوعامنىڭ مەملەكەتتىڭ نەگىزگى قۇرىلىمدىق قاعيداتتارىنا قاتىستى ماسەلەلەردى تالقىلاۋعا دايىن ەكەنىن ايعاقتادى.