ەلىمىزدە وتكەن رەسپۋبليكالىق رەفەرەندۋم حالىقارالىق بايقاۋشىلاردىڭ نازارىندا بولدى. شانحاي ىنتىماقتاستىق ۇيىمىنىڭ ميسسياسى ەلدەگى ساياسي ناۋقاننىڭ دايىندالۋى مەن وتكىزىلۋ بارىسىن باقىلاپ, ونىڭ زاڭ تالاپتارىنا ساي وتكەنىن اتاپ ءوتتى, دەپ جازادى Egemen.kz.
حالىقارالىق بايقاۋشىلارعا قولعابىس كورسەتۋ ورتالىعىندا وتكەن ءباسپاسوز كونفەرەنتسياسىندا شانحاي ىنتىماقتاستىق ۇيىمى ميسسياسىنىڭ باسشىسى, باس حاتشىسىنىڭ ورىنباسارى ولەگ كوپىلوۆ 2026 جىلعى 15 ناۋرىزدا وتكەن رەسپۋبليكالىق رەفەرەندۋمدى دايىنداۋ جانە وتكىزۋ بارىسىن باقىلاۋ ناتيجەلەرى تۋرالى مالىمەت بەردى. ونىڭ ايتۋىنشا, ميسسيا قۇرامىندا شىۇ-عا مۇشە جەتى مەملەكەتتەن اككرەديتتەلگەن 17 باقىلاۋشى جۇمىس ىستەگەن.
ەxit poll: حالىقتىڭ 86,7 پايىزى جاڭا اتا زاڭدى قولدادى
باقىلاۋشىلار ەلدەگى ساياسي ناۋقاننىڭ زاڭنامالىق تالاپتارعا ساي ۇيىمداستىرىلعانىنا نازار اۋدارعان. ميسسيا وكىلدەرى رەفەرەندۋمدى دايىنداۋ جانە وتكىزۋ كەزەڭدەرىن باقىلاۋ بارىسىندا ۇلتتىق زاڭناما تالاپتارىنىڭ بۇزىلعانىن نەمەسە داۋىس بەرۋ ناتيجەسىنە اسەر ەتۋى مۇمكىن قانداي دا ءبىر زاڭسىز ارەكەتتەردى تىركەمەگەنىن ايتتى.
«ميسسيا قازاقستان رەسپۋبليكاسىنىڭ جاڭا كونستيتۋتسياسىن قابىلداۋ جونىندەگى رەسپۋبليكالىق رەفەرەندۋم قازاقستان رەسپۋبليكاسىنىڭ سايلاۋ زاڭناماسىنىڭ تالاپتارىنا جانە ەل قابىلداعان حالىقارالىق مىندەتتەمەلەرگە سايكەس وتكەنىن اتاپ وتەدى. ميسسيا رەفەرەندۋمنىڭ زاڭدىلىعىنا كۇمان كەلتىرەتىن نەمەسە ونىڭ ناتيجەلەرىنە اسەر ەتۋى مۇمكىن ۇلتتىق زاڭناما نورمالارىنىڭ بۇزىلۋىن تىركەگەن جوق. ميسسيا رەسپۋبليكالىق رەفەرەندۋمدى اشىق, سەنىمدى جانە دەموكراتيالىق دەپ تانيدى. ميسسيا رەفەرەندۋم قازاقستان رەسپۋبليكاسىنداعى دەموكراتيالىق پروتسەستەردىڭ ودان ءارى دامۋىنا جاسالعان ماڭىزدى قادام بولدى دەپ ەسەپتەيدى. ءبىزدىڭ ميسسيا جۇمىسىنىڭ قورىتىندىسى بويىنشا مالىمدەمە قابىلداندى, ول ميسسيانىڭ بارلىق مۇشەلەرى تاراپىنان ماقۇلداندى. مالىمدەمە ءماتىنى بەلگىلەنگەن تارتىپپەن ورتالىق رەفەرەندۋم كوميسسياسىنا جولدانىپ, بۇقارالىق اقپارات قۇرالدارىندا جاريالانادى», دەدى ولەگ كوپىلوۆ.
تۇركيا جوعارعى سايلاۋ كەڭەسىنىڭ توراعاسى: قازاقستان رەفەرەندۋمعا ساپالى دايىندالعان
شىۇ ميسسياسىنىڭ قورىتىندى مالىمدەمەسى حالىقارالىق باقىلاۋشىلاردىڭ رەفەرەندۋم بارىسىن وڭ باعالاعانىن كورسەتەدى. بۇل باعا ەلدەگى ساياسي رەفورمالار مەن دەموكراتيالىق ينستيتۋتتاردىڭ دامۋىنا باعىتتالعان باستامالاردىڭ حالىقارالىق دەڭگەيدە دە نازاردان تىس قالماعانىن اڭعارتادى.